पारि तर्‍यो दसैं बजार

विनोद भण्डारी

विराटनगर — सीमावर्ती जोगबनी बजारका कारण विराटनगरको व्यापार प्रभावित हुने क्रम रोकिएको छैन । मुख्य पर्व होस् वा अन्य सिजनमा यताका ग्राहक पारि पुग्ने गर्छन् । तुलनात्मक रूपमा कपडा, खाद्यान्न र दैनिक उपभोग्य वस्तु सस्तो पाइने भन्दै उपभोक्ता सीमापारिको बजार जाने गरेका हुन् ।

स्थानीय उत्पादनबाहेक प्राय: सबै उपभोग्य वस्तु पारिबाटै भन्सार र भ्याट तिरेर आयात हुन्छ । ‘त्यही भन्सार मूल्य र भ्याटका कारण विराटनगरमा भन्दा जोगबनीमा उपभोग्य वस्तुको मूल्य फरक छ,’ मोरङ व्यापार संघका अध्यक्ष पवनकुमार सारडा भन्छन्, ‘त्यसैले यताका ग्राहक उता जानु स्वाभाविक हो ।’

दसैंमा खासगरी कपडा, जिरा, चिनी, तोरी तेल र खाद्यान्नको कारोबार बढी हुन्छ । ‘ती सामानको खरिद–बिक्री विराटनगरमा छँदै छैन भन्दा पनि हुन्छ,’ सारडाले भने, ‘तिनै सामान किन्न उपभोक्ता सीमापारि पुगेपछि यहाँका पसलमा साहुमात्र भेटिन्छन् ।’

उनका अनुसार विराटनगर बजारमा दसैंको नाममा सुन चाँदी, विद्युतीय सामान र सवारीका साधनको खरिद–बिक्री मात्र भइरहेको छ । अम्बिका वस्त्रालयका अम्बिका अग्रवालका अनुसार गाउँबाट बूढापाका आएर दसैंमा कपडा किन्थे । अहिले किनमेलमा युवा पुस्ता सक्रिय छन् । उनीहरू नै पारि पुगेपछि स्थानीय बजारमा चहलपहल घटेको छ ।

जोगबनीमा सस्तोमा उपभोग्य वस्तु पाइने बहानामा स्थानीय ग्राहक सीमापारि पुग्दा विराटनगरको व्यापार सुस्ताउँदै गएको कपडा व्यवसायी संघका कावा अध्यक्ष नन्दु जाजुको बुझाइ छ । दसैंमा विराटनगरमा दैनिक सरदर १० करोड रुपैयाँको व्यापार हुनुपर्ने हो । ‘तर अहिले सरदर डेढ करोडको व्यापार पनि छैन । मोरङ व्यापार संघका वरिष्ठ उपाध्यक्ष प्रकाश मुण्दडाले भने ‘खुला सिमाना र जोगबनी बजारको आकर्षणले विराटनगर सुक्यो ।’

कपडामा १५ प्रतिशत भन्सार शुल्क र १३ प्रतिशत भ्याटका कारण विराटनगर बजार पछि परेको उनको बुझाइ छ । जोगबनी बजारबाट दसैंको नाममा यसबेला दैनिक सरदर ५ करोडभन्दा बढी मूल्यका सामान उपभोक्तामार्फत भित्रिने गरेको मुन्दडाको अनुमान छ । विराटनगरमा यसबेला सुन, विद्युतीय सामान र सावरी साधनको बिक्री बढ्दो छ । लगनको सिजनबाहेक अन्य दिनमा सरदर एक किलो सुनको व्यापार हुन्थ्यो ।

सुनचाँदी व्यवसायी संघका अध्यक्ष गणेश भगतले भने अहिले दसैंको नाममा दैनिक सरदर आढईदेखि तीन किलोसम्म सुनको कारोबार भइरहेको छ । उनका अनुसार दसैंको नाममा विराटनगरमा अहिले दैनिक डेढ करोड मूल्य बराबरको सुनको कारोबार भइरहेको छ ।

त्यसैगरी यसबेला यहाँ सवारी साधनको बिक्री पनि बढेको सम्बद्ध व्यवसायीको भनाइ छ । जग्गाको कारोबार घटेसँगै सवारी साधनको खरिद–बिक्री घटेको थियो । तर दसैंको नाममा बिक्री सुरु भएको छ । अटोमोबाइल्स एसोसिएसन मोरङका उपाध्यक्ष सुवास आचार्यका अनुसार दसैं र तिहारमा विराटनगरमा एक अर्बभन्दा बढी मूल्यमा २ हजार पिस मोटर साइकल र २ सय पिस चार चक्के बिक्री हुने अनुमान छ ।

विराटनगर बजारमा यसबेला टेलिभिजन, फ्रिज, वासिङ मेसिन र ओभनको बिक्री पनि ह्वात्तै बढेको छ । दसैंमा मात्र करिब २० लाख मूल्य बराबरका यस्ता सामान बिक्री हुने लक्ष्य छ । सम्बद्ध व्यवसायी अजय गिरीले भने, ‘दसैं र तिहारमा विराटनगरमा करिब ४ करोड मूल्य बराबरका वासिङ मेसिन, ओभन र फ्रिज बिक्री हुने अनुमान छ ।

Yamaha

प्रकाशित : आश्विन २५, २०७५ ०९:०३
ADVERTISEMENT
प्रतिक्रिया
पठाउनुहोस्
ADVERTISEMENT

भोजपुरका २२ वडा ‘अलैंची जोन’

कान्तिपुर संवाददाता

भाेजपुर — खेती विस्तार गर्दै कृषकले उत्पादन गरेको अलैंचीको बजार व्यावस्थापन र भण्डारण गर्ने लक्ष्यले अलैंची जोन कार्यक्रम ल्याइने भएको छ । कृषि विकास कार्यालयका अनुसार जिल्लाका नौवटा स्थानीय तहमध्ये चार स्थानीय तहका २२ वडामा कार्यक्रम लागू हुनेछ  ।

भोजपुरको टेम्के मैयुङ गाउँपालिका २ का किसान अलैंचीका बेर्ना गोड्दै । तस्बिर : एलिसा/कान्तिपुर

अलैंची जोन क्षेत्र निर्धारणका लागि केन्द्रीय स्थलगत प्राविधिक, कषि प्राविधिक र सरोकारवालाको संयुक्त बैठकले यस्तो निर्णय गरेको थियो । कार्यक्रम स्वीकृत भए पनि ती वडाहरूमा क्षेत्र निर्धारणका लागि केन्द्रमा सिफारिस पठाइएको कार्यालयले जनाएको छ ।


क्षेत्रको कार्यालय स्थापनाका लागि कृषिमन्त्रीको उपस्थितिमा सम्पन्न बैठकबाट सिफारिस स्वीकृत भएर आएपछि मात्र उक्त काम सुरु हुने कार्यालयका सूचना अधिकारी युकमणि भट्टराईले बताए । जिल्लाको कुल ३ सय ६० हेक्टर भन्दा बढी क्षेत्रफलमा लगाइने अलैंचीका लागि भोजपुुर, बोखिम, सिद्धेश्वर, गुप्तेश्वर, भैंसीपंखा, हेलौंछा, दोभाने, खावा, ओख्रे, तिम्मा, श्यामशिला, षडनन्द नगरपालिका क्षेत्र, कोट, चम्पे बोया, गोगने, खार्ताम्छा, कुदाककाउले, किमालुङ, आम्तेकलाई पकेट क्षेत्र मानिन्छ ।

प्रधानमन्त्री कृषि आधुनिकीकरण परियोजना व्यवस्थापन इकाइ खुमलटार ललितपुरको बैठकबाट भोजपुर नगरपालिकाको १ र २, गुप्तेश्वरको ३, सिद्धेश्वरको ४, बोखिमको ५, पोखरेको ५, काउलेको ९, भौसीपंखा १० र आम्तेकको १ मा अलौची जोन क्षेत्र लागू गर्ने निर्णय गरिएको हो । यस्तै षडानन्द नगरपालिकाको ९, किमालुङको १०, साङपाङको १३ , टेम्केमैयुङ गाउापालिकाको १, २, ३, ४, ५, ७, ८, ९, रामप्रसाद राई गाउँपालिकाको १, ओख्रे र अरुण गाउँपालिकाको २, चम्पेगरी जिल्लाका ८१ वटा वडामध्ये २२ मा अलैंची जोन कार्यक्रम लागू गरिने परियोजनाका वरिष्ठ कृषि इन्जिनियर सरोज अधिकारीले जानकारी दिए ।

केन्द्रबाटै प्राविधिक आएर उक्त क्षेत्रको स्थलगत अनुगमनपश्चात् उक्त स्थानहरूमा अलौची जोन कार्यक्रम गरिने भएको हो । गतवर्ष जिल्लाबाट कुल एक सय ९२ टन अलैंची निर्यात गरिएको थियो । ३ वर्षअघि मात्र प्रतिमन १ लाख ३० हजारसम्म बिक्री भएको अलौचीको मुल्य यो वर्ष प्रतिमन २७ हजारमा बिक्री भएको साबिक कृषि विकास कार्यालयले जनाएको छ । अलैंचीको भाउमा आएको भारी गिरावट र अलैंचीमा लाग्ने रोग र बाादर आतंकले गर्दा किसान झन् मारमा पर्ने गरेका छन् । भोजपुरमा रामसई, गोलसई र डम्बरसई जातका अलैंची खेती लगाइन्छ ।

प्रकाशित : आश्विन २५, २०७५ ०९:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT