पोखरामा ट्होटेको रौनक [फोटोफिचर]
काठमाडौँ — हातमा तरबार, लठ्ठी धनुषवाण र झार बोकेका, अनुहारमा कालो पोतेर, भोटो कछाडमा ठाँटिएका । कोही ढ्यांग्रो बजाउँदै थिए भने महिला गुनियोचोली, चुरापोतेसहित जातीय पोसाकमा सजिएर लस्करै र समूहमा हिँडिरहेका देखिन्थे । त्यो हुलमा जोगी तथा झाँक्रीको भेषमा सिँगारिएकाहरु र बालबालिकादेखि वृद्धवद्धा पनि थिए । यो दृश्य हो, गुरुङ समुदायले मंगलबार पोखरामा मनाउँदै गरेको ट्होटे पर्वको ।
पोखराको बगर टुँडिखेलबाट निस्किएको र्याली बागबजार, भैरवटोल, सिद्धार्थचोक, महेन्द्रपुल हुँदै नयाँबजार तमुधिंमा पुगी समापन भएको भएको थियो । साउन महिनाको अन्तिम मंगलबार गुरुङ समुदायले सामूहिक रुपमा ट्होटे पर्व मनाउने गर्छन् । यस्तै पर्व चैतको अन्तिम मंगलबार पनि मनाउने गरिन्छ ।
गुरुङ भाषामा 'ट्हो' भनेको राज्य र 'टे' भनेको धपाउने अर्थात् राज्यबाट शत्रुलाई लखेट्ने भन्ने बुझिन्छ । सहरमा यसरी मनाए पनि गाउँघरमा भने भूतप्रेत भगाउने पर्वको रुपमा ट्होटे मनाइन्छ । चैतमा उभौली र साउनको ट्होटेलाई उधौली भनिन्छ ।
