४ दशकपछि सडक

कृषि उपज बजार पुर्‍याउन सुविधा
बुढेसकालमा गाउँबाटै गाडी चढ्न पाउँदा स्थानीय खुसी
रमेशचन्द्र अधिकारी

धनकुटा — याक्ते गाउँका ७८ वर्षीय जीतबहादुर आठपहरिया घरको आँगनबाटै पहिलोपटक मोटर चढेर सदरमुकाम पुगे । आफ्नो गाउँमा मोटरबाटो आइपुग्छ भन्ने कमै आशा गरेका उनी यसरी घरआँगनबाटै गाडी चढ्न पाउँदा खुसीको सीमा नाघेको बताउँछन् ।

त्यसो त धनकुटा नगरपालिकाका घोषणा हुँदा धनकुटामा मोटर बाटो आइसकेको थिएन । ०३५ सालमा नगरपालिका बनेको दुई वर्षपछि जिल्लामा मोटरबाटोको सञ्जालले तराई जोडेको थियो । तर सदरमुकामबाट मुस्किलले चार किलोमिटर दूरीको धनकुटा नगरपालिका ८ स्थित याक्ते तथा तेत्रिदाङ गाउँमा चार दशकपछि बल्ल मोटरबाटो पुगेको छ ।


मुलुकभरमा नै धनकुटा नगरपालिका क्षेत्रमा मात्र बसोबास गर्ने आठपहरिया जाति रहेको याक्तेले दुर्गम गाउँको झझल्को दिन्छ । त्यसै गाउँमा चार महिना अघिदेखि मात्र बल्ल सवारी साधन सञ्चालनमा आएको छ । ‘मलाई यो उमेरमा घरैबाट गाडी चढेर बजार (धनकुटा सदरमुकाम) पुग्न पाइन्छ भन्ने आशै थिएन’, जीतबहादुरले भने, ‘धन्न मोटर चल्यो, अब अस्पताल जान समेत हिँड्नु नपर्ने भो ।’

Yamaha


कृषि उपज तथा फलफूल उत्पादन हुने उक्त गाउँबाट विगतमा स्थानीयले डोकोमा भारी बोकेर बजारमा बिक्री गर्न लैजान्थे । तर गाउँघरमा मोटर पुग्ने भएपछि स्थानीय केही युवाले त ढुवानी साधन खरिद गरेरै उत्पादित वस्तु बजार पुर्‍याउन थालेका छन् । व्यावसायिक रूपमा आफ्ना उत्पादन सहज रूपमा बिक्री गर्न पाउँदा दंग परेका छन् ।


स्थानीय रितेश राई आठपहरियाले आफ्नै लगानीमा पिकअप गाडी खरिद गरेर उत्पादित वस्तु बजार पुर्‍याउन थालेको बताए । गालेभेडा, सरिफा, भुइँकटहर लगायतका वस्तु उनले बजारसम्म ढुवानी गर्दै आएको जानकारी दिए । ‘अब त हामी पनि सुगमबासी भएका छौं’, उनले भने, ‘सदरमुकाम नजिक रहेर पनि वर्षौं ओझेल परेको गाउँ अब विकास हुने आशा पलाएको छ ।’


नगरपालिकाले धनकुटा ७ स्थित बस पार्कदेखि घुमाउने चौतारा, टेकुनाला, याक्ते, सान्ताङ लगायतका स्थानमा चक्रपथ निर्माणको योजना अनुसार सडक सञ्जालले जोडेको नगर प्रमुख चिन्तन तामाङको भनाइ छ । खासगरी कृषि उत्पादन बजारसम्म पुर्‍याउन र स्थानीयलाई सहज यातायातको लागि नगरपालिकाले सडक निर्माण गरेको उनको भनाइ छ ।


आर्थिक वर्ष ०७४/०७५ मा २१ लाख रकम विनियोजन गरेर सडक निर्माण गरिएको नगरपालिकाले जनाएको छ । उक्त गाउँमा सार्वजनिक नियमित सवारी साधन भने सञ्चालनमा आएका छैनन् । तर रिजर्भ गरेका टेम्पो, भेन तथा अन्य सवारी साधन पनि गाउँमा सहज पुग्न थालेपछि आवतजावतमा सजिलो भएको स्थानीय प्रेमिका राई बताउँछिन् । याक्तेमा २० र नजिकको अर्को गाउँ तेत्रेदाङमा १८ घरपरिवारको बसोबास छ । ती गाउँमा अल्पसंख्यक आठपहरिया जाति बसोबास गर्छन् । गाडी बाटो नपुग्दा स्थानीयले कम्तीमा दुई घण्टा बढी समय पैदल हिँडेर बजार पुग्ने गरेका थिए । ०६८ सालमा तत्कालीन कार्यकारी अधिकृत महेन्द्रकुमार खाम्याहाङको पालामा उक्त गाउँ भएर सान्ताङ हुँदै धनकुटा बजारसम्म चक्र पथ निर्माण गरिने योजना अघि सारिएको थियो । तर जननिर्वाचित पदाधिकारीबाट सडकको पूर्णता पाएको नगरपालिका स्रोतले जनाएको छ ।


केही वर्ष अघिदेखि बिजुली बल्न थालेसँगै सडक सञ्जालले जोडिएपछि राहतको महसुस गरेको स्थानीय ७४ वर्षीय वृद्धिमाया राईले बताइन् । नगर क्षेत्रमा उक्त गाउँमा सडक पुगेसँगै अब अधिकांश गाउँबस्ती सडक सञ्जालले जोडिएका छन् ।

प्रकाशित : भाद्र १५, २०७५ ११:१३
ADVERTISEMENT
प्रतिक्रिया
पठाउनुहोस्

सशस्त्र प्रहरी काठ तस्करी प्रकरण : अनुसन्धान अन्तिम चरणमा 

चार मध्ये तीन जना नियन्त्रणमा 
रमेशचन्द्र अधिकारी

धनकुटा — तत्कालीन सशस्त्र प्रहरी बल अरुण गुल्म (हालको ४ नम्बर गुल्म) संखुवासभा चैनपुरको सवारी साधनमा सखुवाको काठ तस्करी प्रकरणकाे अनुसन्धान अन्तिम चरणमा पुगेको छ ।

काठ तस्करीमा प्रयोग गरिएको सशस्त्र प्रहरी चैनपुरको बा १ ग १६६९ नम्बरकाे ट्रक धनकुटा डिभिजन वन कार्यालयमा नियन्त्रणमा राखिएको अवस्थामा  । तस्बिर : रमेशचन्द्र अधिकारी / कान्तिपुर 

गत जेठमा सशस्त्रको बा १ ग १६६९ नम्बरको ट्रकमा राखेर लैँजादै गरेको सखुवाको काठ तस्करी प्रकरण तीन महिनाको अनुसन्धानपछि अन्तिम चरणमा पुगेको स्रोतले जनाएको छ।

हालसम्म वन कार्यालय, अख्तियार दुरुपयोग अनुसन्धान आयोग, सशस्त्र प्रहरीको छानबिन समिति र गृह मन्त्रालय गरी चार निकायबाट घटनाबारे अनुसन्धान तथा छानबिन समिति गठन गरिएका छन्। जसमध्ये डिभिजन बन कार्यालय धनकुटाले शिवशंकर ठाकुरको नेतृत्वमा गठन गरेको अनुसन्धान टोलीले गहिराइमा पुगेर घटनाबारे छानविन गरिरहेको जनाइएको छ।

