पुलबाट सवारी सञ्चालन

कान्तिपुर संवाददाता

रसुवा — बाढीले क्षति पुर्‍याएको गोसाइँकुण्ड गाउँपालिका–२ घट्टेखोलाको पुल मर्मतसँगै बिहीबारबाट डिभिजन सडक कार्यालय नुवाकोटले यातायात सञ्चालन गर्न अनुमति दिएको छ ।

एक महिनाअघि बाढीले पुलको जगमा क्षति गरेको थियो । मर्मत सकिएकोले पुलबाट यातायात सञ्चालन गर्न अनुमति दिएको डिभिजन सडक कार्यालय नुवाकोटका डिभिजन प्रमुख निरज शाक्यले बताए ।

घट्टेखोला पुल मर्मत भए पनि नाका नजिकै पहिरो गएकाले चीन जोडने एक मात्र अन्तर्राष्ट्रिय रसुवागढी नाकामा यातायात सञ्चालन हुन सकेको छैन् । पहिरोले क्षति गरेको रसुवागढी नाका नजिकैको सडक निर्माण गर्न बाँकी रहेको शाक्यले बताए । नाका नजिकैको पहिरो हटाउनका लागि ब्लास्टिङ गर्नुपर्ने छ । ब्लास्टिङ गर्न रसुवागढी जलविद्युत् आयोजनाले कम्प्रेसर उपलब्ध गराउने भएको छ ।

बाढीले क्षति गरेको घट्टेखोलाको पुल मर्मत गर्न पनि रसुवागढी जलविद्युत् आयोजनाले सहयोग गरेको आयोजना प्रमुख छवि गैरेले बताए । खोपाङ भीरमा पनि सडक छेउमा वाल लगाउने र सडकको कुनामा ब्लास्टिङ गर्ने तयारी डिभिजन सडक कार्यालय गरिरहेको छ । अहिले त्रिशूली खोला नजिकै गएको पहिरो हटाउने काम भइरहेको छ । धुन्चे–रसुवागढी सडक खण्डको आधा दर्जन ठाउँमा पहिरो झरेको छ । पहिरो गएको ठाउँमा सडक सुचारु गर्न डिभिजन सडक कार्यालय, रसुवागढी जलविद्युत् आयोजना, मैलुङ स्याफ्रु निर्माण कार्यदल र नेपाली सेनाले काम गरिरहेका छन् ।

रसुवागढी नाका नजिकैको पहिरो, घट्टेखोलाको पुललाई बाढीले पुर्‍याएको क्षति र गोसाइँकुण्ड गाउँपालिका– ५ को खोपाङ भीरको पहिरोले यातायात अवरुद्ध गरेपछि एक महिनादेखि नाका ठप्प छ ।

नाकामा यातायात ठप्प भएपछि स्याउ, लसुनलगायत सामग्री कुहिन थालेका छन् । चाडवार्डका लागि नेपाल ल्याउन लागिएका अर्बाैं मूल्यका सामान चीनको केरुङमा थन्किएका छन् । करिब १ हजार २ सय कन्टेनर बराबरको सामान केरुङमा थन्किएको व्यवसायीले बताएका छन् । भूकम्पले तातोपानी नाका बन्द भएपछि प्रमुख नाकाका रूपमा सञ्चालित रसुवागढी नाकासमेत अवरुद्ध हुँदा व्यवसायीले झन्झट बेहोर्नुपरेको छ ।

यातायात अवरुद्ध हुँदा सामान बोकेका सयौं कन्टेनरहरू बाटैमा अलपत्र परेका छन् । स्याउलगायत कुहिने सामग्रीहरू व्यवसायीले बोकाएरै राजधानी ल्याइरहेका छन् । यातायात अवरुद्ध भएपछि रसुवा भन्सारको कारोबार ठप्प छ । दैनिक करोडौं राजस्व असुल हुने नाका सुनासान छ । एक महिना भयो भन्सारमा राजस्व नउठेको रसुवा भन्सार कार्यालयका प्रमुख भन्सार अधिकृत गोपाल कोइरालाले भने ।

प्रकाशित : भाद्र १७, २०७५ ०८:५६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

‘वडा कार्यालयबाटै सेवा देऊ’

कान्तिपुर संवाददाता

रामेछाप — संघीय संरचनाले घरदैलोमा सरकारको कल्पना गरी स्थानीय सरकारलाई महत्त्वपूर्ण जिम्मेवारी दिएको छ । तर मन्थली नगरपालिकामा भने वडा केन्द्रमै सरकार छैन ।

वडा कार्यालयहरू केन्द्र अर्थात् तोकिएको स्थानमा बसेका छैनन् । केही वडामा साइनबोर्ड झुन्डयाइएका छन् तर कार्यालय खुल्दैनन् । नागरिकले सेवा लिन जिल्ला सदरमुकाममा रहेका वडाका सम्पर्क कार्यालयमा धाउनै पर्छ ।

नगरपालिकामा निर्वाचित भएको पहिलो बैठकमा नगर प्रमुख रमेशकुमार बस्नेतले नागरिकलाई घरदैलोमा सरकार भएको अनुभूति दिलाउनका लागि पहिलो कामनै वडा कार्यालयको स्थापना गर्नुरहेको बताएका थिए । उनले वडा अध्यक्षहरूलाई वडामै बसेर सेवा सञ्चालन गर्न निर्देशन पनि दिए । तर प्रमुखको निर्देशन वडा अध्यक्षहरूले टेरेका छैनन् ।

सुरुमा नगरपालिकाको मुख्यालयबाटै वडाको कार्य सञ्चालन गर्दै आएका वडाकार्याहरूलाई वडा व्यवस्थापन गर्न लाखौं रुपैयाँ उपलब्ध गराई बस्नेतले उक्त स्थानबाट निकालेका थिए । नगरपालिका कार्यालयबाट निस्केपछि भाडाको कोठा खोजेर वडा सञ्चालन हँुदै आएका हुन् ।

वडा कार्यालयमा प्राय: ताला झुन्डिरहेको हुन्छ, सेवा लिन मन्थलीमा जानुपर्ने गेलुका ज्ञानेन्द्र लामिछाने बताए । लामिछाने भूकम्पपीडित हुन् । उनको घर निरीक्षण गर्न इन्जिनियरसमेत गाउँमा पुगेनन् । ‘मलाई नै मन्थलीमा नै बोलाएर वडा कार्यालयमा तेस्रो किस्ताको फर्म भर्नुपर्‍यो,’ लामिछानेले गुनासो गरे । वडा कार्यालय गाउँमा नहँुदा घरघर घुमेर निर्माण कार्यको निरीक्षण गर्नुपर्ने इन्जिनियर पनि मन्थलीमै बस्न थालेको गुनासो गाउँलेको छ ।

वडा कार्यालयको बोर्ड राखेर पनि प्राय: सबै दिन बन्द हुने वडामा मन्थलीको वडा नम्बर २, ३, ४, ५, १०, ११ र १२ रहेका छन् । वडा नम्बर २ र ३ मा भने वडा कार्यालय नै खोलिएको छैन । उपयुक्त भवनको अभावमा वडा कार्यालय सम्बन्धित वडामा खोल्न कठिनाइ भएको वडा नम्बर २ का अध्यक्ष तरणीशंकर अधिकारीले बताएका छन् । मन्थली नगरपालिकामा १४ वडा छन् ।

जिल्लामा रहेका २ नगरपालिका र ६ गाउँपालिकामध्ये मन्थलीबाहेक अन्य स्थानीय तहका वडाहरूले सम्बन्धित वडामै बसेर सेवा प्रवाह गर्दै आएका छन् । वडा कार्यालयहरू जिल्ला सदरमुकाममा बसेको कुरामा चौतर्फी दबाब परेपछि प्रमुख जिल्ला अधिकारी कृष्णप्रसाद शर्माले मन्थली नगरपालिकालाई पत्र काटेर तत्काल सम्बन्धित वडाबाटै सेवा प्रवाहको प्रबन्ध गर्न निर्देशन दिएका छन् । उनले नागरिकको गुनासोलाई बढ्न नदिन जनप्रतिनिधिहरू बेलैमा सजग हुनुपर्नेमा जोड दिए ।

प्रकाशित : भाद्र १७, २०७५ ०८:५५
पूरा पढ्नुहोस्
प्रतिक्रिया
पठाउनुहोस्
ADVERTISEMENT