खडेरीको क्षति हेरी राहत

अन्नबाली क्षतिको विवरण संकलन हुँदै
कान्तिपुर संवाददाता

तेह्रथुम — तमोर तटीय क्षेत्रका खडेरीबाट प्रभावित किसानलाई छथर गाउँपालिकाले क्षतिका आधारमा राहत दिने भएको छ । मध्य बर्खामा समेत खडेरी लागेर अन्न बाली र फलफूल सुकेपछि किसानले गाउँपालिसँग सहयोग मागेका थिए ।

तेह्रथुमको छथर गाउँपालिका ४ फाक्चामारा सिङजेवा गाउँका किसानले लगाएको मकै बाली खडेरीले सुकेको अवस्थामा । तस्बिर : कान्तिपुर

क्षतिको विवरण संकलन गरी राहत सिफारिस गर्न गाउँपालिकाले कार्यपालिका सदस्य, सम्बन्धित वडाका जनप्रतिनिधि र सोही वडाका कर्मचारीसमेत परिचालन गरेको गाउँपालिका अध्यक्ष सन्तवीर लिम्बुले बताए ।

टोलीको सिफारिसका आधारमा पीडित किसानलाई तत्काल राहात उपलब्ध गराइने लिम्बुले बताए । मध्य वर्षामा समेत पानी नपरेपछि ओख्रे, फाक्चामारा, हमरजुङलगायत गाउँका किसान समस्यामा परेका छन् । खेतबारीमा लगाएको धान, मकै, कोदोलगायत अन्नबाली सुकेर डढेलो लाग्ने अवस्थामा पुगेको किसानको भनाइ छ ।

वडा ३ का लागि वडा सदस्यहरू फौदराज लिम्बु, सरीता बिक, इन्द्रकुमारी लिम्बु र कर्मचारी कुलबहादुर श्रेष्ठलाई क्षतिको विवरण संकलनको जिम्मा दिइएको छ । वडा ४ का लागि कार्यपालिका सदस्य विष्णुमाया थापा, वडा सदस्य पुष्प कार्की, सिर्जना सार्की र भुवनसिंह लिम्बुलाई जिम्मा दिइएको गाउँपालिका अध्यक्ष लिम्बुले बताए ।

५ नम्बर वडामा वडा सदस्य बन्दना लिम्बु, कार्यपालिका सदस्य कमला नेपाली र वडा अध्यक्ष पुण्यप्रसाद ढकाललाई क्षतिको विवरण एकिन गरी राहत सिफारिस गर्न जिम्मेवारी दिइएको छ । क्षतिको यकिन विवरण संकलन भएर गाउँपालिकामा आएपछि राहत वितरण सुरु गरिने गाउँपालिका प्रवक्ता राजन नेपालीले बताए ।

अन्नबालीबाट मात्र जीवन गुजारा गर्दै आएका पीडित किसानलाई तत्काल राहत उपलब्ध गराउने र ती क्षेत्रमा खडेरीको दीर्घकालीन समाधानका उपायसमेतको खोजी गरिने गाउँपालिकाले तयारी गरेको छ । त्यस्तै अन्य पेसा, व्यवसाय र रोजगारीमा समेत रहेका किसानका परिवारलाई भने अलग ढंगबाट राहत वितरण गरिने प्रवक्ता नेपालीले बताए ।

मकै, कोदो, फापर, गहत, जुनेलो, बदाम, धानलगायत खाद्यान्न बालीको खेती गर्दै आएका किसानको यो वर्ष पानी नपरेपछि बिजोग भएको छथर गाउँपालिका ४ फाक्चामाराका किसान दीपक लिम्बुले बताए । खडेरीले खेतबारी र जंगलमा रहेको घाँससमेत सुकेपछि चौपायालाई समस्या भएको ३ नम्बर वडा अध्यक्ष तुलसीजंग थापाले बताए ।

प्रकाशित : श्रावण २४, २०७५ ०८:३०
प्रतिक्रिया
पठाउनुहोस्

सिफारिस दस्तुर एक लाखसम्म

कान्तिपुर संवाददाता

सुनसरी — धरान उपमहानगरले सेवाग्राहीबाट लिने विभिन्न सिफारिस र अनुमति शुल्क दस्तुरको दर २० रुपैयाँदेखि १ लाखसम्म तोकेको छ । साउनदेखि नै लागू हुने गरी यस्तो शुल्क तोकिएको हो ।सवैभन्दा कम दस्तुर निवेदन फारामको २० रुपैयाँ छ ।

आर्थिक सम्पन्नले व्यक्तिगत रूपमा नगरक्षेत्र भित्र बोरिङ गरेर पानी प्रयोग गर्नेहरूमध्ये चार इन्च पाइपभन्दा सानोका लागि बोरिङ अनुमति सिफारिस ५० हजार र त्यसभन्दा बढीको अनुमतिका लागि एक लाख रुपैयासम्म दस्तुर तोकिएको छ ।

धरानमा भूमिगत पानी बोरिङ गरेर व्यक्तिगत रूपमा पानी प्रयोग गर्नेहरू आधा दर्जन छन् ।
उपमहानगरले सार्वजनिक गरेको विभिन्न दस्तुरहरूमा बंशजका आधारमा नागरिकता लिने सिफारिसमा सय रुपैयाँ तोकिएको छ । अंगिकृत नागरिकताका लागि भने हजार रुपैयाँ छ । घर नम्बर प्लेट, घरबाटो, प्रतिलिपि व्यवसाय दर्ता, व्यक्तिगत घटना दर्ता प्रतिलिपि प्रमाणिकरण लगायतको २ सय दस्तुर तोकेको छ ।

सर्जमिन, बसोबास, नामथर जन्म मिति संशोधन, जन्म मृत्यु विवाह, व्यवसाय ठाउँसारी, व्यवसाय नाम र किसिम परिवर्तन, धर्मपुत्र वा पुत्री सिफारिस, हकवाला संरक्षण, सेयरसम्बन्धी र व्यक्तिगत घटना दर्ता संशोधन, नाता प्रमाणित सिफारिसलगायतका लागि ५ सय रुपैयाँ कायम गरिएको छ ।

कुकुर दर्ता र नविकरण, संस्था दर्ता, अंग्रेजीमा सिफारिस, अविवाहित रहेको सिफारिस, मोही लागत कट्टा सिफारिस, पेन्सनकार्ड सम्बन्धी सिफारिस, एलानीमा खानेपानी वा विद्युत् जडान र नामसारीका लागि हजार रुपैयाँ दर तोकेको छ । उपमहानगरपालिकाले विटिएस टावर, थ्रीफेज विद्युत् लाइन जडान सिफारिसका लागि ५ हजार दस्तुर तोकेको छ ।

उपमहानगरले आन्तरिक आय वृद्धि गर्ने उद्देश्यले गत असारमा ११ गते बसेको तेस्रो नगरसभाले आर्थिक ऐन २०७५ पारित गरेअनुसार सिफारिस दस्तुर र राजस्वमा केही वृद्धि गरेको थियो । त्यही आधारमा उक्त सिफारिस दस्तुरमा परिवर्तन गरिएको हो ।

प्रशासकीय अधिकृत खगेन्द्र खतिवडाले साविक गाविसहरू पाँचकन्या र विष्णुपादुका समायोजना गरेपछि धरान उपमहानगरको आन्तरिक आय यो वर्ष १६ करोड पुर्‍याउने लक्ष्य राखिएको छ । यसअघिको आन्तरिक आय १० करोड ९० लाख मात्र थियो ।

प्रकाशित : श्रावण २४, २०७५ ०८:२९
पूरा पढ्नुहोस्
प्रतिक्रिया
पठाउनुहोस्