दुर्घटनामा १० घाइते
धादिङ — भिन्नाभिन्नै दुर्घटनामा बुधबार १० जना घाइते भएका छन् । घाइतेमध्ये २ को अवस्था गम्भीर छ । वीरगन्जबाट काठमाडौं आउँदै गरेको लु१ख ९८७९ नम्बरको बस र विपरीत दिशा जाँदै गरेको ना३ख ३१०६ नं.को बस पृथ्वीराजमार्गको धुनिबेंसी नगरपालिका ७ नौबीसेमा ठक्कर खाँदा ६ जना घाइते भएको खानीखोला प्रहरीले जनाएको छ ।
घाइते हुनेमा स्थानीय थाक्रे ४ का सन्तबहादुर तामाङ, ना३ख ३१०६ नम्बरका बस चालक जयबहादुर तामाङ, विनोद लामा र भीमलाल तामाङ छन् । एक जनाको पहिचान हुन सकेको छैन । उनको टाउकोमा गहिरो चोट लागेकाले बोल्न नसकेको प्रहरीले जनाए । लु१ख ९८७९ नम्बरको बसका चालक मदनबहादुर थापा पनि घाइते छन् ।
यस्तै नीलकण्ठ नगरपालिका १० स्थित धादिङबेंसीबाट आरुघाट जाँदै गरेको ना४ख ५६३९ नम्बरको बस सडकमा पल्टिँदा सहचालक धादिङ सिद्धलेक–२ का शिव कसाई सख्त घाइते भएका छन् । सोही बसमा सवार अन्य ३ जना सामान्य घाइते भएका छन् ।
प्रकाशित : आश्विन २४, २०७५ २०:३०
