राष्ट्रिय गौरवको वैकल्पिक मार्ग निर्माण तीव्र

डिल्लीराम खतिवडा

उदयपुर — वैकल्पिक मार्ग निर्माणको काम तीव्र गतिमा भइरहेको छ । अहिलेकै अवस्थामा निर्माण भइरहे लक्ष्यअनुसार नै काम सम्पन्न हुने निश्चित छ ।

राष्ट्रिय गौरवको योजना मानिएको वैकल्पिक मार्ग (धरान–चतरा हेटौंडा सडक योजना) ३ वर्षभित्र निर्माण गरिसक्ने लक्ष्य राखिएको हो । सडक विभागले सडक विस्तार हुने क्षेत्रको क्रमश: अवरोध हटाउँदै गएपछि कामले तीव्रता पाएको छ । जंगल क्षेत्रका रूख हटाउने र घरटहराका लागि मुआब्जा लगायतका काम अगाडि बढाएकाले दु्रतगतिले निर्माणले अगाडि बढिरहेको छ ।

चैत मसान्तसम्म भौतिक रूपमा ३५ प्रतिशतभन्दा बढी नै काम भइसकेको पूर्वी खण्ड निर्माण गर्न ठेक्का लिएको कम्पनी जेडआईईसी लामा एन्ड शर्मा जोइन्ट भेन्चरले जनाएको छ । ‘३५ प्रतिशतभन्दा बढी नै भौतिक निर्माणको काम भइसकेको छ,’ कम्पनीका प्रोजेक्ट मेनेजर निर्माण पोखरेलले भने, ‘सिन्धुलीतर्फको विद्युत् पोल हटाउनेबाहेक अन्य क्षेत्रमा रहेको अवरोध हटेको छ ।’ सिन्धुली क्षेत्रका विद्युत् पोल हटाउने काम नहुँदा रूख कटान पनि रोकिएको उनले बताए । धरान–चतरा–हेटौंडा सडक योजना दुई खण्डमा विभाजन गरेर काम भइरहेको छ । धरानदेखि सिन्धुलीको
भिमादसम्म पूर्वी खण्डमा पर्छ । पूर्व खण्डमा ४३ वटा पुलसहित सडक विस्तार भइरहेको छ । विस्तार भइरहेको सडकको चैत मसान्तसम्म पुलको ३० प्रतिशत र सडकतर्फ २६ दशमलव ५ प्रतिशतले आर्थिक प्रगति भएको सडक आयोजना पूर्व खण्ड कार्यालय गाईघाटले जनाएको छ ।

‘आर्थिक प्रगति पनि लक्ष्यअनुसार नै भएकाले सडक निर्माणले तीव्रता लिएको छ,’ आयोजना प्रमुख उमेशविन्दु श्रेष्ठले भने, ‘आर्थिक प्रगतिसँगै भौतिकसमेत भएकाले चुस्त दुरुस्त रूपमा काम अगाडि बढिरहेको छ ।’ सडक विस्तार हुने विशेष गरी सिन्धुली क्षेत्रमा मुआब्जा निर्धारण भइसकेकाले घरटहराका कारणले काम रोकिने समस्या समाधान भइसकेको उनले वताए । सिन्धुलीमा ५ सय २४ घरधुरीको २० करोड ६४ लाख रुपैयाँ मुआब्जा निर्धारण भई घरटहरा हटाउने काम भइरहेको आयोजना प्रमुख श्रेष्ठले बताए । ‘उदयपुरतर्फ पनि घरटहराको मूल्यांकन गरेर प्रमुख जिल्ला अधिकारीको अध्यक्षतामा भएको मुआब्जा निर्धारण समितिमा पेस गरिएको छ ’ प्रमुख श्रेष्ठले भने, ‘यसको पनि चाँडै टुंगो लाग्नेछ ।’ सडक विस्तार हुने क्षेत्रमा मुआब्जा निर्धारण भएपछि चाँडै उदयपुरमा पनि घरटहरा हटाउने काम हुने उनले बताए ।

सडक निर्माणको क्रममा सार्वजनिक निर्माणअन्तर्गत सुरुको १ अर्ब ५८ करोड र ६ महिनापछि १ अर्ब ५८ करोड रकम विनियोजन भएको छ । विनियोजित रकमबाट आर्थिक वर्ष ०७४/०७५ चैत मसान्तसम्म सकिएकाले चालु आर्थिक वर्षको बाँकी अवधिका लागि १ अर्ब ७० करोड सडकतर्फ रकम आवश्यक रहेको आयोजना प्रमुख श्रेष्ठले बताए । त्यसैगरी घरटहरा मुआब्जाका लागि २८ करोड रुपैयाँ आवश्यक पर्नेमा थप २३ करोड रुपैयाँ आर्थिक वर्षको चालु अवधिका लागि आवश्यक रहेको श्रेष्ठले बताए । आर्थिक र भौतिक प्रगतिसँगै सडक निर्माणमा गुणस्तरीय काम भइरहेको आयोजनाले दाबी गरेको छ । राष्ट्रिय गौरवको योजना भएकाले पनि गुणस्तरमा कुनै किसिमको सम्झौता नगरिएको सम्बद्ध अधिकारी बताउँछन् ।

Yamaha

प्रकाशित : वैशाख २६, २०७५ ०९:४९
ADVERTISEMENT
प्रतिक्रिया
पठाउनुहोस्

तामाङ भाषा र लिपि सिकाइयो

कान्तिपुर संवाददाता

सुनसरी — नेपाल तामाङ घेदुङ धरान उपमहानगर समितिको आयोजनामा मंगलबार दुईदिने तामाङ भाषा र लिपिको प्रशिक्षण सम्पन्न भएको छ । धरान उपमहानगरपालिकाको आर्थिक सहयोगमा घेदुङले प्रशिक्षण कार्यक्रम गरेको हो ।

उक्त अवसरमा घेदुङका राष्ट्रिय सल्लाहकार एवम् पूर्व केन्द्रीय उपाध्यक्ष सुजेन्द्र गोलेले मौलिक मातृभाषा र लिपि जातिको पहिचान र अस्तित्व भएको र भाषासंगै विविध मौलिक संस्कृति, परम्परा र रितिरिवाज पनि जोडिएर आउने भएकाले प्रशिक्षण जुरुरी भएको बताए ।

उनले दिनानुदिन लोपोन्मुख बन्दै गएको तामाङ भाषा र लिपिको संरक्षण गर्न यस्ता प्रशिक्षण कार्यक्रम नियमति गर्नुपर्ने बताए । उनले घेदुङ प्रमुख उद्देश्यहरू मध्ये भाषा र लिपिको विकास पनि एक भएकाले प्रशिक्षण कार्यक्रमलाई अभियानको रुपमा निरन्तरता दिन र विद्यालयहरूमा समेत पठनपाठनको व्यवस्था मिलाउनका लागि पहल गर्नुपर्नेमा जोड दिए । भाषा लिपि प्रशिक्षणमा धरानका ४० महिला तथा पुरुषहरूको सहभागिता रहेको थियो ।

प्रशिक्षण समापनमा घेदुङका केन्द्रीय सदस्य मैतबहादुर गोले, जिल्ला अध्यक्ष सुरज लामा, महिला घेदुङ सुनसरीका अध्यक्ष विष्णु मोक्तान, पूर्व नगर अध्यक्ष जयबहादुर मोक्तान, गुम्बा अध्यक्ष हर्क गोले, संरक्षक सदस्य नन्दलाल पाख्रिन, महिला घेदुङका नगर अध्यक्ष नन्दु पाख्रिन लगायतले बोलेका थिए । प्रशिक्षार्थीहरूलाई घेदुङ सुनसरीका सचिव मंगलसिंह मोक्तानले प्रशिक्षण दिएका थिए ।

प्रकाशित : वैशाख २६, २०७५ ०९:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT