भारतीय व्यापारीले बनाए किर्ते नेपाली नागरिकता

रौनियारसित जिल्ला प्रशासन कार्यालय सप्तरीबाट २०७१ माघ २६ गतेको मितिमा प्रशासकीय अधिकृत जनक कोइरालाले प्रमाणित गरेको नेपाली नागरिकता रहेको पाइएको छ
अवधेशकुमार झा

राजविराज — सप्तरीबाट फेरि एक जना भारतीय व्यापारीले नेपाली नागरिकता बनाएको खुलेको छ । भारतको सहरसा जिल्ला घर भएका व्यापारी केदार गुप्तासित सप्तरीको मलेकपुर स्थायी ठेगाना देखाएर रबी रौनियारको नाममा किर्ते नागरिकता रहेको खुलेको हो ।

दुई दिनअघि सुनसरीको इटहरी प्रहरीले रौनियारलाई पक्राउ गरी सप्तरी प्रहरीलाई कारवाहीका लागि बुझाएको छ । रौनियारसित जिल्ला प्रशासन कार्यालय सप्तरीबाट २०७१ माघ २६ गतेको मितिमा प्रसासकिय अधिकृत जनक कोइरालाले प्रमाणित गरेको नेपाली नागरिकता रहेको पाइएको छ ।

प्रशासकीय अधिकृत कोइराला यसअघि भारतको हरियाणाका व्यापारी सतिश अग्रवालको किर्ते नागरिकता प्रकरणमा पनि मुछिएका व्यक्ति हुन् । उनीमाथि अग्रवाल नागरिकता प्रकरणमा जिल्ला अदालतमा मुद्दा छ । प्रशासकीय अधिकृत कोइरालाको २ महिनाअघि नै सप्तरीबाट सरुवा भइसकेको छ ।

Yamaha

पछिल्लोपटक किर्ते नागरिकता फेला परेका रौनियारको सप्तरीको मलेकपुरबाट नेपाली नागरिकता जारी भएको देखिए पनि स्थानीय बासिन्दाका अनुसार मलेकपुरमा रौनियार/गुप्ता थरका एक घर पनि कोही छैनन् । उनीसित नेपाली नागरिकाको नम्बर १६/८५८६३ छ ।

नागरिकताको अगाडि भागमा उक्त नम्बर रहे पनि पछाडि भागमा अंग्रेजीमा भने ८५४६३/८९५ नम्बर उल्लेख छ । जामुन रौनियारको छोरा भई उनले नेपाली नागरिकता लिएको देखिए पनि मलेकपुरमा जामुन रौनियार नामका व्यक्ति नै छैनन् ।

सप्तरी प्रहरी प्रमुख एसपी राजेन्द्र बिष्टले प्रहरी नियन्त्रणमा रहेका रौनियारले कसरी नेपाली नागरिकता बनाए भन्ने विषयमा अनुसनधान भइरहेको जानकारी दिए । प्रमुख जिल्ला अधिकारी सुरेन्द्र पौडेलले किर्ते नागरिकता प्रकरणमा प्रहरीले पक्राउ गरेको रबि रौनियारको नागरिकताबारे जिल्ला प्रशासनमा कुनै तथ्यांक नरहेको बताए । ‘उनको नागरिकतावारे प्रशासन कार्यालयमा कुनै रेकर्ड छैन,’ प्रजिअ पौडेलले भने, ‘बाहिरै कतै बनाएको हुन सक्छ ।’

स्रोतका अनुसार सप्तरीमा सक्रिय रहेको किर्ते नागरिकता बनाउने गिरोहले रौनियारसित मोटो रकम लिएर उनको नेपाली नागरिकता बनाइदिएको हो । यसैबीच, सप्तरी प्रहरीले रबि रौनियारलाई किर्ते नागरिकता बनाइदिने गिरोहका एक जनालाई पनि आइतबार नियनत्रणमा लिएको छ । छिन्नमस्ता गाउँपालिका सखडाका सुरेन्द्र यादवलाई पक्राउ गरिएको एसपी बिष्टले जनाए ।

उनका अनुसार सुरेन्द्र सहितको केही व्यक्तिहरूको समूहले रौनियारको नागरिकता बनाइदिएको हो । प्रहरीले किर्ते नागरिकता बनाइदिने गिरोहका अन्यको पनि खोजी गरिरहेको जनाएको छ । सप्तरी जिल्लाबाट किर्ते नागरिकता बनाउने कार्य अत्यधिक हुँदै आएको छ ।

यसअघि सप्तरीबाटै कुख्यात भारतीय अपराधी धिरेन्द्र यादव, बमबम यादब लगायतका दर्जनाैं भारतीय आपराधी र व्यापारी तथा सर्वसाधारणले नेपाली नागरिकता लिएको तथ्य खुलिसकेको छ ।

गत माघमा मात्र सप्तरी प्रहरीले भारतको पश्चिम बंगाल राज्यस्थित उतरी दिनाजपुर जिल्लाको अन्नतकोठाग्रामका मोहम्द लतिफुर रहमान,बिहारको किसनगञ्ज जिल्लाका मो. नाबेद आलम तथा बिहार सुपौलका सरौ आलमलाई नक्कली नेपाली नागरिकता सहित नियन्त्रणमा लिएको थियो ।

यस्तै भारत घर भई सुनसरी सदरमुकाम इनरुवा बस्दै आएका विनित देबलाई किर्ते नागरिकता बनाएको आरोपमा सप्तरी प्रहरीले पक्राउ गरेको थियो । उनले सप्तरीको साबिक मयनाकरेडी गाविसको ठेगाना देखाई नेपाली नागरिकता लिएका थिए ।

उनी जिल्ला अदालतको आदेशमा पुर्पक्षका लागि राजविराज कारागारमा छन् । किर्ते नागरिकताकै आधारमा देवले जिल्ला प्रसासन कार्यालय सप्तरी हुँदै राहदानी विभागवाट २२ मई २०१६ मा ०९७८३१९२ नम्बरको राहदानी लिएका थिए ।

यस्तै, भारतको हरियाणका व्यापारी सतिष अग्रवाल र उनकी पत्नी मोनिका अग्रवालले पनि सप्तरीको राजविराजको ठेगाना देखाई किर्ते नेपाली नागरिकता लिएका थिए । सतिष जिल्ला अदालतको आदेशमा पुर्पक्षका लागि कारागारमा छन् भने उनकी पत्नी मोनिका फरार छन् ।

यसैगरि केही समयअघि त्रिभुवन विमानस्थलवाट पक्राउ गरेका भारतीय सिरियल किलर मस्तकिम भनिने रइस मियाँसित बंशजको नेपाली नागरिकता रहेको थियो । सात जनाको हत्यामा संल्गन रहेको भनिएका रइस मियाले सप्तरी जिल्लाको तात्कालिन सारस्वर गाबिस ७ ठेगाना देखाई ०६३ साल चैत १० गते ०६३१०६–४९० नम्बरको बंशजको नागरिकता लिएका थिए । उनी भारत बिहारका नागरिक हुन् ।

बिहार सरकारले टाउको मूल्य तोकेर बिहारको आतंक उपनाम दिएका भारतीय नागरिक धिरेन्द्र यादवले सप्तरी र सुनसरी गरि दुई ठाउवाट नेपाली नागरिकता लिए । ०६३ सालमा टोली गाउ पुग्दा उनले आर्थिक प्रलोभनमा सप्तरीको बभनगामा कट्टी गाविस २ वाट शंकर यादवको छोरा महाबीर यादव भई गलत कागजात पेस गरेर नेपाली नागरिकता लिए ।

यस्तै धिरेन्द्रले सुनसरीको पश्चिम कुसहाबाट पनि नेपाली नागरिकता लिएका थिए । कर्तव्य ज्यानसम्बन्धी मुद्दामा जेल परेका उनी पनि ०६९ साल कार्तिक २३ गते झुम्का कारगारबाट फरार भएका थिए ।

भारतमा विभिन्न अपराध गरी नेपाल प्रबेश गरेर तात्कालीन जनतान्त्रिक तराई मुक्ति मोर्चा (राजनमुक्ति) समूहका सप्तरी जिल्ला इन्चार्ज बताउने सुभाष झाले सुनसरी जिल्लाको श्रीपुर गाविस ३ वाट दिनेश झाको नाममा नेपाली नागरिकता लिए । झुम्का कारागारवाट भाग्नु अघि झा पनि फर्जी नागरिकता समबन्धी मुद्धामा कारागारमा थिए ।

०५३ साल असार २ गतेको मितिमा मकवानपुर मदमापोखरी ५ का मनोजकुमार थापाले झुठा विवरण पेस गरी सप्तरी जिल्लाको वतन देखाई नेपाली नागरिकता लिए । प्रहरीले उनलाई ०७३ साउन १२ गते पक्राउ गरी अदालतमा मुद्धा लग्दा २५ हजार धरौटीमा छुटे ।

सप्तरी प्रहरीका अनुसार भारत घर भई झापा जिल्लाको बिर्तामोड बस्दै आएका संगिता राजबंसीले सप्तरी जिल्लाको वतन देखाई नक्कली नागरिकता वनाएर झापा जिल्लावाट राहदानी बनाइविदेश जान लागेका बेला ०७३ मंसिर १८ गते पक्राउ गरिए । उनी पनि अदालतको आदेशमा ५० हजार धरौटी बुझाई छुटे ।

भारतीय नागरिक शिवनारायण पंडित झुटकी १ सप्तरीको ठेगाना देखाई झुठा बिबरण पेश गरि नेपाली नागरिकता प्राप्त गरे । ०७२ माघ ३ गते पक्राउ गरिएका उनी ५० हजार धरौटीमा रिहा भए ।

तीन किसिमका किर्ते नागरिकता
सप्तरी जिल्लाबाट किर्ते कागजातका आधारमा नेपाली नागरिकता बनाइदिने गिरोह नै सक्रिय छ । प्रहरीले विभिन्न समयमा पक्राउ गरेका किर्ते नेपाली नागरिकताधारीको नागरिकता हेर्दा तीन किसिमबाट किर्ते नेपाली नागरिकता बनाएको पाइएको छ ।

२०६३ सालमा गाउँमा टोली गएका बेला सयौं भारतीयले नेपाली नागरिकता लिएका थिए । जसमध्ये केहीलाई प्रहरीले पक्राउ गरिसकेको छ । त्यति बेला तात्कालीन दलका प्रतिनिधिहरूले सिफारिस गरे पुग्ने प्रावधानका कारण रकम खर्चेर धेरै भारतीयहरूले नेपाली नागरिकता लिएका थिए ।

किर्ते नागरिकता बनाउने अर्को अवस्था हो,प्रशासन कार्यालय बाहिरै नागरिकता बनाइदिने । नेपालमा शासन व्यवस्था परिवर्तन भए पनि श्री ५ को सरकारको ठाउँमा नेपाल सरकार लेखिएको नागरिकता कार्ड आउँदा पुराना कार्डहरू कुनै कमृचारीले आफूसित लिएर गएको र अहिले रकम लिएर आफूखुसी नाम ठेगाना भरी नागरिकता दिने गरेका छन् ।

जिल्ला प्रशासनकै कर्मचारीको मिलेमतोमा फर्जी कागजातका आधारमा नेपाली नागरिकता बनाउने प्रवृत्ति पनि सप्तरीमा कायमै छ । समान्य नागरिकले नागरिकता बनाउन जाँदा कागजी प्रक्रिया नपुगेको भन्दै कयौंपटक फर्काउने गरिएको छ ।

तर आपराधिक चरित्र भएका विदेशी नागरिकहरू भने रकमको आडमा सहजै नेपाली नागरिकता पाउने गरेका छन्, त्यो पनि कतिपयले बंशजकै आधारमा ।

Esewa Pasal

प्रकाशित : भाद्र १९, २०७५ १०:०४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सप्तरीका ५ सय घर डुबानमा, मोदीसँग नेपालमै समस्या राख्न माग

अवधेशकुमार झा

राजविराज — सप्तकोसी बाढीले स्थानीय बस्ती ७२ घण्टादेखि डुबानमा छ । भारतीय पक्षले ब्यारेजमुनि च्यानल खनी बहावलाई पश्चिमतर्फ फर्काएपछि नेपालतिरको करिब ५ सय घरपरिवार डुबानमा परेको हो । बहाव परिवर्तनले ल्याउन सक्ने समस्याबारे यसअघि नै स्थानीय तह हुँदै केन्द्रमा समेत पत्राचार भयो । तर, भारतीय पक्षसँग समस्या समाधानको पहल हुन सकेन । 

१ भारतीय कोसी योजनाले नदीको बहावलाई पश्चिम फर्काएपछि घरआँगनबाटै कोसी बग्न थाल्दा डुबेको चुल्हो देखाउँदै हनुमाननगरकी एक महिला । चुल्होसमेत पानीमै डुबेकाले बाढीपीडितहरु छाक टार्न अरुकै मुख ताक्नु पर्ने विवशतामा छन् । तस्बिर : अवधेशकुमार झा

पछिल्लो ७२ घण्टादेखि हनुमाननगर कंकालिनी नगरपालिकाको ५, ६, ७, ११ र १२ नम्बर वडा तथा तिलाठी कोइलाडी गाउँपालिकाको ४ नम्बर वडाका गरी ५ सयभन्दा बढी घरबाट कोसी नदी बगिरहेको छ ।

स्थानीय अगुवा यो समस्या विमस्टेक सम्मेलनमा भारतीय प्रधानमन्त्री नरेन्द्र मोदी अहिले नेपाल रहेको बेला नेपाल पक्षले उठाउनुपर्ने सुझाउँछन् । ‘भारतीय पक्षले च्यानल खन्दा यति ठूलो समस्या देखिएको छ । नेपालका प्रधानमन्त्रीले मोदीलाई यही बेला यसबारे कुरा राखे समस्या तत्काल हट्न सक्छ,’ कोसीपीडित समाजका अध्यक्ष देवनारायण यादवले भने ।
३ महिनाअघि पनि जिल्ला प्रशासन कार्यालयले नेपाल तथा भारतका गृह सचिवस्तरीय वार्तामा कोसीको धार पश्चिमतर्फ फर्काइएको विषयमा कुरा उठाउन र समस्या समाधान गर्न आग्रह गरेको थियो । ‘सबैतिरबाट पत्राचार गर्ने कार्य मात्रै भयो, समस्या समाधान गर्ने उद्देश्यका साथ कार्यान्वयन गर्ने कुरा कतैबाट भएन,’ यादव दुखेसो गर्छन् ।
गत साउनमा हनुमाननगर कंकालिनी नगरपालिकाले जिल्ला प्रशासन कार्यालयलाई पत्राचार गरी भारतले सुनियोजित रूपमा कोसीमा पाइलट च्यानल खनी बहावलाई पश्चिमतर्फ फर्काएको र नदी पश्चिम फर्काइँदा केही बस्ती डुबानमा पर्नुका साथै पश्चिमी तटबन्ध समेत जोखिममा पर्ने औंल्याएको थियो । पत्रमा एक लाखभन्दा बढी जनताको उठिबास हुन सक्ने खतरा समेत देखाइएको थियो । ‘हाम्रो स्तरबाट भारत सरकारसित कुरा गर्न सम्भव थिएन,’ नगरपालिकाका प्रमुख प्रशासकीय अधिकृत सुरेन्द्रकुमार यादवले कान्तिपुरसित भने, ‘यो उच्च स्तरको विषय भएकाले भारतीय पक्षसित छलफल गरी नदीको बहाव बीचबाट गराउन आवश्यक समन्वयका लागि जिप्रकालाई पत्राचार गर्‍यौं ।’

जिप्रकाले पनि सीमावर्ती समकक्षीसित मात्र छलफल गरेर समस्या समाधान हुँदैन भन्ने निष्कर्ष निकाल्यो । प्रमुख जिल्ला अधिकारी सुरेन्द्र पौडेलले कोसीमा च्यानल खनेर नदी पश्चिम फर्काइएको पत्र स्थानीय तहबाट आएपछि आफूले परराष्ट्र र ऊर्जा मन्त्रालयलाई पत्राचार गरेको सुनाए । ‘हाम्रो स्तरबाट कुरा गरेर समस्या समाधान गर्ने अवस्था छैन, उच्च तहबाटै कूटनीतिक स्तरमा कुरा गरेर मात्रै समाधान हुने अवस्था छ,’ प्रजिअ पौडेलले भने ।

७२ घण्टादेखि पानीमै
बहाव पश्चिमतर्फ फर्काएपछि सोमबार साँझबाट डुबेको हनुमानगर कंकालिनी नगरपालिका र तिलाठी कोइलाडी गाउँपालिकाका ५ सयभन्दा बढी घरआँगन अझै डुबानमा छन् । नगरपालिकाका प्रमुख प्रशासकीय अधिकृत यादबले अहिले बाढी पसेका घरहरु सार्नुको बिकल्प नभएको बताए ।

‘कोसी पश्चिम फर्काइसकिएको छ । अहिले डुबानमा परेका बस्तीहरुवाट अब निरन्तर कोशी बग्ने स्थिति छ । त्यसैले बस्ती सार्नुको बिकल्प छैन् ।’ उनले भने ।

स्थानिय तह र स्थानिय प्रशासन बस्ती सार्ने बिकल्प खोजीरहेका बेला बाढी घरमा पसेर बिस्थापित भएकाहरु भने आफूहरु घर सारेर कहा जाने भन्ने अन्योलमा छन् । पछिल्लो ३ दिनदेखी घरवार डुबेका मध्ये अधिकांस सुकुम्वासी छन् ।

बाढीपीडित क्षेत्रमा अहिले खानेपानीको अभाव देखिएको छ । सबै घरका ट्युवेलहरु डुवानमा परेकोले खानेपानीको अभाव भएको हो । बुधवार नगरपालिकाले भुजा,चिउरा,चाउचाउ,नुन लगायतका सामग्री सहित २ बोतलका दरले पानी बितरण गरेको थियो ।

प्रकाशित : भाद्र १४, २०७५ २०:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT