विराटनगरमा ४ अर्बमा भ्यूटावर बन्ने
विराटनगर — करिब ४ अर्ब रुपैयाँ लगानीमा विराटनगर महानगरपालिका-३ मा ‘भ्यूटावर’ बनाइने भएको छ।टावरको उचाई १ सय १० मिटर हुने जनाइएको छ।
संघीय मामिला तथा सामान्य प्रशासन मन्त्री लालबाबु पण्डित,प्रदेश १ का कार्यबाहक मूख्यमन्त्री हिक्मत कार्की,सामाजिक विकासमन्त्री जीवन घिमिरे र महानगर प्रमुख भीम पराजुलीले भ्यूटावर निर्माणस्थल आइतबार शिलान्यास गर्दै चार वर्षभित्रमा निर्माण सम्पन्न हुने आश्वासन दिए ।
भ्यू टावर निर्माणका लागि संघीय सरकार,प्रदेश सरकार,विराटनगर महानगरपालिका,मोरङ व्यापार संघ,उद्योग संगठन,उद्योग वाणिज्य महासंघ प्रदेश १,नागरिक समाज र सर्वसाधारणको बास्केट फण्ड बन्ने महानगर प्रमुख पराजुलीले बताए ।
महानगरको १ विघा ७ कठ्ठा क्षेत्रफलमा एकसय १० मिटर अग्लो भ्यूटावर निर्माण हुने र त्यसको पूर्ण डिपिआर निर्माण सुरु भएको पराजुलीले जनाए । टावरमा राजबंशी समुदायको संग्रहालय, विजनेश कम्प्लेक्स, रिक्रेशन सेन्टर, डिपार्टमेन्ट स्टल, रेष्टुरेन्ट र प्रर्दशनी केन्द्र रहने पराजुलीले बताए ।
प्रकाशित : कार्तिक १८, २०७५ १७:१७