घटनामा संलग्न ‘मुख्य व्यक्ति’ भनिएका सशस्त्र प्रहरी चैनपुरका तत्कालीन डिएसपी रामप्रसाद भण्डारीलाई निलम्बन गरिएको थियो। यसैबिच उनलाई गृह मन्त्रालयले सरकारी सेवामा भविष्यमा अयोग्य नठहरिने गरी बर्खास्त गरेको स्रोतले जनाएको छ।

घटनामा संलग्न भएको भनिएका चार जना मध्ये तीन जना सम्पर्कमा आइसकेको वन कार्यालय स्रोतले जनाएको छ। ती मध्ये चालक प्रहरी जवान दिपेन्द्रकुमार कर्मकार गत साउन २३ मा पक्राउ परेका छन्। प्रहरी जवान विनोद कट्टेल र मिलनकुमार राई सोमबार (भदौ ११) मा वन कार्यालयमा हाजिर भएका छन्।

मुख्य अभियुक्त भनिएका सशस्त्र प्रहरी नायब उपरीक्षक भण्डारी वनको अनुसन्धान टोलीको सम्पर्कमा आएका छैनन्। उनलाई हाजिर हुन सात दिनको म्यादसहित पत्राचार गरिएपनि हालसम्म सम्पर्कमा नआएको जनाइएको छ। यसैबिच गत भदौ ५ गते सशस्त्र प्रहरीको बाहिनी तथा गृह मन्त्रालयमा इमेलमार्फत भण्डारीलाई हाजिर हुन पत्रचार गरिएको अनुसन्धान अधिकृत ठाकुरले जानकारी दिए।

‘हामी घटनाको अनुसन्धानको अन्तिम अवस्थामा पुगेका छौं,’ उनले भने, ‘एउटै घटनामा चार वटा निकायबाट छानबिन समिति गठन गरिएकाले किनारामा पुग्न केही ढिलाई भएको हो।’ सोमबार सम्पर्कमा आएका राई र कट्टेलले घर बिदामा जानेक्रममा तस्करीमा प्रयोग गरिएको सवारी साधनमा रहेको बयान दिएका छन्।

यसैगरी डिभिजन वनका प्रमुख कृष्णप्रसाद वस्तीले पनि अनुसन्धान अन्तिम चरणमा पुगेको जनाएका छन्। उक्त घटनामा संलग्न चार मध्ये तीन जना सम्पर्कमा आएको र मुख्य व्यक्ति डिएसपी भण्डारीमात्र हाजिर हुन बाँकी रहेको उनले बताए। तस्करीमा प्रयोग गरिएको बा १ ग १६६९ नंबरको ट्रक डिभिजन वन कार्यालयले नियन्त्रणमा लिएको छ।

उनले चैनपुरको सिस्ने सामुदायिक वनले सशस्त्रको टहरा बनाउन उपलब्ध गराएको भनिएको काठ संखुवासभा, तेह्रथुम र धनकुटाका सुरक्षा पोष्ट पार गर्दै धनकुटाको मुलघाट पुग्नेक्रममा गत जेठमा नियन्त्रणमा लिइएको थियो।

सशस्त्रको ट्रकमा राखेर धनकुटाहुँदै विराटनगरतर्फ करिब सात लाख मुल्य पर्ने एक सय क्वीविक फिट बढी सखुवाका काठ तस्करी गरिएको थियो। अन्य जिल्लामा निकासी प्रतिबन्धित सखुवाको काठ भेटिएपछि सशस्त्रको मुलघाटस्थित चेक पोष्टले नियन्त्रणमा लिएको थियो। सशस्त्र प्रहरी बल अरुण गुल्मको सवारी साधनमा अवैध रुपमा सखुवाको काठ तस्करी गरिएकोबारे तत्काल सशस्त्र प्रहरी बल पकलीस्थित वाहिनीका एसपी गुणाकर खनालको संयोजकत्वमा तीन सदस्य छानबिन समिति गठन गरिएको थियो।

प्रकाशित : भाद्र १२, २०७५ १२:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT