वर्षात्मा सडक
काठमाडौँ — वर्षा याम सुरु भइसक्यो । यो वर्ष केही अगाडि नै वर्षात् हुन थालेको हो । होचा सहर तथा गाउँमा मध्यवर्षामाझैं सडक हिलाम्मे भइसक्यो । खाल्डाखुल्डीमा पानी जमेर हिँड्नै मुस्किल हुन थालेको छ ।
जेठको सुरुआतसँगै अब यो आर्थिक वर्षको अन्तिम एक महिना मात्र बाँकी रहेको छ । महानगर, उपमहानगर, नगरपालिका र गाउँ पालिकाहरूमा असारे विकास सुरु भइसकेको छ । झरिपर्दै गर्दा पनि निर्माणका कामहरू असारको २१ सम्ममा सकेर बिल फरफारक गर्ने हतारो ठेकेदारलाई हुन्छ ।
असार लागेपछि चोक, सडक, ढल निर्माणमा तीव्रता आउँछ । बजेट खर्च गर्ने हतारोले काम समयमा नै अनुगमन नहुँदा कमसल हुने गरेका छन् । असारमा निर्माण गरिएका सडक दुई महिना पनि नबित्दै खाल्डा पर्न थाल्छन् । उपभोक्ता सम्मिलित आयोजना भने केही राम्रै भए पनि ठेकेदारको मनोमानीले अन्य योजनाहरू भने झारा टार्ने मात्र हुन्छन् ।
हतारमा निर्माण भएरहेका योजना कसरी निर्माण भइरहेका छन् भन्ने आमउपभोक्ताले चासो राख्ने हो भने गुणस्तरमा सम्झौता नगरी ठेकेदारले निर्माण गर्न बाध्य हुन्छन् ।
नत्र सामान्य र कमसल काम गरेर सरकारी निकायबाट ठकेदारले सम्पूर्ण रकम असुलिरहेको हुन्छन् । इटहरीको पशुपति मार्गको तीन सय मिटर लम्बाइको सडक स्थानीय उपभोक्ताहरूको निगरानीमा निर्माण भइरहेको छ । उपभोक्ता आफैंले रकम खर्च गरेर निर्माण गरिरहेको उक्त सडकको कमजोर नहोस भनेर उपभोक्ताहरू कामदारसँगै निगरानी गरिरहेका छन् ।
प्रकाशित : जेष्ठ २, २०७५ ०९:१५