राधाकृष्ण रथायात्रामा हजारौं सहभागी

देवनारायण साह

मोरङ — सबै समुदायको बृहत् सहभागितामा सोमबार यहाँ राधाकृष्ण रथयात्रा धुमधामसाथ सम्पन्न भएको छ । आधा शताब्दी पुगेको ऐतिहासिक रथयात्रा समुदायबीच सदभावको पर्वका रूपमा स्थापित भएको छ ।

विराटनगरस्थित राधाकृष्ण मन्दिर ५० वर्ष पुगेको उपलक्ष्यमा आयोजित रथ यात्राका सहभागीहरू । तस्बिर : देवनारायण

रथ तान्न सबै समुदायका प्रतिनिधिको सहभागिता थियो । रथयात्रा अवलोकन गर्न मोरङ, सुनसरी, झापालगायत जिल्ला र भारतको बिहारबाट पनि हजारौं आएका थिए ।

हिन्दु, मुस्लिम, सिख, इसाई धर्मावलम्बी समेत रथयात्रा अवलोकन गर्न दिउँसो २ बजेदेखि ८ बजेसम्म लामबद्ध थिए । सुनसरीको हरिनगराबाट मोहम्मद अमिरुद्दीन अन्सारी परिवारसहित आएका थिए ।

Yamaha

यस अवसरमा यहाँका हरेक जातजातिको संस्कृति झल्किने झाँकी, लोकनृत्य, प्रदेश १ प्रहरीको ब्यान्ड प्रस्तुत गरिएको थियो । भारतबाट ल्याइएको घोडाले तान्ने बग्गी आकर्षण बनेको थियो ।


५१ औं रथयात्राको प्रदेश १ का मुख्यमन्त्री शेरधन राईले विशेष पूजा गरी उद्घाटन गरेका थिए । उनले १ लाख १ हजार राशिको पोखरमल धर्मसंस्कृति पुरस्कार विराटनगर ३ स्थित परोपकार अभियान समूहलाई प्रदान गरे ।

उक्त पुरस्कार प्रत्येक वर्ष रथयात्राका अवसरमा १२ वर्षदेखि निरन्तर स्थानीय उद्योगी राठी परिवारले प्रदान गर्दै आएको छ । रथयात्रा ४ बजे तीनपैनीस्थित राधाकृष्ण मन्दिरबाट सुरु भई मेनरोड हुँदै महेन्द्र चोक, धरान रोड, बरगाछीबाट पुन: मन्दिर परिसरसम्म ७ किलोमिटर दूरी ४ घण्टा ३० मिनेटमा तय गरी आइपुगेको थियो ।

रथको अग्र भागको दुबैपट्टि ७५ फिट लामो रथ तान्ने लठा दायाँतर्फको पुरुषले र बायाँतर्फको महिलाले तानेर रथयात्रा गरिएको थियो । १९८८ सालमा राधारकृष्ण मन्दिरको स्थापना भएदेखि खट यात्राबाट सुरु भएर २०२५ सालदेखि रथयात्राको निर्माण गरी कृष्णजन्माष्टमीको भोलिपल्ट राधाकृष्णको प्रतिमा राखेर रथयात्रा निकाल्ने परम्परा छ ।

प्रकाशित : भाद्र १९, २०७५ ०९:५२
ADVERTISEMENT
ADVERTISEMENT
प्रतिक्रिया
पठाउनुहोस्

महानगर जलमग्न

देवनारायण साह

मोरङ — प्रदेश १ को अस्थायी राजधानी रहेको विराटनगर महानगरपालिकामा व्यवस्थित निकास नहुँदा बुधबार राति परेको पानीले जलमग्न भएको छ । पानीले महानगरका अधिकांश सडक, पसल, बजार, विद्यालय, क्याम्पस, उद्योग, कलकारखानालगायत टोलबस्ती डुबानमा परेका छन् ।

सडकमा जमेको पानी स्थानीयको पसल र घरमासमेत पसेको छ । महानगरमा चौतर्फी एकसाथ भइरहेको सडक ढल निर्माणका कारण पानीको निकास बन्द हुँदा डुबान भएको हो । विराटनगर ३ का कुसुम रेग्मीले महानगरले वर्षाको पानीको निकास नभएर डुबानमा परेको गुनासो पोखिन् । ‘डुबानका कारण यहाँका अधिकांश विद्यालयको पठनपाठन डप्प भएको छ,’ उनले भनिन्, ‘महानगरले विकास निर्माणको नाममा जथाभावी सडक बाटो खनेर पानीको निकास बन्द गरेकाले डुबान भएको हो ।’ मोरङका प्रहरी प्रमुख मनोजकुमार केसीले वर्षाको पानीको निकास नभएर केही ठाउँमा पानी जमेको र त्यसलाई निकास दिने काम भइरहेको बताए । उनले सिंघिया खोला आएको बाढी विराटनगर ८ मधुमारास्थित सुकुम्बासी बस्तीमा पसेपछि २० घरपरिवार विस्थापित भएका छन् ।


मधुमारास्थित सिंघिया खोला क्षेत्रमा लामो समयदेखि सुकुम्बासी घरटहर बनाएर बस्दै आएका थिए । बस्तीमा खोलाको पानी पसेर डुवान भएपछि उनीहरूलाई सुरक्षित स्थानमा स्तान्तरण गरिएको छ । परिवर्तनका लागि हातेमालो संस्थाले डुबानमा परेका परिवारलाई तत्कालका लागि त्रिपालको अस्थायी टहरा निर्माण गरिदिएको छ ।


संस्थाका वरिष्ठ उपाध्यक्ष राम पोखरेलले खोलाको पानी बस्तीमा पसी डुबान भएपछि उनीहरूलाई सुरक्षित स्थानमा स्तान्तरण गरेको बताए । उनीहरूलाई बस्ती नजिकैको खुला चौरमा स्थानान्तरण गरिएको छ । सुकुम्बासी बस्तीमा बसोबास गरिरहेका ३० घर परिवारमध्ये २० घरमा बाढी पसेको हो । जिल्ला प्रहरी कार्यालयका प्रहरी उपरीक्षक मनोज केसीले सिंघिया खोलाको बाढी बस्तीमा डुबान भएको जानकारी आएकाले डुबान क्षेत्रमा प्रहरी परिचालन गरेको र पानीको निकासको काम भइरहेको बताए ।


विराटनगर ४ स्थित कन्यामार्ग, रेग्मी टोलको सडकमा दुई फिटसम्म पानी जमेर सवारी साधन आवागमनमा स्थानीयले रोक लगाएको छ । उक्त मार्गमा सम्भावित दुर्घटनालाई मध्यनजर गरी सवारी आवागमनमा रोक लगाएको हो । पानीको निकास नहुँदा पुसेट कलेजसमेत जलमग्न भएको हो ।


महानगरमा मझौला सहर एकीकृत विकास, क्षेत्रीय सहरी विकास र सघन सहरी विकास परियोजनाअन्तर्गत सडक, नाला, ढललगायतको विकास निर्माणको काम एक साथ भइरहेकाले जताततै सडक बाटो खनिएको अवस्था छ । यस्तै, विराटनगरसँग जोडिएको बुढीगंगा गाउँपालिकास्थित आरती स्ट्रिप्सलगायतका उद्योग, विद्यालय, सर्वसाधारणको घर डुबानमा परेको छ ।

प्रकाशित : भाद्र १५, २०७५ ११:१३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT