शिखले मनाए प्रकाश दिवस

कान्तिपुर संवाददाता

पर्सा — वीरगन्जका शिख समुदायले सोमबार गुरुग्रन्थ साहेवजीको प्रथम प्रकाश दिवस हर्षोल्लासका साथ मनाएका छन् ।

वीरगन्जस्थित गुरुद्वारामा सोमबार शिख समुदाय गुरु ग्रन्थ साहेवको प्रथम प्रकाश दिवस मनाउँदै । तस्विर : शंकर आचार्य

यहाँस्थित गुरुद्वारामा सोमबार बिहानै पूजापाठ शबदकीर्तन आयोजना गरी लंगर प्रसाद वितरण गरिएको थियो । यसका लागि भारतको झारखन्डस्थित धनवादबाट शबदकीर्तन गाउन एक टोली आएको छ ।

विश्वभरका शिख समुदायले सोमबारकै दिन यो पर्व एक साथ हर्षोल्लासका साथ मनाउने गर्दछन् । भारत पन्जाबको अमृतसरस्थित स्वर्ण मन्दिरमा यस दिन विशेष र भव्य कार्यक्रम हुने गरेको वीरगन्जका शिख समुदायका अगुवा जसपाल सिंह बताउँछन् ।

Yamaha

सन् १६०४ मा आजकै दिन स्वर्ण मन्दिर परिसरमा शिख धर्मका पञ्चम गुरु अर्जनदेवजी महाराजले गुरुग्रन्थ साहेवलाई विशेष धर्मग्रन्थका रूपमा पूजा गर्ने रीतिथिति बसालेका थिए । यस दिन गुरुग्रन्थ साहेवको जन्मदिन सरह मानिन्छ । त्यसअघिका शिख धर्मका गुरुहरूको गुरुवाणी तथा अन्य सन्तहरूको महत्त्वपूर्ण वाणीलाई पनि यस ग्रन्थमा संकलन गरी अर्जनदेवजी महाराजले ग्रन्थलाई विशेष रूप दिएका थिए ।

पछि १७ औं शताब्दीमा शिख धर्मका दशमगुरु गोबिन्द सिंहजी महाराजले गुरुग्रन्थ साहेवलाई थप व्यवस्थित बनाई आफूउपरान्त कोही व्यक्ति विशेषलाई नभई गुरुग्रन्थ साहेवलाई नै पूजाअर्चना गर्नु, त्यसबाटै गुरुकृपा प्राप्त हुन्छ भनी आफ्ना अनुयायीहरूलाई निर्देशन दिएका थिए । त्यति बेला उनले ५ पैसा र नरिवल हातमा लिएर गुरुग्रन्थ साहेवको ३ पटक परिक्रमा गरेका थिए ।

गुरु गोबिन्द सिंहजी महाराजको देहान्तपछि उनकै निर्देशनअनुरूप जीवित धर्मगुरुका रूपमा शिख समुदायले गुरुग्रन्थ साहेवलाई नै मानेर पूजाअर्चना गर्दै आएका छन् । यो समुदायले जन्म, विवाहदेखि महत्त्वपूर्ण संस्कारहरूमा गुरुग्रन्थ साहेवलाई विशेष पूजाअर्चना गरी आशिर्वाद लिने गरेका छन् ।

Esewa Pasal

प्रकाशित : भाद्र २६, २०७५ ०९:१५
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पुलको काम रोकियो

ठेक्का लुम्बिनीको नाममा भए पनि लगानी पप्पु कन्स्ट्रक्सनको
शिव पुरी

रौतहट — ठेकेदारले पुरानो दररेटमा निर्माणको काम गर्न नसक्ने भन्दै निहुँ खोज्न थालेपछि यहाँको राजदेवी नगरपालिका–३ स्थित निर्माणाधीन अवस्थामा काम बन्द छ । यसले रौतहट–सर्लाही सीमा पुलको निर्माण कार्य अन्यौल बनेको छ ।

रौतहटको राजदेवी नगरपालीकास्थित रौतहट–सर्लाही जोड्ने बागमती नदीमा अलपत्र छाडिएको पुल । तस्बिर : शिव

हुलाकी सडक आयोजनाले ठेकेदारलाई काम सुरु गर्न पटकपटक पत्राचार र मौखिक रूपमा अनुरोध गर्दै आएको छ । तर उसले मानेको छैन । निर्माण कम्पनीले नयाँ दररेट कायम नभएसम्म काम नगर्ने अडान लिएपछि काम सुरु हुन नसकेको हो ।


हुलाकी सडक आयोजना योजनाअन्तर्गत दुबै जिल्लाको सीमा जोड्ने गरी निर्माणाधीन अवस्थामा ४ वर्षदेखि बन्द भएको पुलको काम सुचारु गर्न निर्माण कम्पनी लुम्बिनी बिल्डर्सले नमानेको हो । ठेक्का लुम्बिनीको नाममा भए पनि लगानी पप्पु कन्स्ट्रक्सनको हो । हुलाकी आयोजना निर्देशनालयले २ महिना अघि नै काम सुरु गर्न निर्माण कम्पनीलाई पत्राचार गरिसकेको छ ।


तर ठेकेदारले पुरानो दररेटमा काम गर्न नसक्ने भन्दै पन्छिएको छ । यस विषयमा पटकपटक सम्बन्धित ठेकेदारलाई बोलाएर निर्देशनालयमा छलफल समेत गरिएको निर्देशनालयका कामु निर्देशक श्यामप्रसाद खरेलले बताए । ‘पुल निर्माणका लागी ठेकेदारलाई २ महिनाअघि नै पत्राचार गरिसकेका छौ,’ उनले भने, ‘आयोजनाले ९० दिनसम्म साइड उपलब्ध नगराइएको र ठेक्का तोड्ने निवेदन दिइसकेकाले काम गर्न नसक्ने भनेर पन्छिन खोजेका छन् ।’


निर्माण कम्पनीका तर्फबाट नयाँ प्रस्ताव आएपछि निर्णय लिने खरेलले जनाए । सुरु गर्न सम्बन्धित ठेकेदारले अस्विकार गरेको छ । उक्त पुलको ठेक्का लुम्बिनी बिल्डर्सको नाममा भए पनि लगानी पप्पु कन्स्ट्रसनले गरेको हो । पुल निर्माणको काम बन्द भएपछि ठेकेदारले ठेक्का रद्द गर्न निवेदन दिएको दाबी गरेको छ । ९० दिनसम्म साइड उपलब्ध नभएपछि ठेक्का रद्द गर्न सक्ने प्रावधान रहेकोले त्यसैमा पप्पुको अडान छ ।


समयमा पुल नबेको भन्दै चौतर्फी दबाब खेपिरहेको आयोजनाले पुलको डिजाइन सहित ठेकेदारलाई निर्माणको काम सुरु गर्न पत्र पठाएको थियो । निर्माणका लागि छलफल गर्न पुल महाशाखाको प्रमुख सहित लुम्बिनी बिल्डर्सका निर्देशक विष्णु शर्मा, पप्पु कन्स्ट्रसनका तर्फबाट सुमित रौनीयार लगायतका बसेका थिए । सुमित संघीय समाजबादी फोरमका सांसद हरिनारायण रौनीयारका छोरा हुन् ।


४ वर्ष अघिको दररेटमा काम गर्न नसक्ने र ठेक्का तोडेको निवेदनलाई आधार बनाई ठेकेदार रौनीयार पन्छिन खोजेको हो । चाँडै यकिन प्रस्ताव ल्याउन आयोजनाले ठेकेदारलाई भनेको छ । ठेकेदारले पुल निर्माणको कामको पुन टेन्डर आह्वान गर्न अनुरोध गरेको छ । उसले नयाँ दररेटमा ठेक्का रद्दको अडान लिएको छ ।


पप्पुले पुल निर्माणको क्रममा जग खन्ने क्रममा निस्केको माटो व्यवस्थापनमा चासो दिदा साविकभन्दा पूर्वबाट खोला बग्न थाले पछि निर्माणको काम तत्काल रोकिएको हो । पुल एकातिर खोला अर्कोतिर बग्न थालेपछि निर्माणको काम रोकिएको पुल महाशाखाका डिई अर्जुन थापाले बताए । ‘पुल निर्माणको क्रममा ठेकेदारले पिलरको जग खनेर निस्कने माटो अन्यत्र व्यवस्थापन गर्नु पथ्र्यो,’ उनले भने,’ त्यसो नगर्दा नदीले धार परिवर्तन गर्‍यो । र काम बन्द गर्नुपर्ने अवस्था आयो । यसमा ठेकेदारको लापरबाही देखिन्छ ।’ उक्त पुल निर्माणको काम पप्पुले गरेको हो ।


खोला पूर्णरूपमा सर्लाहीतिर बग्न थाले पछि समस्या भएको हो । अहिले पुल सुख्खा भएको स्थानमा छ । खोला पुल नै नभएतिर बगिरहेको छ । माटो हटाइदिएको भए समस्या नआउने प्राविधिकहरू बताउँछन् । पिलर तलको सबै माटो बगाइसकेको छ । ठेकेदारले पिलर निर्माणका बेला निस्कने माटो अन्यत्र व्यवस्थापन गर्नुपर्ने नियम छ । बागमतीमा पप्पुले त्यसो गरेको पाइँदैन ।


पुल निर्माणको ठेक्का सकार गर्ने बेला पप्पु कन्स्ट्रक्सन कालो सूचीमा परेकाले उसले अर्काको नामको फर्ममा बागमती पुलको निर्माणको ठेक्का सकार गरेको हो । लुम्बिनी बिल्डर्सका प्रबन्ध निर्देशक शर्माले फर्म आफ्नो भए पनि बागमती पुलेको काममा लगानी पप्पुले गरेको बताए । ‘बागमतीको पुलको काम पप्पुकै हो,’ उनले भने, ‘लुम्बिनी बिल्डर्सको फर्म मात्र प्रयोग गर्नु भएको हो ।’ पप्पुले देशभर पुल निर्माणको काम सकारेर त्यतिकै अलपत्र छाडेको छ ।


पुलकै कारण गएको शनिबार टिकुलीया घाटमा डुंगा दुर्घटना हुँदा ५ जनाको मृत्यु भएको थियो । हुलाकी आयोजना निर्देशनालयले नदीलाई पुरानै अवस्थामा फर्काउने गरी तयारी थालेको छ । यसो गर्दा पुल निर्माण सम्पन्न गर्न सहज हुने बताइएको छ । खोला पूर्णरूपमा सर्लाहीतिर बग्न थालेपछि समस्या भएको हो । नदीको धार फर्काउन प्राविधिक सहितको टोलीले स्थलगत हेरी प्रतिवेदन दिइसकेको छ । अब नदी नियन्त्रण गरी चाँडै धार परिवर्तन गरी पुरानै स्थानमा खोला ल्याइने पुल महाशाखाका डिई थापाले बताए । त्यसका लागि नदी नियन्त्रण गरी धार फकाइने तयारी थालेको उनले सुनाए । सबै समस्या हल हुन थालेको अवस्थामा पप्पुले पुरानो दर रेटको बाहना बनाएको छ ।


पुलको २०६७ जेठ ३१ गते सम्झौता भएको हो । २०७० जेठ ३० गते निर्माणको काम सम्पन्न गर्नुपर्ने सम्झौतामा उल्लेख छ । कामु निर्देशक खरेलले पुल निर्माण गरिएको भन्दा ८ सय मिटर पूर्वबाट खोला बग्न थालेपछि काम रोकिएको बताए । पुलको लम्बाइ ६३३ मिटर हो । चौडाइ डबल लेन्थको छ । पुलको १७ वटा पिलरको काम सकिएको छ । अब सुपर स्टक्चरको काम बाँकी छ । परामर्शदाताले दिएको प्रतिवेदनअनुसारको काम बाँकी छ ।


निर्देशनालयका अनुसार अहिलेसम्म ६० प्रतिशत बढी काम सकिएको छ । लुम्बिनी बिल्डर्स प्रालि सिद्धार्थनगरले ३५ करोड ८९ लाख ९ हजार ४ सय ३३ रुपैयाँमा ठेक्का सकार गरेको हो । सम्पूर्ण कामको जिम्मा पप्पु कन्स्ट्रक्सनले लिएको छ । नाम लुम्बिनीको भए पनि काम पप्पु कन्स्ट्रक्सनले गर्ने ठेकेदार बीच सहमति भएको पाइएको छ । तत्कालीन प्रधानमन्त्री माधवकुमार नेपालले पुलको शिलान्यास गरेका हुन । अहिले पिलरको काम बाहेक भएको छैन ।


लामो समयदिेख पुल अलपत्र परेको भन्दै पूर्वप्रधानमन्त्री नेपालले आक्रोस पोखेका छन् । काम रोकिएपछि ठेकेदार र उसका प्रतिनिधि कोही पनि निर्माणस्थलमा आएका छैनन् । स्थानीय सीताराम उपाध्यायले समयमा पुल बनेको भए रौतहट र सर्लाहीका मानिसलाई आवतजावत गर्न सहज हुने बताए । अहिले दुबै जिल्लाका मानिस डुंगा चढेर वारपार गर्छन् । वारि बतसपुर, बडहर्वा, राजदेवी लगायतका स्थानीय डुंगा चढेर पारि खेतमा काम गर्न जान्छन् । पुल बनेपछि रौतहट सर्लाहीका स्थानीयलाई सुविधा हुन्छ ।

प्रकाशित : भाद्र २६, २०७५ ०९:१३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT