महानगरमा ‘फाउन्टेन इको पार्क’

कान्तिपुर संवाददाता

मोरङ — विराटनगरमा दसैंको अवसर पारेर फाउन्टेन इको पार्क सर्वसाधारणका लागि खुला गरिएको छ  । महानगराभित्र कतै घुम्ने रमनीय स्थल नभएको अवस्थामा यो पार्कमा महानगरवासी रमाउन थालेका छन्  ।

मोरङ व्यापार संघसँगको सार्वजनिक निजी साझेदारी मोडेलमा विराटनगर महानगरपालिकाले निर्माण गरेको फाउन्टेन इको पार्क । तस्बिर : देवनारायण साह/कान्तिपुर

पार्कको महानगर प्रमुख भीम पराजुलीले उद्घाटन गरेपछि सर्वसाधारणका लागि खुला गरिएको हो । महानगर र मोरङ व्यापार संघले सार्वजनिक निजी साझेदारी मोडेलमा पार्क निर्माण गरेको हो ।

वीरेन्द्रसभा गृहसँगै जोडिएको दक्षिणपट्टिको करिब ५ कठ्ठा जग्गामा पार्क निर्माण गरिएको छ । मुख्य बजारमा रहेको पार्क सर्वसाधारणका लागि खुला गरिएपछि आइतबार दिनभर भरिभराउ रहयो ।

पार्कबाहिर प्रवेशद्वारमा फाउण्टेन इको पार्क लेखिएको माथि पानी निस्किरहेको रमाइलो दृश्यले बाटो हिँड्नेलाई पनि आकर्षित गर्छ । पार्कभित्र प्रवेश गरेपछि गाग्रोबाट पानी झर्दै गरेको दृश्य हेर्दै अघि बढ्ने व्यवस्था मिलाइएको छ । पार्कको बीच भागमा चारैतिरबाट पानीको फोहरा त्यसको मध्यमा नागको फनामुनी रहेको देवीको मूर्तिमा पर्दै गरेको रमणीय दृश्य निर्माण गरिएको छ ।

पार्कको प्रवेशद्वारा र मूर्तिबीचमा दायाँबायाँतर्फ विभिन्न रंगको पानीको फोहरा र त्यसको दायाँबायाँ आकर्षक डिजाइनमा बसाइ व्यवस्थापन गरिएको बगैंचा पार्कभित्र निर्माण गरिएको छ । पार्कको पूर्वोत्तर कुनाको बगैंचामा कलात्मक दुईवटा पुल तरेपछि भित्तामा बनाइएका विभिन्न जनाबरको मुखबाट पानी निस्कदै गरेका आकर्षक धारा छन् ।

दक्षिणपूर्व कुनाको बगैंचाभित्र कलात्मक रूपमा गाग्रोबाट पानी निस्कँदै गरेको देख्न पाइन्छ । आगन्तुकलाई खानपिनका लागि पार्कको पूर्वपट्टि क्यान्टिन छ । पार्कको चारैतिर बालबालिकालाई लक्षित गरी मूर्तिहरू बनाइएको छ । सार्वजनिक निजी साझेदारी मोडेलमा महानगरले ८५ र व्यापार संघले १५ प्रतिशत लगानी गरेर १ करोड ८४ लाख ७ हजार रुपैयाँ खर्चेर पार्क बनाइएको हो ।

महानगरका इञ्जिनियर अनिल सिंहले पार्कभित्र बालबालिकालाई रमाउने संरचना निर्माण गर्न अझै धेरै काम बाँकी रहेको बताए । ‘सर्वसाधारणका लागि पार्क खुला गरिए पनि बालबालिकालाई रमाउने संरचना अझै निर्माण गर्न बाँकी छ,’ उनले भने, ‘चाँडै पार्कलाई बालमैत्री बनाउने काम हुन्छ ।’

तत्कालीन उपमहानगरले व्यापार संघसँग २०६९ साउन ४ मा पार्क निर्माणका लागि सम्झौता गरेको थियो । दुई वर्षभित्र पार्क निर्माण गर्ने सम्झौता गरे पनि संघले ५ वर्ष लगाएर पनि पूर्ण रूपमा निर्माण कार्य सम्पन्न गर्न सकेको छैन ।

मोरङ व्यापार संघका अध्यक्ष पवन शारडाले तत्काल बाँकी कार्य पूरा गरेर पार्कलाई पूर्णता दिइने बताए । उनले तीन वर्षसम्म पार्क सञ्चालन गरेर भएको आम्दानीले अझै व्यवस्थित र आकर्षण थपिने जनाए । महानगरले पार्क सञ्चालनको जिम्मा व्यापार संघलाई तीन वर्षका लागि दिएको छ । संघले प्रतिव्यक्ति ३० रुपैयाँ पार्क प्रवेश शुल्क निर्धारण गरेको छ ।

प्रकाशित : आश्विन २९, २०७५ ०९:५०
प्रतिक्रिया
पठाउनुहोस्

कर उठाउन साझेदारी

रमेशकुमार पौडेल

चितवन — भरतपुर महानगरपालिकाले चितवन उद्योग वाणिज्य संघ ९उवा संघ० सँग मिलेर व्यवसाय कर उठाउने भएको छ  ।

भरतपुर महानगरपालिकाद्वारा आइतबार आयोजित कार्यक्रममा महानगरले लिने करका विषयमा कुरा गर्दै मेयर रेनु दाहाल । तस्बिरः कान्तिपुर

दसैंलगायतका पर्वहरूको शुभकामना दिन आइतबार महानगरपालिकाले आयोजना गरेको पत्रकार सम्मेलनमा मेयर रेनु दाहालले व्यवसाय कर उठाएबापत उवा संघले पाँच प्रतिशत रकम अनुदान पाउने जनाइन् । त्यसरी पाएको रकम महानगरको सर्तअनुसार खर्च गर्नुपर्ने उनले बताइन् ।

भरतपुर महानगरपालिकाले चालु आर्थिक वर्षमा ५५ करोड रुपैयाँ राजस्व उठाउने लक्ष्य राखेको मेयर दाहालले बताइन् । साउनयता असोज २६ गतेसम्म ८ करोड ५२ लाख ९३ हजार रुपैयाँ संकलन भइसकेको छ । यो अवधिमा खासै ठूलो मात्रामा राजस्व संकलन हुँदैन ।

त्यसैले यो पनि सन्तोषजनक भएको उनको भनाइ छ । कुल राजस्वमध्ये व्यवसाय करबाट १० करोड रुपैयाँ उठाउने यो वर्षको लक्ष्य छ ।

‘कर प्रणालीलाई वैज्ञानिक बनाउन र कर संकलन प्रक्रियालाई प्रभावकारी बनाउन महानगरले चितवन उद्योग वाणिज्य संघसँग सम्झौता गरेको छ’ मेयर रेनु दाहालले भनिन् । शुक्रबार मात्रै उवा संघसँग सम्झौता भएको थियो ।

चितवन उद्योग वाणिज्य संघका अध्यक्ष सहनलाल प्रधानले यस्तो सहकार्य ५७ सालबाट सुरुवात भएको थियो । जुन ६६ सालसम्म चलेको थियो ।

‘स्थानीय निकाय र व्यावसायिक संस्थाबीच सहकार्य भएर कर संकलन गर्ने काम त्यो बेला नेपालमा अन्यत्र भएको थिएन तर भरतपुरमा सुरु भएको थियो ।

यो काम नमुनायोग्य भनेर उद्योग वाणिज्य संघ सञ्चालन गरेको यो परियोजना विश्व चेम्बर सम्मेलनको प्रतिस्पर्धामा पुरस्कृत पनि भएको थियो,’ उवा संघ अध्यक्ष सहनलाल प्रधानले भने । ०६६ सालयता रोकिएको यो काम फेरि सुरु भएको हो ।

महानगरले गत वर्ष करको दर र दायरा दुवै बढाएको थियो । त्यो बेलामा ठूलो विरोध त भएन तर व्यवसायीहरूले पुनरावलोकनको माग गरेका थिए । महानगरकी मेयर दाहालले श्रेणी निर्धारण गरेर कर लिएको र व्यापारी आफंैले श्रेणीको घोषणा गर्न सक्ने सुविधा महानगरले दिएको बताइन् ।

प्रकाशित : आश्विन २९, २०७५ ०९:४९
पूरा पढ्नुहोस्
प्रतिक्रिया
पठाउनुहोस्