४३ करोड लागत बढ्ने

रमेशकुमार पौडेल

चितवन — मुग्लिन–नारायणगढ सडक विस्तारमा थप समय मात्र होइन लागत पनि बढ्ने भएको छ । सम्झौताअनुसार गत वर्षको वैशाखमा सकिनुपर्ने सडक निर्माणको काम अझै २० प्रतिशतभन्दा बढी बाँकी नै छ ।

मुग्लिन– नारायणगढ सडक खण्डमा सोमबार भइरहेको सडक विस्तार कार्य ।तस्बिर : रमेशकुमार/कान्तिपुर

सडक निर्माणको लागत पनि सुरुको अनुमानभन्दा झन्डै ४३ करोड रुपैयाँ बढ्ने सम्भावना रहेको नारायणगढ मुग्लिन सडक आयोजनाका अधिकारीले बताएका छन् ।

Yamaha

‘अहिले नै सुरुको लागतभन्दा ३२ करोड रुपैयाँ बढी लाग्ने पक्कापक्कीजस्तै भयो । अन्तिमसम्म यो रकम ४३ करोड रुपैयाँसम्म पुग्ने सम्भावना छ,’ आयोजनाका सूचना अधिकारी शिव खनालले बताए ।
सडकलाई एसियाली मापदण्डअनुरूप दुई लेनको बनाइँदै छ । यसको लागत २ अर्ब ८८ करोड ७० लाख १४ हजार २ सय १० रुपैयाँ ३६ पैसा हो ।

दुई वर्षमा काम सक्ने भन्दै सन् २०१५ को अप्रिलमा सडक विस्तारको सम्झौता भएको थियो । तर काम नसकिएपछि अहिलेसम्म ३ पटक म्याद थप भइसकेको छ । तेस्रो पटक थपेको म्याद फागुनको पहिलो सातामा सकिइसकेको छ । अहिले जेठसम्म काम सक्ने गरी चौथो पटक म्याद थपको प्रक्रिया सुरु भएको छ । सडक विस्तारको हालसम्म ७९ प्रतिशत काम सकिएको आयोजनाले जनाएको छ ।
‘सुरुको लागतको आधारमा ७९ प्रतिशत काम सकियो । लागत बढेमा यो प्रगति केही घट्न पनि सक्छ,’ खनालले बताए । पहिरो लगायतका कारणले सुरुको भन्दा लागत बढेको उनको भनाइ छ । ‘पहिरोका कारण दुई हजार घन मिटर मात्रै माटो ढुंगा पन्साउनुपर्ला भन्ने सुरुको अनुमानविपरित लाखौं घन मिटर माटो पन्सयाउनुपरेको छ । यसले पनि लागत बढायो,’ खनालले भने । पहिरो गएपछि चार किलो मिटरभन्दा बढी पर्खाल लगाउनुपरेका कारण पनि लागत बढ्न गएको उनले बताए । ‘यो बाहेक सडक
९ देखि ११ मिटर चौडा हुनेभनिएको छ । ११ मिटर चौडा भएको ठाउँमा पहिला नौ मिटर मात्रै कालोपत्रे गर्ने भन्ने थियो । पछि सबै कालोपत्रे गर्ने भनियो । यसका कारण पनि लागत बढ्ने भएको हो,’ खनालले भने ।

गोरखा नारायणगढ सडकका रूपमा चीन सरकारको सहयोगमा विसं. २०३६ सालमा यो सडक बनेको हो । मुग्लिनमा यो सडकले पृथ्वी राजमार्गलाई छोएको छ । जसका कारण यो सडक राजधानी काठमाडौंलाई देशको पूर्व र पश्चिम भागसँग जोड्ने मुख्य मार्ग हो । नारायणगढदेखि मुग्लिनसम्म यो सडकको दूरी ३६ किलो मिटर छ । साढे पाँच मिटर मात्रै चौडा सडकलाई फराकिलो बनाउन विश्व बैंकको ऋण सहयोगमा विस्तारको काम सुरु भएको हो ।

चितवनको आँपटारीदेखि १६ किलो मिटरसम्म सडकको चौडाइ ११ मिटर हुने छ । त्यसपछि मुग्लिनसम्म नौ मिटर चौडा बनाइन लागेको हो । अहिले धमाधम कालोपत्रेको काम हुँदै गरेको छ । कुल बजेटको लगभग ६० प्रतिशत रकम कालोपत्रेमा नै खर्च हुने इन्जिनियर खनालले बताए ।

Esewa Pasal

प्रकाशित : फाल्गुन २९, २०७४ ०८:३८
प्रतिक्रिया
पठाउनुहोस्
ADVERTISEMENT

एकै वर्षमा बने ९ झोलुंगे पुल 

खोला तर्ने क्रममा बर्सेनि २ देखि ५ जनाको बगाएर मृत्यु हुने गरेको थियो 
प्रताप विष्ट

हेटौंडा — मकवानपुरमा एकै वर्षमा ९ झोलुंगे पुल निर्माण भएका छन । निर्माण भएका झोलुंगे पुलमध्ये ३ वटाले तुइन विस्थापित गरेका छन् । 

मकवानपुर गढी गाउँँपालिका अन्तर्गत पर्ने सामरी खोलामा निर्माण गरेको पुलले तुइन विस्थपित गरेको छ भने भीमफेदी गाउँँपालिकाअन्तर्गत त्रिखण्डे मन्दिरनजिक निर्माण भएको झोलुंगे पुल निर्माण भएपछि स्थानीयलाई तुइनको सहारामा खोला पार गर्नुपर्ने बाध्यता अन्त्य भएको छ । ‘जिल्लामा गत आर्थिक वर्षमा ९ झोलुंगे पुल निर्माण भए पनि ३ वटामात्रा तुइन विस्थापित भएका छन्,’ जिल्ला प्राविधिक कार्यालयका प्रमुख इन्जिनियर सोमनाथ तिम्लसेनाले भने, ‘जिल्लामा अन्य झोलुंगे पुल निर्माण गरी पूर्णरूपमा तुइन विस्थापित गर्ने कार्य बाँकी नै छ ।’ मकवानपुरमा क्षेत्रगत कार्यक्रम अन्तर्गत स्विस सरकारको सहयोगमा जिल्लाको ग्रामीण भेगमा आर्थिक वर्ष ०७३/०७४ मा ७ झोलुंगे पुल निर्माण भइसकेका छन् भने केन्द्रीय बजेटमा तुइन विस्थापित गर्न २ झोलुंगे पुल निर्माण भएका छन् ।
‘बेतेघारी र गोपीराङ बस्तीको बीचमा पर्ने मनहरी खोलामा पुल निर्माण भएपछि विद्यार्थीहरू नियमित पढन आउने गरेका छन्,’

बेतेघारीस्थित देवी प्राथमिक विद्यालयका शिक्षक कर्ण चेपाङले भने, ‘झोलुंगे पुलको निर्माणले गर्दा गोपीराङका विद्यार्थीलाई स्कुल आउन सहज भएको छ ।’ गोपीराङमा चेपाङ समुदायको मात्र बसोबास छ । पुलको अभावले गर्दा वर्षायाममा मनहरी खोला तर्ने क्रममा बर्सेनि गोपीराङका २ देखि ५ जनाको खोलाले बगाएर मृत्यु हुने गरेको थियो ।

यसैगरी, कैलाश गाउँँपालिकाको च्याखेटारमा पनि ३२ लाखमा पुल निर्माण भएको छ । पुलबाट एक सय ८० घरधुरी लाभान्वित भएका छन । अर्को पनि कैलाश गाउँपालिकाअन्तर्गत साविकको नामटार गाविस गर्दोवामा निर्माण गरिएको छ । पुलबाट ३ सय ५० घरधुरी लाभान्वित भएका छन् । राक्सिराङ गाउँपालिकाअन्तर्गत पर्ने साविकको खैराङ गाविसमा २ वटा पुल निर्माण भएका छन् । यसैगरी थाहा नगरपालिकाअन्तर्गत पर्ने साविकको आग्रा गाविसको घट्टेखोलामा ३२ लाखको लागतमा झोलुंगे पुल निर्माण गरिएको छ । ‘तोकिएको समयमानै पुलहरू निर्माण गरियो,’ राडो नेपालका इन्जिनियर चन्द्र योञ्जनले भने, ‘पुल निर्माण गर्न स्थानीयबासीहरूले मन खोलेर सहयोग गरेकाले समयमा नै पुलको काम सम्पन्न भएको हो ।’

करिब ६ करोडको लागतमा निर्माण गरिएका ९ वटा झोलुंगे पुलबाट करिब २ हजार १ सय ३० घरधुरी लाभान्वित भएका छन् । जोखिम मोलेर तुइनबाट ओहोरदोहोर गर्ने ३ सय २० घरधुरीका बासिन्दाले पनि झोलुंगे पुलबाट ओहोरदोहोर गर्न थालेका छन् ।

मकवानपुरका विभिन्न खोलामा रहेका १० वटा तुइनमध्ये गत आवमा ३ वटा विस्थापित भएका छन् । अझै ७ वटा तुइन विस्थापित गर्न बाँकी रहेको जिल्ला समन्वय समिति मकवानपुरले जनाएको छ । मकवानपुरको पूर्वी क्षेत्रमा पर्ने बागमतीमा ३ वटा तुइन छन्। आमभञ्ज्याङ, निवुवाटार, कुलेखानी र भार्तामा गरी ७ वटा तुइनमार्फत १५ हजार मानिसहरु जोखिमयुक्त यात्रा गर्न बाध्य थिए।
जिल्लामा हालसम्म ७५ वटा झोलुंगेपुल निर्माण भइसकेका छन् । झोलुंगे पुल २०१९ सालमा
अमेरिकी सरकारको सहयोगमा निर्माण गरिएको हो ।

प्रकाशित : फाल्गुन २९, २०७४ ०८:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT