रामजानकी विवाह महोत्सवमा श्रद्धालुको ओइरो, याेगी आदित्यनाथ बुधबार आउने
जनकपुर — रामजानकी विवाह महोत्सवमा सहभागी हुन श्रद्धालुहरुको जनकपुर आउने क्रम जारी छ । सोमबार अयोध्याबाट जन्तीहरुकको एक समूह जनकपुर आएसँगै श्रद्धालु भित्रिने क्रम सुरु भएको हो । मंगलबार र बुधबार श्रद्धालु भित्रिने क्रम जारी रहने जानकी मन्दिरका छोटे महन्त रामरोशन दास वैष्णवले बताए ।
राममन्दिर परिसर, धनुषसागर वर्षाती, जनकमन्दिर, रेल्वे स्टेशन तथा बाह्रबिघा रंगभूमि मैदानमा श्रद्धालुहरुले साेमबार राति विश्राम गरेका थिए ।
श्रद्धालुकाे आवासका लागि यी स्थानहरुमा टेन्टको व्यवस्था गरिए पनि खानेपानी, शौचालयआदिको पर्याप्त व्यवस्था नरहेको उनीहरुले गुनासाे गरेका छन् ।
सप्ताहव्यापी रामजानकी विवाह महोत्सवको मुख्य आयोजन बुधबार हुनेछ । मुख्य आयोजनमा भारत उत्तरप्रदेशका मुख्यमन्त्री योगी आदित्यनाथ सहभागी हुने कार्यक्रम छ । विशेष विमानबाट जनकपुर आउने मुख्यमन्त्री योगी जानकी मन्दिरमा पूजा अर्चना गर्नुका साथै प्रदेश सरकारले आयोजना गर्ने दिवाभोजमा सहभागी हुने कार्यक्रम छ । त्यस पछि उनी बाह्रबिघा पुग्नेछन् । जहाँ रामजानकी विवाह महोत्सवको विशेष कार्यक्रम आयोजना हुनेछ ।
महोत्सवका सहभागी हुने विशिष्ट अतिथि तथा श्रद्धालुहरुको शान्ति सुरक्षाका लागि स्थानीय प्रशासनले झण्डै ४ हजार सुरक्षाकर्मी परिचालन गरेको छ । मंगलबारदेखि नगरक्षेत्रमा चार पांग्रे गाडीलाई छिर्न रोक लगाइएको छ । चार पांग्रेलाई नगर बाहिर पार्किङको व्यवस्था मिलाएको छ ।