३ उद्योगका मजदुर धर्नामा

शंकर आचार्य

पर्सा — पर्सा बारा औद्योगिक करिडोरका ३ उद्योगका मजदुर धर्नामा बसेका छन् । तनुष टेक्सटाइल्स इन्डष्ट्रिज प्रालि लिपनीमाल, शुभलक्ष्मी मेटल इन्डष्ट्रिज जीतपुर र आदर्श पोलिमर्स उद्योग वीरगन्जका मजदुर विभिन्न माग राखी धर्नामा बसेका हुन् ।

श्रम कार्यालय वीरगन्जका प्रमुख राधेश्याम झाका अनुसार वैशाख १६ देखि तनुष टेक्सटाइल्सका मजदुर उद्योगको मूल गेटमा धर्ना बसेका छन् । उद्योगस्थित जुट गार्मेन्ट, कार्पेट र टेक्सटाइल्स मजदुर युनियनको आहानमा उद्योगका ३४ मजदुर काम ठप्प पारी धर्नामा बसेका हुन् ।

पद बढुवा, जीवन बिमा, बोनस, पेस्की, पिकनिक खर्च आदिको माग गरी युनियनले हडताल गरेको हो । प्रक्रिया पूरा गरी श्रम कार्यालयको अनुमति समेत लिई हडताल गरिएकाले यो हडताललाई कार्यालयले कानुनी हडतालको मान्यता दिएको झा बताउँछन् । झुल उत्पादन गर्ने यो उद्योग हाल पूर्ण रूपले बन्द रहेको छ ।शुभलक्ष्मी मेटल उद्योगका मजदुर वैशाख १२ देखि धर्नामा बसेका छन् । उद्योगका ३५ मजदुर काम नगरी धर्नामा बसेका हुन् । एलपी ग्यासको सिलिन्डर उत्पादन गर्ने यो उद्योगमा रोजगार सम्झौता हुनुपर्ने, पोसाक व्यवस्था हुनुपर्ने, शैक्षिक भत्ता, जीवन बिमा लगायतका माग राखी मजदुर धर्नामा बसेका हुन् । कानुनी प्रक्रिया सुरु नगर्दै मजदुरले हड्ताल गरेकाले कार्यालयले उनीहरूको हडताललाई गैरकानुनी मानेको छ । उद्योग भने हाल पनि चालु रहेको छ । प्लास्टिकको झोला र प्लास्टिक गाता उत्पादन गर्ने आदर्श पोलिमर्सको मूल गेटमा महिला कामदार वैशाख ३ देखि धर्नामा छन् । उद्योग व्यवस्थापनले ५ मजदुरलाई जगेडामा राखेर उद्योगमा तालाबन्दी गरेको विरोधमा सम्पूर्ण मजदुर काम ठप्प पारी धर्नामा बसेका हुन् । ९ महिला मजदुर रहेको उद्योग हाल बन्द छ ।

उद्योग व्यवस्थापनले मजदुर जगेडामा राख्नेबारे श्रम कार्यालयसँग कुनै सल्लाह वा जानकारी लिएको वा सूचना समेत नदिएको उनले बताए । श्रम ऐन २०४८ ले यसरी उद्योगले मजदुरलाई जगेडामा राख्दा वा कटौती गर्दा श्रम कार्यालयको अनिवार्य स्वीकृति लिनुपर्ने व्यवस्था गरेको थियो । तर हाल आएको श्रम ऐन २०७४ यस सम्बन्धमा मौन रहेको छ । समस्या रहेका ३ वटै उद्योगको समस्या समाधानको प्रयास कार्यालयले गरी रहेको श्रम कार्यालय प्रमुख राधेश्याम बताउँछन् । ‘उद्योग व्यवस्थापन र मजदुर पक्षबीच समन्वय गरी समस्या समाधानको प्रयास गररहेका छौं,’ उनले भने, ‘सम्भवत: केही दिनभित्रै नतिजा आउँछ होला ।’

प्रकाशित : जेष्ठ २, २०७५ ११:५१
प्रतिक्रिया
पठाउनुहोस्

प्रदेशसभामा मुख्यमन्त्रीको विरोध

कान्तिपुर संवाददाता

जनकपुर — भारतीय प्रधानमन्त्री नरेन्द्र मोदीको नागरिक अभिन्दन समारोहमा प्रदेश २ का मुख्यमन्त्री मोहम्मद लालबाबु राउतले कूटनीति मर्यादा विपरीत दिएको अभिव्यक्तिको प्रदेशसभा बैठकमा आलोचना भएको छ ।

मोदीको नागरिक अभिन्दन समारोहमा मुख्यमन्त्री राउतले संविधानलाई ‘विभेदकारी’ भन्दै त्यसविरुद्ध संघर्ष जारी रहेको अभिव्यक्ति दिएका थिए । प्रदेशसभाको बैठकमा मंगलबार बोल्दै एमाले, कांग्रेस र माओवादी केन्द्रका दर्जनभन्दा बढी सांसदले मुख्यमन्त्रीको अभिव्यक्ति मञ्च सुहाउँदो नभएको भन्दै आलोचना गरे । उनीहरूले मुख्यमन्त्रीको अभिव्यक्ति, जानकी मन्दिरमा फरक स्वरूपको राष्ट्रिय झन्डा राखिएको, भारतीय नेता कीर्ति आजादको जनकपुर भारतमा मिसाउनुपर्ने लेखिएको ट्विट, मोदी भ्रमणका क्रममा देखिएको अव्यवस्थाका विषयमा बोलेका थिए ।

सत्तापक्ष संघीय समाजवादी फोरम र राष्ट्रिय जनता पार्टी (राजपा) का सांसदले प्रदेशसभा बैठकमा मुख्यमन्त्री राउतको विवादास्पद अभिव्यक्तिको बचाउ गरे पनि मोदी भ्रमणका क्रममा देखिएको भद्रगोलबारे सरकारको आलोचना गरे । प्रदेशसभा बैठकमा सत्तापक्ष र विपक्षी दलका सांसदले आलोचनापछि सभामुख सरोजकुमार यादवले जेठ ३ गते तोकिएको बैठकमा जवाफ दिन सरकारलाई निर्देशन दिएका छन् ।‘विदेशी पाहुनाको उपस्थितिमा संविधान संशोधन र विभेदको कुरा कोट्याउनु कूटनीति मर्यादाविपरीत हो,’ प्रदेशसभाका कांग्रेसका सांसद शिवचन्द्र चौधरीले भने, ‘भारतीय प्रधानमन्त्रीको सामु बोलेर संविधानको संशोधन हुँदैन । संविधान संशोधनका लागि मधेसवादी दल दबाब नदिएर सत्ता कुरेर बसिरहेका छन् ।’ उनले भारतीय नेता कीर्ति आजादको ट्विटको विषयमा प्रदेशसभाले निन्दा गर्नुपर्ने माग गरे । एमालेका सांसद सुन्दरबहादुर विश्वकर्माले संविधान संशोधनको प्रावधान संविधानमै उल्लेख भए पनि त्यो विषयमा कहाँ र के बोल्ने हेक्का राख्न प्रदेश सरकारलाई आग्रह गरे ।

माओवादी (केन्द्र) का प्रदेशसभा सांसद ज्वालाकुमारी साहले आफ्नो आन्तरिक समस्या विदेशी पाहुँनासँग राख्नु उचित नभएको बताइन् । ‘संविधान र विभेदका विषयमा बोल्ने मञ्च त्यो थिएन,’ उनले भनिन, ‘त्यहाँ बोल्दा के फाइदा भयो ? सरकारले जवाफ दिनुपर्छ ।’एमाले सांसद रविन्द्र बैठाले भारतीय प्रधानमन्त्री मोदीको नागरिक अभिन्दन समारोहमा मुख्यमन्त्री राउतले दिएको बिवादस्पद अभिव्यक्तिको आलोचना गरे । ‘गाजल आँखामा लगाउँदा सुन्दर देखिन्छ तर नाकमा लाग्यो भने भद्दा देखिन्छ,’ उनले भने, ‘मुख्यमन्त्री राउतले मोदीको उपस्थितिमा दिएको अभिव्यक्ति सुहाएन ।’ प्रदेशसभाको मंगलबारको बैठकमा मुख्यमन्त्री राउत अनुपस्थित
थिए ।

मुख्यमन्त्रीको बचाउ
सत्तापक्ष फोरम र राजपाका प्रदेशसभा सांसदले मुख्यमन्त्री राउतको विवादास्पद अभिव्यक्तिको बचाउ गरेका छन । विपक्षीले मुख्यमन्त्रीको अभिव्यक्तिको तीव्र आलोचना गरेपछि सत्तापक्षका सांसदले उनको बचाउ गरेका हुन् ।फोरमका सांसद रामआशिष यादव र करिमा बेगमलेनेपाल–भारतको सम्बन्ध मोदीको भ्रमणले प्रगाढ भएको बताउँदै मुख्यमन्त्रीको अभिव्यक्ति सही कि गलत ? भन्ने विषयलाई विवादमा नल्याउन आग्रह गरे। ‘आफ्नो प्रदेशको समस्या उहाँले प्रदेशकै जनतासामु राखेको हो,’ यादवले भने। राजपाका सांसद उपेन्द्र महतो र डिम्पलकुमारी झाले संविधान संशोधनको विषय मुख्यमन्त्रीले मोदीलाई नसुनाएर त्यहाँ उपस्थित जनतालाई सुनाएको तर्क गरे ।

प्रकाशित : जेष्ठ २, २०७५ ११:५१
पूरा पढ्नुहोस्
प्रतिक्रिया
पठाउनुहोस्