सरकारीमा न्युरो सेवा

रमेशकुमार पौडेल

चितवन — भरतपुुरको सरकारी अस्पतालमा एक वर्षअघि सञ्चालनमा आएको न्युरो युनिटले सर्वसाधारणलाई सुलभ दरमा उपचार सेवा दिएको दिँदै आएको छ ।

निजी अस्पतालमा भन्दा सरकारीमा १० गुणा कम खर्चमा उपचार हुने चिकित्सकहरू बताउँछन् । १२ शय्यासहित गत वर्षको साउनदेखि भरतपुर अस्पतालमा न्युरो युनिट सुरु भएको थियो ।

अस्पतालको न्युरो युनिटमा एक जना न्युरो सर्जन र दुई जना मेडिकल अफिसर छन् । ‘जनशक्ति कम हुँदा हुँदै पनि शल्यक्रिया र अन्य उपचार सेवा उल्लेख्य रूपमा भएको छ,’ न्युरो युनिट प्रमुख डा.गुणराज पौडेलले भने ।

Yamaha

बीपी कोइराला स्वास्थ्य विज्ञान प्रतिष्ठान धरानमा कार्यरत डा.पौडेल भरतपुर अस्पतालका तत्कालीन मेडिकल सुपेरिटेन्डेन्ड डा. रुद्र मरासिनीको योजनामा भरतपुर आएका हुन् । उपत्यका बाहिर सरकारी अस्पतालमा न्युरो युनिट छैन । ‘भरतपुरमा दुर्घटना लगायतका कारणले टाउको र मेरुदण्डमा चोट लागेका बिरामीहरू प्रशस्तै आउने गर्छन् । ती बिरामीले निजी अस्पतालमा महँगोमा उपचार लिनुपरेको छ । सुलभ दरमा उपचार सेवा दिन सरकारी अस्पतालमा नै न्युरो सेवा राख्ने सोच बन्यो,’ डा. मरासिनीले भने ।

दुर्घटनाका घाइतेहरू भरतपुरको सरकारी अस्पतालमा नल्याउने चलन थियो । ‘किन नल्याएको भन्दा सरकारी अस्पतालमा सिटी स्क्यान र न्युरो नै छैन, किन ल्याउने भनेर यातायात व्यवसायीहरूले भनेपछि सिटी स्क्यान र न्युरो सेवा सुरु भएको’ पूर्व मेडिकल सुपेसिटेन्डेन्ड डा. रुद्र मरासिनीले भने ।

अनेक प्रयास हुँदा पनि गाडी दुर्घटनाका घाइते अझै भरतपुर अस्पतालमा उपचारका लागि ल्याइँदैन । तर सर्वसाधारणले सेवा लिन पाए । न्युरो युनिट प्रमुख डा. पौडेलका अनुसार वर्ष दिनमा तीन सय जनाले सेवा लिएका छन् । ठूला र जटिलखालका शल्यक्रियाहरू पनि भएको उनले बताए ।

टाउकोभित्रको रगतको नशा फुलेको शल्यक्रिय जटिल खालको शल्यक्रिया हो । अस्पतालमा यस्तो शल्यक्रिया ६ वटा भएको डा. पौडेलले बताए । यो शल्यक्रिया जटिल हुने भएका कारण खर्च पनि धेरै हुन्छ ।

भरतपुर अस्पतालको न्युरो युनिटबाट वर्ष दिनमा ब्रेन टयुमरका १५ वटा शल्यक्रिया भएका छन् । मस्तिष्कमा पानी जम्ने समस्याका १० जनाको उपचार भएको छ । मस्तिष्कको पछिल्लो भागको स्नायुमा आएको समस्यासम्बन्धी ६ वटा शल्यक्रिया भएको छ । स्पाइनल टयुमरको पनि ६ वटा शल्यक्रिया भएको डा. पौडेलले जानकारी दिए ।

दुर्घटनाका कारण टाउकोमा लागेको चोटको २० वटा शल्यक्रिया भएको छ । मस्तिष्काघातका १२ वटा शल्यक्रिया भएका छन् । ‘प्राय: गरिब चेपाङहरूले सेवा लिने गरेका छन् । यहाँको उपचारका बारेमा जानकारी पाएकाहरू पूर्वी नेपालका विभिन्न ठाउँबाट पनि आउँछन्,’ डा. पौडेलले भने । सीमित पूर्वाधार र जनशक्तिका बीचमा पनि यति काम हुनु ठूलो कुरा भएको उनको दाबी छ ।

Esewa Pasal

प्रकाशित : भाद्र १९, २०७५ ०९:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

जनभावना अनुसार संहिता सुधार हुनुपर्छ : देउवा

रमेशकुमार पौडेल

चितवन — कांग्रेस सभापति तथा पूर्व प्रधानमन्त्री शेरबहादुर देउवाले मुलुकी ऐनलाई हटाएर नयाँ कानुन बनाउने विषयमा सबै पक्ष जानकार भएको बताएका छन् । 

नेपाल प्रेस युनियन चितवन शाखाले सोमबार बिहान भरतपुरमा आयोजना गरेको पत्रकार सम्मेलनमा सभापति देउवाले नयाँ सहिता आउने बारे सरोकारवाला सबैलाई पहिल्यै जानकारी रहेको बताए।

भदौ १ गतेदेखि नयाँ देवानी संहिता र फौजदारी संहिता लागु भएको छ। उक्त कानुन एक वर्षअघि नै पारित भएको थियो।

नयाँ फौजदारी संहिताले आफूहरुलाई अपराधी सरह बनाउने भन्दै चिकित्सकहरु कडा आन्दोलनमा उत्रिएका छन्। पत्रकारका संघ संस्था पनि विरोधमा छन्। सभापति देउवाले यो विषय जनभावना र जनताको आवाज अनुसार सुधार हुनु पर्ने बताए।

प्रकाशित : भाद्र १८, २०७५ ०९:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT