करको नयाँ दर ल्याउने सहमतिपछि रत्ननगमा अनशन स्थगित
चितवन — रत्ननगर नगरपालिकाले करको दर अत्याधिक बढाएको भन्दै त्यसको विरोधमा रिले अनशनमा बसेका नेपाली कांग्रेस लगायतका सात दलसँग बुधबार मध्यरातमा सहमति भएको छ ।
करको नयाँ दर रेट कायम गर्न रत्ननगर नगरपालिकाका उप–मेयर बिमला दुवाडीको संयोजकत्वमा विज्ञ समूह गठन गर्ने सहमति भएको कांग्रेस रत्ननगरका सभापति रुपनराज घिमिरेले जानकारी दिए ।
उक्त समितिमा नगरपालिकाबाट तीनजना र संघर्ष समितिका तीनजना बस्ने छन् । समितिले करको दर सिफारिस गर्ने र विशेष नगरसभाले नयाँ दररेट कायम गर्ने सहमति भएपछि आइतबारदेखि नगरपालिकामा सात दलले सुरु गरेको रिले अनशन पनि अन्त्य भएको छ । विशेष नगरसभाले तोकेपछि मात्रै नयाँ दररेट लागु हुने सहमति भएको छ । रत्ननगरमा एकीकृत सम्पत्ति कर अत्याधिक बढेको गुनासो थियो ।
आन्दोलनरत सात दलले साउन १४ गते सोमबार नगरपालिकामा ज्ञापनपत्र बुझाएका थिए । त्यसपछि पनि केही चासो नदिएपछि २४ गते कर शाखामा धर्ना दिएका थिए । दलहरुले २५ गते नगरपालिका गेटमा कोणसभा गरेर दवाव दिए । तर सुनुवाइ नभएपछि रिले अनशन बस्नु बस्न सुरु गर्नु परेको काँग्रेसका नगर सभापति रुपनराज घिमिरेले बताए ।
नगरपालिकाको विरोधमा सत्तारुढ नेपाल कम्युनिष्ट पार्टी बाहेकका बाम घटक पनि सामेल थिए । कांग्रेस, नेकपा (माले), राष्ट्रिय जनमोर्चा, मोहन बैद्य निकट देशभक्त जनगणतान्त्रिक मोर्चा (देजमो), राप्रपा, राप्रपा (प्रजातान्त्रिक) र नयाँ शक्ति पार्टी–नेपालले संयुक्त रिले अनशन सुरु गरेका थिए । रत्ननगर चितवनको दोस्रो ठूलो नगरपालिका हो ।
बुधबार मध्यरातमा भएको सहमति पत्र पढेर सुनउाँदै कांग्रेस नगरसभापति रुपनराज घिमिरे । नगरपालिकामा करको विरोधमा गर्दै आएको रिले अनशन लगायतका आन्दोलन अन्त्य भएको छ ।
प्रकाशित : श्रावण ३१, २०७५ १०:०६
