कांग्रेसद्वारा प्रदेशसभा बैठक अवरुद्ध
हेटौंडा — प्रमुख विपक्षी कांग्रेसको अवरोधपछि बिहीबारको प्रदेशसभा बैठक स्थगित भएको छ । सभामुख र उपसभामुख एकै दलको भएको, भूकम्पपीडित प्रभावित, मूल्यवृद्धि भएको, गिट्टी, ढुंगा, बालुवामा लगाइको कर बढी भएको, संविधानविपरीत जनयुद्ध शब्द प्रयोग भएको भन्दै कांग्रेसले अवरोध गरेको हो ।
बैठकमा विशेष समय लिएर बोल्दै प्रमुख विपक्षी दलका नेता इन्द्रबहादुर बाँनियाले अघिल्लो सरकारले ल्याएको अध्यादेश लत्याएर चिकित्सा शिक्षाको प्रतिस्थापन विधेयक ल्याउन लागेको भन्दै आपत्ति जनाउँदै सदन अवरोध गर्ने घोषणा गरे । त्यसपछि सभामुख सानुकुमार श्रेष्ठले बैठक शुक्रबार ११ बजेसम्मको लागि स्थगित भएको जानकारी गराएका थिए ।
दुई सातापछि बिहीबार बसेको प्रदेशसभा बैठकमा प्रदेश राजधानी सम्भाव्यता अध्ययन विशेष समितिको प्रतिवेदन पेस हुने कार्यसूची थियो । जेठ २६ गते प्रविवेदन पेस गर्दै समितिले प्रदेश राजधानीको लागि वर्णानुक्रमअनुसार काभ्रे, चितवन, नुवाकोट, भक्तपुर र मकवानपुर सिफारिस गरेको थियो । आजैको प्रदेश सभा बैठकमा ‘मुख्यमन्त्री मन्त्रीको पारिश्रमिक तथा सुविधा सम्बन्धमा व्यवस्था गर्न बनेको विधेयक’ मा परेका संशोधनसहितको प्रतिवेदन प्रस्तुत गर्ने कार्यसूची भए पनि स्थगित भएका कारण हुने सकेन ।
मर्यादाक्रम विवादका कारण लामो समय छलफल नै रोकिएको विधेयकमा दफावार छलफल भएर प्रतिवेदन तयार भए पनि पेस भएको थिएन । प्रदेश प्रमुखबाट प्रमाणिकरण भएका आर्थिक विद्येयक, विनियोजन विधेयक र कर तथा गैरराजस्व लगाउने तथा उठाउने सम्बन्धमा व्यवस्था गर्न बनेको विधेयकबारे सभालाई जानकारी गराउने कार्यसूची थियो ।
प्रकाशित : श्रावण ३, २०७५ १६:२४