प्रदेशको नामकरण कहिले ?

कान्तिपुर संवाददाता

काठमाडौँ — नेपालको संविधान (२०७२) घोषणा हुँदा सहमति नभएपछि प्रदेशलाई संकेतस्वरुप १–७ सम्म अंक दिएर नामकरण गरियो । संविधानमा पनि त्यही लेखियो । आपसी सहमतिका आधारमा वा दुई तिहाइ मतसाथ प्रदेशसभाले नै प्रदेशको राजधानी तोक्ने र नामकरण गर्ने व्यवस्था संविधानमा व्यवस्था गरियो ।

निर्वाचन सम्पन्न भइसकेको १ वर्ष हुन लाग्यो । प्रदेशमा समेत संसद चालु छन् । तर कुनै जनमुखी कार्यक्रम ल्याउन नसकिरहेको आलोचना करिब दुई तिहाइ मत प्राप्त दलले सुन्नु परिरहेको छ । जेजति बलियो सरकार बने पनि कुनै पनि ठोस काम हुनसकेका छैनन् । यतिसम्म कि प्रदेशको नामकरण र राजधानी तोक्ने कार्यमा पनि विलम्ब भइरहेको छ । अहिलेसम्म प्रदेश ४ ले गण्डकी र प्रदेश ७ ले कर्णाली प्रदेश नामकरण गर्नसकेका छन् । बाँकी प्रदेशले न्वारनसमेत गर्नसकेका छैनन् । कुनै प्रदेशले प्रक्रिया अघि बढाएको भन्ने सुनिन्छ, तर केहीले त नामकरणको विषयमा प्रवेश गर्नैसकेका छैनन् । कहिलेसम्म हामीले आफ्नै प्रदेशहरूलाई अंकका आधारमा सम्बोधन गरिरहनुपर्ने हो ?
– नरनाथ पाण्डे
कावासोती—८, नवलपुर

Yamaha

प्रकाशित : श्रावण १६, २०७५ १०:०६
ADVERTISEMENT
प्रतिक्रिया
पठाउनुहोस्
ADVERTISEMENT

हरियो रंगको उल्लास

कान्तिपुर संवाददाता

काठमाडौँ — हाम्रा कतिपय चाडपर्वलाई विभिन्न रंगले उत्कृष्ट, उल्लासमय बनाउने गर्छन् । दसैंमा नयाँ रंगीविरंगी कपडा र रातो अक्षता, भाइतिहारको सप्तरंगी टीकादेखि होलीको रंग–उत्सव साथै महिला केन्द्रित साउनको हरियो रंग सबैमा आ–आफ्नै विशेषता छन् । झन्डै २ दशक अघिबाट बढी आकर्षक बन्दै आएको साउने उत्सव विशिष्ट बनेको छ ।

नेपाल लगायत भारत, पाकिस्तान, जापानजस्ता देशमा घर–गृहस्थी सञ्चालनमा महिलाको योगदान झन्डै ८० प्रतिशत रहेको बताइन्छ । घरायसी कामसँग जोडिएको अत्यधिक परिश्रम र बेफुर्सदी जीवनले महिलालाई थकान र तनावग्रस्त नबनाउला भन्न सकिँंदैन । यता साउनको अविरल वर्षा र प्रकृतिको मोहक रंग धरतीको आभूषण बनिरहँदा तनावबाट मुक्ति पाउने हेतुले प्राकृतिक हरियालीसँग तादात्म्य राख्दै महिलाले रोजेका हरिया चुरा, पोते, टीका र पहिरनले सिंगो मुलुकको गरिमा बढाएको छ । यहाँनिर भन्नुपर्ने हुन्छ– प्रत्येक रंगले अनगिन्ती अमूक भाषा बोलिरहेको पाइन्छ । हरियोलाई सौम्य, प्रकृतिपरक, शालीन र खतरामुक्त रंगका रूपमा चित्रण गर्न सकिन्छ । एकातिर हिन्दु परम्परा अनुसार साउन महिना शिव–आराधनाको सर्वोत्तम समय मानिएको छ भने अर्कोतिर विवाहित महिलाको हरियो अलंकार आफ्ना पतिको दीर्घजीवनको कामना गर्ने सन्दर्भसँग जोडिंँदा पारिवारिक सुख–शान्तिको निम्ति यो समय अरू महत्त्वपूर्ण बनेको छ ।
– भुवनेश्वर शर्मा
चन्द्रागिरि–२, काठमाडौं

प्रकाशित : श्रावण १६, २०७५ १०:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT