हाँस–कुखुरामा पनि कर

पूर्वजनप्रतिनिधि र व्यवसायी विरोधमा
नयाँ कर, शुल्क र राजस्व स्थगित हुनुपर्ने
पुरानो कर संशोधनपश्चात मात्र लागू गर्नुपर्ने
भरत जर्घामगर

सिरहा — मिर्चैया नगरपालिकाले परेवा, हाँस र कुखुरादेखि राष्ट्रिय राजमार्गको घरधुरीमा समेत व्यापक कर निर्धारण गरेको भन्दै व्यवसायी र पूर्वजनप्रतिनिधिले विरोध गरेका छन् ।

आर्थिक वर्ष ०७५/७६ मा निर्धारण गरेको कर सर्वसाधारणको आर्थिक हैसियतभन्दा माथि रहेको भन्दै उनीहरूले विरोध जनाएका हुन् । मिर्चैया नगरपालिकाका व्यवसायी तथा पूर्वजनप्रतिनिधिले जनताको ढाड सेक्ने गरी निर्धारण गरेको कर स्थगन गरी सर्वपक्षीय सहमतिबाट कर निर्धारण गर्न माग गर्दै मेयर श्रवण यादवलाई ज्ञापनपत्र बुझाएका छन् ।

ज्ञापनपत्र बुझाउन मिर्चैया क्षेत्रका पूर्वगाविस अध्यक्षहरू जीवछ साह, अर्षनारायण मण्डल, प्रदीप महासेठ, पूर्वजिविस सदस्य सीताराम यादव तथा विभिन्न राजनीतिक दलका नेता तथा मिर्चैया उद्योग वाणिज्य संघका पदाधिकारी नेतृत्वको टोली नगरपालिका पुगेको थियो ।

Yamaha

स्थानीय राजनीतिक दल, उद्योग वाणिज्य संघ, नागरिक समाज सम्मिलित सर्वपक्षीय संयुक्त संघर्ष समितिको टोलीले नगरपालिकाले लिइरहेको नयाँ कर, शुल्क र राजस्व पूर्ण रूपमा स्थगित हुनुपर्ने, पुरानो कर पनि संशोधनपश्चात मात्र लागू गर्नुपर्ने माग गरेका छन् ।

आव ०७४/७५ को वडा र नगरस्तरीय योजनाको लागत इस्टिमेटसहित मूल्यांकन विवरण उपलब्ध गराउनुपर्ने, विभिन्न निकायबाट नगरपालिकामा दाखिला भएको आम्दानीको विवरण उपलब्ध गराउनुपर्ने, कोटेसन र सडक बोर्डको कार्यको विवरण उपलब्ध गराउनुपर्ने, आन्तरिक कोषबाट नियुक्ति गरिएका कर्मचारीको विवरण उपलब्ध गराउनुपर्ने माग गरिएको छ ।

त्यसैगरी घटना दर्ता, मृत्यु दर्ता, विवाह दर्ता, बसाइँसराइ नि:शुल्क हुनुपर्ने र विभिन्न शीर्षकमा वडा र नपामा खरिद भएका सामग्रीको भुक्तानी विवरण उपलब्ध गराउनुपर्ने माग राख्दै नगर प्रमुखलाई ज्ञापनपत्र बुझाएका हुन् । जिल्ला उद्योग वाणिज्य संघ सिरहा लहानका उपाध्यक्ष तथा मिर्चैयाका स्थानीय व्यापारी अशोककुमार साहले नगरपालिकाले परेवा, हाँस र कुखुरादेखि राष्ट्रिय राजमार्गको घरधुरीमा समेत व्यापक कर निर्धारण गरेको गुनासो गरे । ‘राजमार्ग छेउका घरको वार्षिक कर ६० हजार रुपैयाँसम्म तोकिएको छ,’ उनले भने, ‘त्यत्रो कर घरधनीले कहिले र कसरी तिर्नु ?’

नगरपालिकाले निर्धारण गरेको कर सूचीमा हाँस बिक्री गर्नेबाट प्रतिजोडा २० रुपैयाँ र कुखुरा बिक्री गरे प्रतिथान ५० रुपैयाँ कर तिर्नुपर्नेछ । यसअघि ती पक्षीको बिक्रीवितरणमा कर निर्धारण थिएन । ज्ञापनपत्र बुझ्ने क्रममा नगर प्रमुख यादवले माग गरिएको विवरण १५ दिनपछि उपलब्ध गराउने आश्वासन दिँदै आन्तरिक छलफल गरेर करको विषयमा निर्णय लिन सकिने आश्वासन दिए ।

माग गरिएको सूचना दिन कुनै समस्या नरहेको उल्लेख गर्दै उनले नेपाल सरकारको नीतिअनुसार नगरपालिकाले कर लगाइएको जानकारी दिए ।

Esewa Pasal

प्रकाशित : श्रावण ३१, २०७५ ०९:०५
ADVERTISEMENT
प्रतिक्रिया
पठाउनुहोस्

काभ्रेपानीमा भक्तजनको घुइँचो

भरत जर्घामगर

सिरहा — लहान नगरपालिका १६ स्थित रमणीय चुरेको फेदीमा अवस्थित काभ्रे कप्लेश्वर महादेवस्थानमा साउनको अन्तिम सोमबार जल चढाउने भक्तजनको घुइँचो लागेको छ ।

सिरहाको उत्तरवर्ती लहान नगरपालिका १६ स्थित चुरेको फेदीमा अवस्थित काभ्रे कप्लेश्वर महादेवस्थानमा साउनको अन्तिम सोमबार जल चढाउन जाँदै गेरुवस्त्रधारी भक्तजन । तस्बिर : भरत । कान्तिपुर

धार्मिक पर्यटनका लागि आगन्तुकहरू बाह्रैमास घुम्न आइरहने यस धार्मिक स्थलमा साउन महिनाभर गेरुवस्त्रधारी धर्मावलम्वीको घुइँचो लाग्यो । साउनको अन्तिम सोमबार महादेवस्थानमा जल चढाउनेको घुइँचो लागेको हो ।

पूर्व–पश्चिम राजमार्गअन्तर्गत लहानदेखि करिब १२ किलोमिटर उतर चुरे जंगलको फेदीमा अवस्थित महादेव स्थानमा विशेष गरी साउन महिनाभर भक्तजन र आगन्तुकको घुइँचो बढी हुन्छ । तरेगनाबाट उकालो पैदल यात्राबाट पुगिने काभ्रेपानी महादेव स्थानमा चुरे क्षेत्रमा हराउँदै गएका वनस्पतिका रूख भएको रमणीय वन क्षेत्रको अवलोकन गर्न र मनोरञ्जन लिन आगन्तुकहरूको आगमन हुने गरेको छ । चुरे क्षेत्रको झन्डै चार घण्टाको पैदल यात्रापछि नोकर–मालिक, धनी–गरिब तथा छुवाछूत यी सवै प्रकारको भेदभाव मेटिने धर्मावलम्वीहरू बताउँछन् ।

उनले कतिपय आगन्तुक र भक्तजन भाकल गरेअनुरूप बोलबम भन्दै कावर यात्रामै सहभागी हुने गरेको सुनाए । सन्तान नहुनेहरू सन्तान प्राप्तिका लागि, रोगव्याधी निकोलगायत मनोकांक्षा पूरा भएपछि भक्तजनहरूले साउन महिनाभर सुनचाँदीको गहना, चॉदीको पैसा, त्रिशूल, लडडु र कसैले मन्दिर परिसरमा सन्तानको कपाल काट्ने गर्छन् ।

सिरहा, सप्तरी, धनुषा, महोतरी र भारतका विहार प्रदेशबाट समेत आउने भक्तजनहरूले उत्तरायणी भएर बहेको खुट्टी खोलाबाट जल भरेर लग्ने गर्छन् । स्थानीय गोपाल थापाका अनुसार काभ्रे कप्लेश्वर महादेव स्थान घुम्न बाह्रैमास आगन्तुकहरू आइरहे पनि पर्यटकीय स्थलका लागि भौतिक सुविधाहरू पर्याप्त नभएको सुनाए ।

‘साउन महिनामा आगन्तुकहरूको चापलाई व्यवस्थित गर्न समस्या हुन्छ,’ उनले भने, ‘व्यवस्थित धर्मशालाको अभावमा आगन्तुकहरू मन्दिर क्षेत्रको रमणियतामा बस्ने चाहाना गरे पनि त्यो सुविधा दिन सकिएको छैन ।’ धार्मिक पर्यटन प्रवद्र्धनका लागि होमस्टेको पर्याप्त सम्भावना रहेकाले यसतर्फ योजना बनाएर अघि बढ्ने तयारी गरिएको छ ।

‘होमस्टेको पूर्वाधार तयारी भएको भए मगर समुदायको घना बस्ती रहेको यस क्षेत्रमा मगर संस्कृति, भेषभूषा, नाचगान, खानपानको आगन्तुकहरूले भरपुर मजा लिनसक्थे,’ उनले भने, ‘तर, सरोकारवालाको वेवास्ताको कारण यो क्षेत्र उपेक्षित हुनपुगेको छ, यद्यपि यसक्षेत्रका बासिन्दा लागि परेका छौं ।’

गेरुवस्त्रमय शिवालय
साउनको अन्तिम सोमबार सिरहाका विभिन्न शिवालयहरूमा जल चढाउने भक्तजनहरूको भीड लागेको छ । जिल्लाको बन्दीपुर, सारश्वर, सिरहा, लहान, गोलवजार लगायतका महादेव स्थलहरूमा सोमबार बिहानैदेखि भीड लागेको छ । आइतबार बिहानदेखि बन्दीपुर र काभ्रे पुगेका भक्तजनहरू रातभरि पैदल यात्रा गरी सोमबार चल चढाउँछन् ।

आइतबार नै बन्दीपुर पुगेका भक्तजनहरूले दिनमा ननमोहरी पहाडको फेदीमा रहेको नन्द बाबाको मन्दिरमा जल चढाएका छन् । कावर यात्रामा सबैले एक अर्कालाई बमको नामबाट सम्बोधन गर्छन् ।

प्रकाशित : श्रावण २९, २०७५ ०९:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT