प्रदेशसभामा गर्जिए महिला सांसद

अजित तिवारी, सन्तोष सिंह

जनकपुर — महिला सांसदले महिलालक्षित हिंसा र अपराध दिनदिनै बढेको भन्दै त्यसलाई रोक्न लिंगछेदनसम्मको सजाय तोक्नुपर्ने माग गरेका छन् ।

प्रदेशसभाको बैठकमा रातो किताबको त्रुटि देखाउँदै सांसद ज्वालाकुमारी साह । तस्बिर : सन्तोष

बलात्कार र हत्या र घरेलु हिंसाको क्रम बढेको र त्यसलाई रोक्न प्रदेश सरकार असफल भएको आरोप लगाउँदै शुक्रबार बसेको प्रदेशसभाको बैठकमा महिला सांसदहरूले बलात्कारीलाई कठोर सजायको व्यवस्था गर्न माग गरे । उनीहरूले बलात्कारीको लिङछेदन र नपंशुसक बनाएर आजिवान कारावासको व्यवस्था गर्न माग पनि गरे ।

प्रदेशसभाको शुक्रबारको बैठकमा विशेष समयमा बोल्ने सांसदमध्ये अधिकांश महिला नै थिए । सत्तापक्ष र विपक्षी दलका करिब ८ जना महिला सांसदले महिलालक्षित अपराध रोक्न कडा कानुन ल्याउनुपर्ने आग्रह गरे । ‘प्रदेश २ मा बलात्कारको घटना अचाक्कली बढेको छ । महिलालाई सुरक्षित राख्न बलात्कारीको यौन अंग काट्नुपर्छ,’ कांग्रेसकी सांसद शोभा लामाले भनिन्, ‘बलात्कारीलाई समाजमै नग्याउनुपर्छ ।’

Yamaha

सांसद लामाले प्रदेश २ मा आपराधिक क्रियाकलाप बढे पनि सरकारले रोक्न पहल नगरेको आरोप लगाइन् । नेकपाकी सांसद रुवीकुमारी कर्णले महिला हिंसामा संलग्नलाई नपंशुक बनाउनुपर्ने माग गरिन् । उनले पछिल्लो समय महोत्तरी र सप्तरीमा बलात्कारको घटना बढेको भन्दै प्रदेश सरकारलाई यस्ता घटनामा गम्भीर हुन माग गरिन् ।

कांग्रेसकै अर्की सांसद प्रमिलादेवी दासले महोत्तरीको औरहीमा ९ महिनाको शिशुको अपहरणपछि भएको हत्याको घटनामा करणी गरेको पनि सुनिएको बताउँदै यस्ता कुकर्म गर्ने अपराधिलाई हदैसम्मको कारबाही माग गरे ।

प्रदेशसभाका सांसद गीताकुमारी यादवले लागूऔषध, रक्सी र समाजमा मौलाएको नशा सेवन संस्कृतिले प्रदेश २ मा महिलालक्षित हिंसा बढेको बताइन् । उनले प्रदेश २ मा महिला हिंसाको घटना रोक्न पनि रक्सी र लागूऔषधमा प्रतिबन्ध लगाउनुपर्ने माग गरिन् ।

राष्ट्रिय जनता पार्टी (राजपा) की सांसद सुरिता साहले प्रदेश २ को सबै जिल्ला भारतीय सीमासँग जोडिएकाले निर्वाद रूपमा भित्रिने लागूऔषधले समाजका युवालाई कुलतमा फसाएको बताइन् । उनले त्यही कुलतका कारण समाजमा यौनहिंसाको घटनामा वृद्धि भएको बताइन् ।

राजपाका अर्का सांसद मनीष सुमन र परमेश्वर साहले पनि प्रदेश २ मा बलात्कार र महिला हिंसाको घटनामा वृद्धि भएको बताउँदै त्यसलाई रोक्न कडा सजायको व्यवस्था गर्न माग गरे । प्रदेशसभाको बैठकमा आन्तरिक मामिला तथा कानुनमन्त्री ज्ञानेन्द्रकुमार यादवले प्रदेश २ मा शान्तिसुरक्षा कायम गर्न र सुशासन ल्याउन सरकार क्रियाशील रहेको बताए । उनले महोत्तरीको औरहीमा भएको घटनाले सबैलाई लज्जित बनाएको बताउँदै त्यस घटनाका आरोपी केही दिनमै पक्राउ पर्ने दाबी गरे ।

बजेटमै विभेद
प्रदेश २ को सरकारले असार १ गते ल्याएको बजेट र रातो किताबमा समेटिएको योजनामा विभेद गरिएको सांसदले आरोप लगाएका छन् । बजेटमा समेटिएका कतिपय योजना रातो किताबमा उल्लेख नगरेको र संशोधन गरिने योजना पनि समेटिएकोमा उनीहरूले आपत्ति जनाए ।

राजपाका सांसद मनिष सुमनले विश्व स्वास्थ्य संगठनले उन्मुलन भइसकेको दाबी गरेको औलो रोग नियन्त्रणका लागि ५ करोड रुपैयाँ विनियोजना गरेको रातो कितावमा उल्लेख गरेकोमा आपत्ति जनाए । ‘विश्वबाटै उन्मुलन भइसकेको औलो रोग नियन्त्रणका लागि प्रदेश २ मा किन खर्चिनु पर्‍यो ५ करोड रुपैयाँ ?’ सांसद सुमनले प्रश्न गरे, ‘रातो कितावबाट यो योजना हटाउनुपर्छ ।’

बजेटमा सामाजिक विकास मन्त्रालयबाट खर्च हुने गरी औलो रोग नियन्त्रणका लागि सुपानेट झुल वितरणका लागि ५ करोड रुपैयाँ विनियोजन गरिएको थियो । सांसदहरूको तीव्र विरोधपछि आर्थिक मामिला मन्त्री विजय यादवले बजेटबाट त्यो योजना हटाउने आश्वासन दिएका थिए । सांसद सुमनले आर्थिक मामिलामन्त्रीले बजेटबाट हटाउने आश्वासन दिए पनि रातो कितावमा उक्त योजना समेटिएकोमा सरकारको आलोचना गरे ।

नेकपाकी सांसद ज्वालाकुमारी साहले जनतासँग सोधेर र छलफल गरेर संकलन गरिएको धेरैजसो योजना रातो कितावबाट गायब गरिएको आरोप लगाइन् । ‘मैले हालेको योजना रातो कितावबाट हटाइएको छ,’ सत्तापक्ष संघीय समाजवादी फोरमकी सांसद शन्चमाया मोक्तानले भनिन्, ‘रातो कितावलाई सच्याएर छुटेको योजना समेटनुपर्छ ।’ फोरमका सांसद बच्चा राउतले सरकारले ल्याएका नीति तथा योजना कार्यान्वयन नगरेको आरोप लगाए ।

Esewa Pasal

प्रकाशित : भाद्र १६, २०७५ ०९:०६
प्रतिक्रिया
पठाउनुहोस्
ADVERTISEMENT

किर्ते नागरिकता बनाउने धरौटीमा

सन्तोष सिंह

जनकपुर — सरकारी दस्तखत तथा छाप किर्ते गरी मृत्यु भएका व्यक्तिको नामबाट नक्कली नागरिकता बनाएर जग्गा बिक्री गर्न खोज्ने तीन जना धरौटीमा छुटेका छन् ।

१८ वर्षअघि मृत्यु भइसकेको नागरिकता फोटो हालेर मालपोतबाट जग्गा बिक्री गर्न लागेको आरोपमा पक्राउ परेका तीन जनालाई धनुषा जिल्ला अदालतले धरौटीमा छोडेको हो ।

०५७ वैशाख १० गते मृत्यु भएका जनकपुर उपमहानगरपालिकाका–१४ का फुलगेन साहको नागरिकतामा फोटो परिवर्तन गरी रौतटह चन्द्रनिगाहपुर–१० का ६७ वर्षीय रामएकवाल साहले आफ्नो फोटो राखी फुलगेन साहको जग्गा बिक्री गर्न खोज्दा पक्राउ परेका साह सहित ३ जना धरौटीमा छुटेका छन् ।

जिल्ला अदालत धनुषाको मुख्य न्यायाधीश राधाकृष्ण उप्रेतीको इजलासले सरकारी दस्तखत तथ छाप किर्ते गरेको आरोपमा पक्राउ परेका रामएकवाल साहलाई ५० हजार, चन्द्रनिगाहपुर–१० कै ५२ वर्षीय योगेन्द्र साहलाई ३० हजार र चन्द्रनिगाहपुर–४ का अनन्त प्रसाद चौधरीलाई समेत ३० हजार धरौटीमा छोडने आदेश दिएको हो ।

रामसागर साहका छोरा
पुलगेन साहको नाम रहेको नागरिकतामा सरकारी दस्तखत तथ छाप किर्ते गरी रामएकवाल साहले आफनो फोटो राखेर नागरिकता बनाएका थिए ।

फुलगेन साहको जग्गा बिक्री गर्न किर्ते नागरिकता बनाएका रामएवालले सर्लाही सदरमुकाम मलंगवास्थित नेपाल राष्ट्र बैंकमा खाता समेत फुलगेन साहको नाममा खोलेका थिए ।

सरकारी दस्तखत तथ छाप किर्ते आरोपमा पक्राउ परेका तीनै जानलाई ०५७ साउन २० गते मालपोत कार्यालय धनुषामा जग्गा बिक्रि गर्न खोजेको आरोप लगाए पनि तीनै जना साउन १९ गते जनकपुर बस पार्कमा प्रहरीलाई गालीगलौज गरेका कारण प्रहरीले नियन्त्रणमा लिएको र बरदातभन्दा अगाडि नै प्रहरी हिरासतमा रहेको हुनाले प्रतिवादीहरूलाई पछि थप प्रमाण बुझ्दै जाँदा ठहरे बमोजिम गर्ने गरी मुलुकी ऐन २०७४ को दफा ६८ बमोजिम धरौटीमा छोडने न्यायाधीश उप्रेतीले आदेश दिएको हो । किर्ते नागरिकता बनाएर जग्गा बिक्री गर्न खोज्ने मुख्य योजनाकार भने फरार छन् ।

प्रकाशित : भाद्र १६, २०७५ ०९:०६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT