स्थानीय तहमा गाडी मोह, एकै वर्ष ७ करोडका गाडी

केही नगरपालिका तथा गाउँपालिकाले प्रमुख–उपप्रमुखका लागि सुविधासम्पन्न स्कोर्पियो किनेका छन् भने वडाध्यक्षका लागि हेभी मोटरसाइकल खरिद गरेका छन् । सबै तहले छुट्टाछुट्टै मोडलका सवारीसाधन किनेको जिल्ला समन्वय समिति प्रमुख शिवप्रसाद ढुंगानाले बताए ।

म्याङलुङ नगरपालिकाले पहिल्यै ३० लाख रुपैयाँमा किनेको सामानसमेत राख्न मिल्ने पिकअप गाडी हुँदाहुँदै चालु आवमै ५५ लाख रुपैयाँमा एस फाइभ मोडलको स्कोर्पिओ खरिद गरेको छ । भर्खरै मात्र वडाध्यक्षका लागि २९ लाख रुपैयाँमा १० वटा मोटरसाइकल पनि किनिएको छ । कर्मचारीका लागि थप १० वटा मोटरसाइकल खरिद गर्ने योजना रहेको एक कर्मचारीले बताए । नगरपालिकामा यसअघि किनिएका ६ वटा मोटरसाइकल र एउटा स्कुटर चालु अवस्थामै छन् ।

फेदाप गाउँपालिकाका प्रशासकीय अधिकृत सुमन लिङदेनले भर्खरै मात्र ५४ लाख १५ हजार रुपैयाँमा एस फाइभ मोडलको स्कोर्पिओ गाडी खरिद गरेको बताए । गाउँपालिकाले ५ लाख ९४ हजार ९ सय रुपैयाँबराबरका ३ वटा मोटरसाइकल किनेको छ ।

मेन्छ्यायाम गाउँपालिकाले ६१ लाख ५० हजार रुपैयाँमा नयाँ मोडेलको एस इलेभेन स्कोर्पियो र वडाध्यक्षहरूका लागि २ लाख १७ हजारका दरले ६ वटा मोटरसाइकल किनेको प्रशासकीय अधिकृत नवदीप राईले बताए । मोटरसाइकल खरिदमा १३ लाख २ हजार रुपैयाँ खर्च भएको उनले जानकारी दिए ।

आठराई गाउँपालिकाले ५२ लाख रुपैयाँमा स्कोर्पिओ किनेको छ । गत आवको अन्त्यमा गाउँपालिकाले कार्यालय प्रयोजनका लागि २ लाख १५ हजारका दरले ४ वटा मोटरसाइकल खरिद गरेको छ । मोटरसाइकलका लागि मात्र ८ लाख ६० हजार रुपैयाँ खर्च भएको छ । कार्यालय प्रयोजनका लागि थप ५ लाख रुपैयाँ बराबरको एउटा मोटरसाइकल किन्ने योजना रहेको प्रमुख प्रशासकीय अधिकृत राजेन्द्रप्रसाद दाहालले बताए । केही समयअघि बसेको गाउँसभा बैठकले ५ लाख रुपैयाँको मोटरसाइकल किन्ने निर्णय गरेको थियो ।

छथर गाउँपालिकाले इसिजु भी क्रस गाडी गत आवमा ६५ लाख रुपैयाँमा किनेको छ । गाउँपालिकाले कार्यालय प्रयोजनका लागि २ लाख १७ हजारका दरले ४ वटा मोटरसाइकलसमेत ल्याएको छ । योजना अनुगमन तथा निरीक्षणमा समस्या भएकाले सवारी खरिद गरिएको गाउँपालिका अध्यक्ष सन्तवीर लिम्बूले बताए ।

लालीगुराँस नगरपालिकासँग भने जनप्रतिनिधि आउनुअगाडि नै २५ लाख २५ हजार रुपैयाँमा किनिएको पिकअप गाडी छ । मेयर अर्जुन माबोहाङ यही गाडी प्रयोग गर्छन् । नगरपालिकाले गत आवमा वडाध्यक्षका लागि भन्दै २ लाख १७ हजार ९ सय रुपैयाँका दरले ९ वटा मोटरसाइकल किनेको छ ।

कार्यालय प्रयोजनका लागि २ लाख ५५ हजारका दरले किनिएका ३ वटा र ४ लाख ८५ हजारका दरले थप २ वटा होन्डा मोटरसाइकल नगरपालिकाले खरिद गरेको छ । नगरपालिकासँग एउटा होन्डा साइन मोटरसाइकल पनि छ । त्यसैगरी बजार क्षेत्रको फोहोर संकलन गर्न २७ लाख रुपैयाँमा फोरहिवल ट्रयाक्टर र ९२ लाख रुपैयाँमा स्काभेटर किनिएको छ । जनप्रतिनिधि आउनुअघि नै २७ लाख रुपैयाँमा किनिएको स्काभेटर पनि चालु अवस्थामै रहेको लेखापाल राजु ढुंगानाले बताए ।

तेह्रथुमसँग सीमा जोडिएको पाँचथरको तुम्बेवा गाउँपालिकाले पनि गत आवमा ३६ लाख ६० हजार रुपैयाँ लागतमा स्कोर्पिओ गाडी तथा उपाध्यक्ष, वडाध्यक्ष र कार्यालयका कर्मचारीका लागि ५ वटा मोटरसाइकल किनेको छ । गाउँपालिकाले बाहिरबाट पानी ल्याएर वितरण गर्न ट्यांकीजडित ट्र्रयाक्टर किन्न २७ लाख रुपैयाँ छुट्याएको अध्यक्ष होमनाथ थापाले बताए ।

पाँचथरकै कुम्मायक गाउँपालिकासँग भने अहिलेसम्म गाडी छैन । गत आवमा गाडी किन्न छुट्याएको बजेटबाट गाउँपालिकाले पानी बोक्ने टयांकीजडित ट्रयाक्टर किनेको थियो । दुईवटा ट्रयाक्टर किन्दा गत वर्ष ४८ लाख रुपैयाँ खर्च गरिएको थियो । यो वर्ष ६० लाख रुपैयाँमा स्कार्पिओ गाडी किन्ने प्रक्रिया अगाडि बढेको अध्यक्ष जयबहादुर चेम्जोङले बताए ।

जनप्रतिनिधिको सेवा–सुविधाका लागि किनिएका सवारीसाधनको इन्धन र मर्मत खर्च कार्यालयबाटै व्यहोर्ने गरिएको छ । विकास बजेट र नागरिकले तिरेको करको व्यापक दुरुपयोग गरेको नागरिक समाजका अगुवा तुलसी संग्रौलाले बताए ।

चुनावका बेला गरिएको खर्च असुल्न र त्यसको फाइदा लिन मात्रै जनप्रतिनिधि केन्द्रित भएको तेह्रथुमको लालीगुराँस नगरपालिका–४, चित्रेका होमराज रायमाझीले आरोप लगाए । जनप्रतिनिधिले अनावश्यक भत्ता लिने, खर्च भएको भन्दा बढीको बिल पेस गरेर भुक्तानी लिने, महँगो गाडी र मोटरसाइकल खरिद गरी चढ्ने गरिरहेको उनको आरोप छ ।