राजपत्र सुरु
विराटनगर — प्रदेश १ को सरकारले ‘प्रदेश राजपत्र’ प्रकाशन गर्न थालेको छ । प्रदेश सरकारबाट निर्णय भइ प्रमाणीकरण भएका सार्वजनिक लिखतहरू सर्वसाधारणको जानकारीका लागि राजपत्र प्रकाशन गर्न थालिएको हो ।
सभाको पहिलो बैठक बसेको २ महिनापछि प्रदेशको सार्वजनिक लिखत प्रमाणीकरण कार्यविधि विधेयक पारित गरिएको थियो ।
सार्वजनिक लिखत प्रमाणीकरण कार्यविधि विधेयक पारित भएपछि संविधानको धारा १६२ को उपधारा (५) र धारा १६६ को उपधारा (३) बमोजिम प्रदेश सरकारले बनाएको ऐन, प्रदेश प्रमुखले जारी गर्ने अध्यादेश, आदेश, अधिकारपत्रको सूचना, प्रदेश सरकारले बनाएको नियम, कार्यविधि, निर्देशिका तथा कानुनबमोजिम जारी हुने गरेका थिए ।
प्रदेशसभाले पास गरेका विधेयक, मन्त्रिपरिषद्ले बनाएका ऐन कानुन, निर्देशन, नियम, मन्त्रालयले बनाए नियम, कानुन र निर्देशनहरूलाई प्रमाणीकरण गर्ने व्यवस्था विधेयकले गरेको थियो । प्रदेशसभाबाट पारित विधेयकलाई सचिवालयले नेपाली कागजमा ५ प्रति तयार गरी सभामुखबाट प्रमाणीकरण गराउनुपर्छ ।
संविधान तथा संघीय वा प्रदेश कानुनबमोजिम प्रदेश प्रमुखबाट नियुक्ति हुने पदको पत्र प्रदेश प्रमुखको हस्ताक्षरबाट प्रमाणीकरण हुने व्यवस्था गरीएको छ । यसैगरी प्रदेश मन्त्रिपरिषद्बाट भएका निर्णय तथा नियुक्तिको प्रमाणीकरण प्रदेश सरकारको प्रमुख सचिवबाट हुनेछ ।
प्रकाशित : जेष्ठ १०, २०७५ ०९:२८