संहिताबारे छलफल

उक्त कार्यक्रममा प्रदेश ३ का मुख्यमन्त्री डोरमणि पौडेलले कानुनको घेरामा पर्ने आशंकाले अपराध तथा फौजदारी संहिताको विरोध सुरु भएको दाबी गरे । उनले विगतमा उपभोग गरिरहेको अधिकार खोसिने आशंकामा विरोध सुरु भएको बताए ।

‘पत्रकार र डाक्टरबाट यसको विरोध सुरु भइसकेको छ,’ उनले भने, ‘मुलुकलाई समुन्नत र सफल बनाउनका लागि पनि कानुन कार्यान्वयन गर्न सबैले सघाउनुपर्छ । उनले पत्रकारहरूले नकारात्मक कुरालाई मात्रै प्राथमकिता दिएको भन्दै त्यस्तो प्रवृतिले मुलुक निर्माणमा सहयोग नगर्ने बताए ।

आन्तरिक मामिला तथा कानुनमन्त्री शालिकराम जमरकट्टेलले नयाँ संहिता ऐनले राजनीतिक परिवर्तनअनुसारको स्पिरिट समातेको तर्क गरे । उनले प्रहरी, मिडिया र स्वास्थ्य क्षेत्रबाट देवानी, फौजदारी संहिताको विरोधका स्वर सुनिन थालेको भन्दै छाडातन्त्र रहेकोले व्यवस्थित गर्न खोज्दा विरोध भएको दाबी गरे । उच्च अदालत पाटनको हेटौंडा इजलासका न्यायाधीश पुष्पराज कोइरालाले विगतको भन्दा सरल भए पनि नयाँ भएकोले कार्यान्वयनको क्रममा चुनौती आउन सक्ने दाबी गरे ।