धान उठाउने चटारो

धान पाकेर औलदेखि लेकसम्मै पहेंलापुर देखिएको छ । कृषि प्राविधिकका अनुसार बाली उठाउने बेला कात्तिकदेखि मंसिरसम्मै हो । मंसिर १५ सम्ममा अधिकांश किसानले खलोमा पुर्‍याइसकेका हुन्छन् । जिल्लामा १७ देखि १८ हजार टनको हाराहारी धान उत्पादन हुने गरेको छ ।

सिञ्चित क्षेत्रमा ९ हजार, असिञ्चितमा ८ हजार र चैते धान वार्षिक दुई सय टनको हाराहारीमा उत्पादन हुने कृषि कार्यालयको तथ्यांकमा उल्लेख छ । मूल्यका हिसाबले ७५ करोड रुपैयाँ हाराहारीमा धान उत्पादन हुने गरेको छ ।

सिञ्चित, असिञ्चित र चैते गरेर ११ हजार हेक्टरमा धान खेती हुन्छ । सिञ्चितको तुलनामा असिञ्चित जमिन धेरै रहेको कृषिको तथ्यांकमा उल्लेख छ । फक्तालुङ गाउँपालिका ७ ओलाङचुङगोलाबाहेक बाँकी सबै वडामा धेर, थोर धान खेती हुने गरेको छ ।

जिल्लामा एक नगरपालिका आठ गाउँपालिका र ६१ वडा रहेको छ । पूर्वको सिनाम, थुम्बेदिन, आम्बेगुदिन, पश्चिमको खोक्लिङ, साँघु र दक्षिणको निगुरादिन फूलबारीलाई धान उत्पादनको राम्रो क्षेत्र मानिन्छ । यहाँ उत्पादित धानले भने छ महिना पनि खान नपुग्ने तथ्यांकमा उल्लेख छ ।

जिल्लामा झापाको बिर्तामोड भएर चामल आउने गरेको छ । मोटरबाटोको पहुँच नहुँदासम्म खाद्य सामग्री संस्थानले चामल बिक्रीवितरण गरेको थियो ।