धमाधम राजीनामा दिँदै नर्स

शिव पुरी

भरतपुर — रोजगारी भरपर्दो नहुँदा चितवनका विभिन्न निजी तथा सरकारी अस्पतालमा कार्यरत स्टाफ नर्सलाई टिकाउन मुस्किल परेको छ । उनीहरू धमाधम राजीनामा दिएर बिदेसिन थालेपछि यहाँका अस्पताललाई समस्या भएको हो । अधिकांशले अध्ययनको कारण खुलाएर राजीनामा दिने गरेका छन् । जिल्लाका विभिन्न अस्पतालमा २ हजार हाराहारी नर्स कार्यरत छन् । 

चितवनस्थित कलेज अफ मेडिकल साइसेन्सको इमर्जेन्सी वार्डमा बच्चाको उपचारमा संलग्न चिकित्सक तथा स्टाफ नर्सहरू । चितवनका विभिन्न निजी तथा सरकारी अस्पतालमा कार्यरत स्टाफ नर्सले धमाधम राजीनामा दिएर बिदेसिन थालेका छन् ।तस्बिर : शिव/कान्तिपुर

तीमध्ये बर्सेनि २ सय हाराहारीमा राजीनामा दिई बाहिरिने गरेका छन् । उनीहरूले अध्ययन, विवाह र रोजगारीका लागि विदेश जाने बाहना बनाएर राजीनामा दिने गरेका हुन् । यसरी राजीनामा दिँदा अस्पतालको स्वास्थ्य सेवा प्रभावित हुने गरेको सम्बन्धित अस्पतालले जनाएको छ । तराईलगायत धादिङ, गोरखा, नवलपरासी, लमजुङ, तनहुँ जिल्लाबाट नर्सिङ अध्ययनका लागि यहाँ आउँछन् । उनीहरू अध्ययन सकेर विभिन्न निजी तथा सरकारी अस्पतालमा स्थायी, अस्थायी र करार सेवाका काम गर्छन् ।
एक वर्षको उनीहरू अनुभव पत्र लिएर राजीनामा दिने गरेका हुन् । अध्ययन सकेपछि अस्पतालमा लामो समयसम्म स्वयंसेवकका रूपमा काम गर्नुपर्ने र रोजगारीको अवसर पाउन नसकेपछि राजीनामा दिएर जाने गरेको नर्सिङ संघ चितवनका अध्यक्ष माया पाण्डेले बताइन् । ‘सुरुमा धेरै कष्ट गरेर पढ्नुपर्छ,’ उनले भनिन्, ‘पछिल्लो समय विदेश र अन्य अस्पतालमा अवसर पाएपछि राजीनामा दिने गरेका हुन् । राजीनामा दिने र नयाँ भर्ना हुने काम गर्ने क्रम चलिरहन्छ ।’ पाण्डेका अनुसार चितवनमा मात्र वर्षमा ४ सय ८० स्टाफ नर्स उत्पादन हुन्छन् । उनीहरू रोजगारीको अवसर खोजेर विभिन्न अस्पताल चाहर्छन् । चितवनलाई मेडिकल राजधानी भनिन्छ । यहाँ ठूला/ठूला अस्पताल छन् । १३ वटा नर्सिङ कलेज छन् । तिनमा विभिन्न तहका नर्सिङ कोर्स अध्ययन गराइन्छन् । नेपालभर ७४ हजार ८ सय ४० स्टाफ नर्स रहेको अध्यक्ष पाण्डेले जानकारी दिइन् । चितवन नेपालको मध्यपश्चिम क्षेत्रको व्यापारिक नगर पनि हो । यस क्षेत्रमा ठूला र पोलिक्लिनिक, क्लिनिकसहित ९८ वटा अस्पताल छन् । सरकारी अस्पताल ४ वटा छन् । २ वटा मेडिकल कलेज छन् । कलेजमा ठूलो संख्यामा नर्सहरू कार्यरत छन् । साउनयता यहाँस्थित बीपी कोइराला मेमोरियल क्यान्सर अस्पतालबाट स्टाफ नर्सहरू सविना पौडेल, सुस्मिता श्रेष्ठ, सुधा पौडेललगायतले राजीनामा दिएका छन् । उनीहरू अध्ययनका लागि भन्दै राजीनामा दिएर गएको अस्पतालले जनायो ।
अघिल्लो वर्ष क्यान्सर अस्पतालबाट ९ जनाले राजीनामा दिएर विदेश गएका थिए । सबैभन्दा धेरै भरतपुर अस्पतालका स्टाफनर्सहरूले राजीनामा दिएको तथ्यांक छ । अस्पताल प्रमुख डा. रुद्र मरासिनीले अघिल्लो आवमा १ सय ४८ जना स्टाफ नर्सले राजीनामा दिएर गएको बताए ।
साउनयता ६० जनाले अस्पताल छाडिसकेका छन् । अध्ययनका लागि विदेश जाँदा अस्पतालले अनुभव पत्रको सिफारिस दिने गरेको छ ।
एक वर्षको अनुभवपछि बाहिर स्नातक पढ्न सजिलो हुन्छ । कतिपय अस्पतालले दरबन्दी नै नभए पनि स्टाफ नर्स भर्ना गर्छन् । चितवन मेडिकल कलेजमा साउनयता ३० जना स्टाफ नर्सले
राजीनामा दिइसकेका छन् । राजीनामा दिएकी एक स्टाफ नर्सले अध्ययनका
लागि अस्ट्रेलिया जान लागेको बताइन् । यहाँका कलेज अफ मेडिकल साइन्सेसबाट समेत स्टाफ नर्सहरू राजीनामा दिई बाहिरिएका छन् ।

प्रकाशित : फाल्गुन १, २०७४ ०८:३१
ADVERTISEMENT
प्रतिक्रिया
पठाउनुहोस्

नीलकण्ठ नगरपालिका ‘स्मार्ट सिटी’ बनाइने

हरिहरसिंह राठौर

धादिङ — राजधानीसँग जोडिएको पहिलो नगरपालिकालाई ‘स्मार्ट सिटी’ बनाउन व्यापक तयारी भइरहेको छ । सदरमुकाममा पर्ने नीलकण्ठ नगरपालिका– भित्रका सरकारी र गैरसरकारी कार्यालयबाट प्राप्त हुने सेवासुविधा थाहा पाउन अबदेखि अनिवार्य रूपमा सूचना प्रविधिको प्रयोग गर्नुपर्नेछ । नगरपालिकाले ‘मेरो नीलकण्ठ, मेरो मोबाइल’ एप्सको घोषणा गर्ने तयारी गर्दै छ ।

‘नगरबासीहरूका हातहातमा रहेका मोबाइलमा ‘स्थानीय आवश्यकता, सरकारी कार्यालय तथा गैरसरकारी संघसंस्थाहरूले दिने सेवासुविधा, नगरमा सञ्चालित परियोजना र विकास निर्माण, विनियोजित बजेट सबै एप्सबाटै थाहा पाउन सकिनेछ,’ नगरप्रमुख भीमप्रसाद ढुंगानाले भने ।
नगरपालिकाका १५ हजार घरधुरीका ७० हजार जनसंख्यामा सूचना र प्रविधिको पहुँच पुर्‍याई सबै वडामा वाईफाईमार्फत द्रूत गतिको इन्टरनेट सेवा सन्जाल विस्तार गरिने पनि ढुंगानाले जानकारी गराए । त्यसका लागि सदरमुकाम वरपरका डाँडाहरू जुरेथुम, मुरली भन्ज्याङलगायतका स्थानमा टावर पनि निर्माण भइसकेको छ । आन्तरिक पर्यटकलाई मनोरञ्जनका लागि आकर्षण गर्न नगर क्षेत्रकै ४ स्थानमा मनोरम पार्क निर्माणका लागि पनि ८० लाख बजेट विनियोजन गरिएको छ ।
नगरपालिकाका कृष्ण मन्दिर क्षेत्र, सेराकान्ला, सिरानवजार र पौवामा निर्माण गरिने पार्क निर्माणका लागि आर्थिक र प्राविधिक प्रस्ताव तयार भई आधारभूत भौतिक निर्माणको थालनी भइसकेको नगरपालिकाले जनाएको छ ।
‘पार्कहरूमा समेत द्रूतगतिको इन्टरनेट उपलब्ध गराएर नगरपालिकाले स्वदेशी तथा विदेशी पर्यटक र विद्यार्थीलाई आकर्षण गर्ने नगरपालिकाको लक्ष्य छ,’ नगरपालिकाका सल्लाहकार दीपक कोइरालाले भने । नगरक्षेत्रका बासिन्दालाई सूचना र प्रविधि प्रयोगका लागि नमुना बनाउन माइक्रोसफ्ट इनोमेसन सेन्टरसँग करिब डेढ करोडमा सम्झौता गरिएको छ । नगरभित्रका १४ वटै वडामा आपसी सन्जाल जोडेर दैनिक सेवा प्रवाह गरिने कोइरालाले बताए ।
नगरपालिकाभित्र सबै सरकारी र गैरसरकारी कार्यालय, नगरपालिकामा रहेका सबै शैक्षिक संस्था र विद्यालय, स्वास्थ्य संस्थालाई इन्टरनेट प्रविधिमा जोडेर नगरपालिकाको प्रत्यक्ष निगरानीमा सेवा प्रदान गर्ने तयारी अन्तिम चरणमा पुगेको छ । ‘ई–नगरपालिका निर्माणका लागि आवश्यक पूर्वाधारको तयारी सुरु भएको छ,’ नगरपालिकाका प्रमुख प्रशाासकीय अधिकृत जगन्नाथ लामिछानेले भने, ‘अझै धेरै काम गर्न बाँकी रहे पनि आउँदो आर्थिक वर्षअगावै हामी ई–नगरपालिका निर्माण गरिसक्छौं ।’
‘३ नं. प्रदेशको मात्र नभई सम्भवत: देशकै पहिलो ई–नगरपालिका बन्ने तयारीमा छ नीलकण्ठ नगरपालिका,’ पत्रकार महासंघका जिल्ला सभापति नवराज छत्कुलीले भने, ‘जनप्रतिनिधि आएपछि विकासको गति अगाडि बढ्छ र विकासको गति रोकिँदैन भन्ने मान्यता यो नगरापालिकाले व्यवहारमा उतार्न खोजेको छ ।’ नगरपालिकाभित्रका अधिकांश कार्यालयहरूमा ई–हाजिरी गत कात्तिकबाटै सुरु भइसकेको र बाँकी कार्यालयमा पनि प्राविधिक तयारी अन्तिम चरणमा पुगेको लामिछानेले बताए । निर्वाचनलगत्तै विदेशी दातृ निकायले पनि नगरपालिकासँग सहकार्य गरी विकास निर्माणमा सघाउ पुर्‍याउन खोजेका छन् ।

प्रकाशित : फाल्गुन १, २०७४ ०८:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT