बजेट सक्न हतारो

हलेसी तुवाचुङ नगरपालिकाको ३८ करोड ४० लाखमध्ये ६० प्रतिशत खर्च भइसक्यो
डम्बरसिं राई

खोटाङ — यो आर्थिक वर्ष सकिन लगभग दुई महिना बाँकी छ । त्यसैले यतिखेर बजेट सक्न हतारो छ । कतिपय योजनाको सम्झौता धमाधम भइरहेका छन् भने कतिपय योजनाको अनुगमन पनि भइरहेका छन् ।

दुई नगरपालिका र ८ गाउँपालिकाहरूमध्ये हलेसी तुवाचुङ नगरपालिकामा ६०, दिक्तेल रूपाकोट मझुवागढी नगरपालिकामा ६५ तथा अधिकांश गाउँपालिकामा करिब ७० प्रतिशतको हाराहारीमा बजेट खर्च भएको छ । कतिपय गाउँपालिकाहरूमा केन्द्र र नाम विवादले काममा ढिलाइ भएको छ । दिप्रुङ चुइचुम्मा गाउँपालिकाका अध्यक्ष भूपेन्द्र राईका अनुसार पालिका विवादले करिब डेढ महिना अलमल हुँदा काममा समस्या आएको छ ।

त्यस्तै रावाबेंसी र बरापोखरी गाउँपालिकामा पनि यो समस्या देखियो । यसले काम गर्न समस्या भएको बराहापोखरी गाउँपालिका अध्यक्ष सालिकराम बन्जरा बताउँछन् । यद्यपि तीनै पालिकामा ७० प्रतिशत बजेट खर्च भएको पालिका अध्यक्षहरूको भनाइ छ ।

Yamaha

खोटेहाङ गाउँपालिकामा १८ करोड १४ लाख ९४ हजार रुपैयाँ बजेटमध्ये विद्युतमा छुटयाएको १ करोड ८० लाख रुपैयाँ भने यो वर्ष बजेट खर्च हुन नसक्ने भएकाले अन्य काममा खर्च गर्ने तयारी गरिएको खोटेहाङ गाउँपालिका अध्यक्ष प्रदीप राईले बताए । अन्य पालिकामा भने शीर्षकअनुसारको बजेट खर्च हुने पालिका अध्यक्षहरूले बताएका छन् ।

दुई नगरपालिकामध्ये हलेसी तुवाचुङ नगरपालिकाको ३८ करोड ४० लाखमध्ये ६० प्रतिशत खर्च भइसकेको छ । यो आवभित्र सबै बजेट खर्च भइसक्ने प्रमुख प्रशासकीय अधिकृत अनिल किरातीले बताए । दिक्तेल रूपाकोट मझुवागढी नगरपालिकामा ६१ करोड ५३ लाख २३ हजारमध्ये ६५ प्रतिशत खर्च भएको छ । यही आवमा सबै बजेट सकिने मेयर दीपनारायण रिजालको भनाइ छ ।

यसमा केही योजनाहरूको रकम भने संशोधन गरी अन्यमा खर्च गर्ने योजना भएको मेयर रिजालले बताए । सबै पालिकाहरूले सडक, विद्युत्, पर्यटन, पूर्वाधारलगायतलाई प्राथमिकतामा राखेर बजेट विनियोजन गरेको थियो । कतिपय पालिकाले विकासका नाममा पुरातात्त्विक/सम्पदा ध्वस्त पारेका छन् । यसको उदाहरण दिक्तेल रुपाकोट मझुवागढी नगरपालिकाको धार्मिक तथा पर्यटकीय मझुवागढी क्षेत्र, हलेसी तुवाचुङ नगरपालिकाको होलेसुङ पार्क क्षेत्र, त्यहाँकै ऐतिहासिक तुवाचुङजायजुम क्षेत्र विनासलाई लिन सकिन्छ ।

कतिपय योजना गुणस्तरहीन भएको गुनासा आएका छन् । यसप्रति चौतर्फी गुनासो आउँदासमेत दीर्घकालीन धारणामा प्रस्ट नहुँदा यस्तो भएको स्थानीयको भनाइ छ । यसले जनप्रतिनिधिहरूभन्दा सर्वसाधारणमा चेतनाको विकास भएको पुष्टि हुन्छ । पालिका अध्यक्षहरूमाथि विकासप्रतिको धारणा प्रस्ट नहुदा काममा अलमल भएको देखिन्छ ।

कार्यपालिकाको योजना नबनाई हतासमा योजना छनोट गरी काम सुरु गरिएकाले बालुवामा पानी खन्याएसरह काम भएको छ । अल्पकालीन, मध्यकालीन र दीर्घकालीन योजना बनाउन नसक्दा यसको सामना गर्नुपरेको हो ।

Esewa Pasal

प्रकाशित : वैशाख ३१, २०७५ १०:१९
ADVERTISEMENT
प्रतिक्रिया
पठाउनुहोस्
ADVERTISEMENT

दोश्रो अन्तर्राष्ट्रिय कँराते प्रतियोगिता सुरु

डम्बरसिं राई

खोटाङ — खोटाङको दिक्तेल, रुपाकोट मझुवागढी नगरपालिकाको माटिकोरे खेल मैदानमा दोश्रो अन्तर्राष्ट्रिय कँराते प्रतियोगिता बिहीबारदेखि सुरु भएको छ । प्रतियोगितामा भारत, श्रीलंका लगायत नेपालका विभिन्न घरेलु टोलीसहित ११ टिम सहभागी छन् ।

खेलको पहिलो दिन पुरुष टिम काता, महिला टिम काता, एकल पुरुष कता, एकल महिला काता सकिएको छ । यस अन्तर्गत पुरुष टिम कातातर्फ नेपाली सेनाका डम्बर आले मगर, जुहारिला खत्री, सानुकुमार रुम्बा प्रथम, मोतिचन्द्र राई, अर्जुन श्रेष्ठ, रुरीहाङ दुमी आयोजक टिम दोश्रो र प्रदेश नं–६ दिपक विक, लवराज आचार्य, सुरज नेपाली तेश्रो भएका छन् ।

महिला कातातर्फ नेपाली सेनाका सुनिता नेपाली, संगीता मगर र पूर्णकुमार कुमाल प्रथम, भारतका भन्सीका तनवार, अङ्किता र अपर्णा चौहान दोश्रो र आयोजकका रोस्मा राई, विद्याकला राई र नन्जु राई तथा प्रदेश नं–३ का कोपिला बुढाथोकी, एलिना तामाङ र पूर्णीमा रानामगर तेश्रो भएका छन् ।

पुरुष एकल कातातर्फ नेपाली सेनाका डम्बरबहादुर आलेमगर प्रथम, आयोजक मोतिचन्द्र राई दोश्रो, भारतका चौहान दत्तचौट र प्रदेश १ का विनय लिम्बु तेश्रो भएका छन् । महिला एकल कातातर्फ भारतकी भन्सिका तनवार प्रथम, नेपाली सेनाकी कर्मा लामा दोश्रो, आयोजक रोस्मा राई र प्रदेश नं १ की स्वस्तिका राई तेश्रो भएका छन् ।

खेलमा प्रथम हुनेले नगद ७० हजारसहित मेडल, कप र प्रमाणपत्र, दोश्रो हुनेले नगद ३५ हजार मेडल, कप र प्रमाणपत्र तथा तेश्रोले २५ हजार नगद मेडल, कप र प्रमाणपत्र पाउने आयोजक सितोरियो कँराते संघ खोटाङका अध्यक्ष सन्जयकुमार राईले बताए । कार्यक्रमको उद्घाटन प्रतिनिधिसभा सदस्य विशाल भट्टराईले गरेका हुन् । कार्यक्रममा सितोरियो कँराते महासंघका अध्यक्ष दावा सेर्पा लगायत अन्तर्राष्ट्रिय प्रशिक्षकहरु समेत उपस्थित भएका छन् ।

प्रकाशित : वैशाख २१, २०७५ ०९:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT