गाउँपालिकाबाट शिक्षकलाई अस्थायी ‘लाइसेन्स’
सिन्धुपाल्चोक — जुगल गाउँपालिकाले शिक्षकलाई अस्थायी ‘लाइसेन्स’ दिने निर्णय गरेको छ । शैक्षिक गतिविधिलाई भरपर्दो बनाउन जुगल गाउँपालिकाले अस्थायी माध्यमिक र आधारभूत तहको अध्यापन अनुमतिपत्रको व्यवस्था गरेको हो ।
गाउँपालिकामा मात्रै लागू हुनेगरी लामो समयदेखि परीक्षा नभएको हुनाले विज्ञान, गणित, अंग्रेजी जस्ता विषयमा शिक्षक जनशक्ति पाउन गाह्रो भएकाले यस्तो निर्णय गरिएको जुगल गाउँपालिकाका प्रमुख होमनारायण श्रेष्ठले बताए । जुगलले हालै बैठक बसेर प्रक्रियासहित निर्णय गरेको हो ।
‘सरकारको तालिमप्राप्त मात्रैको स्थायी प्रवेशको शैक्षिक प्रावधानलाई सम्मान गर्छौँ,’प्रमुख श्रेष्ठले भने,‘तर सहज र व्यवस्थित बनाउन लामो छलफलपछि गाउँपालिकाबाट यस्तो निर्णय गरेका हौँ ।’ यसअघि विभिन्न नमुना निर्णय गरिसकेको गाउँपालिकाले शिक्षा विशेषज्ञ ल्याएर तालिम प्राप्तलाई गाउँपालिकाले परीक्षा लिने उनले जनाए ।
‘त्यहाँ उत्तीर्ण भएकाले अस्थायी लाइसेन्स पाउनेछन्,’ उनले भने । दुर्गम भेगमा रहेका विद्यालयमा परेको शैक्षिक समस्या र शिक्षकले भोग्नुपरेको निर्णयसम्बन्धी व्यवधानलाई समाधान गर्न यस्तो अभियान ल्याइएको उनको कथन छ ।
शिक्षामा अब्बल बनाउन र विद्यालयलाई नयाँ आयम दिन अभियान सुरु गरिसकेको उनको भनाइ छ ।आधारभूत र माध्यमिक तहको परीक्षा गाउँपालिकाले लिइसकेपछि सफल भएकाले गाउँपालिकाबाटै लाइसेन्स पाउनेछन् । यो सरकारी अध्यापन अनुमति पत्र बराबरकै हुने उनले प्रष्ट्याए ।
अस्थायी शिक्षकका लागि सञ्चय कोषको व्यवस्था गरेको गाउँपालिकाले विद्युतीय हाजिरी र मल्टिमिडिया प्रविधिबाट अध्यापन गराइरहेको वडाध्यक्ष सनत अधिकारीले बताए । ‘शिक्षाको सुधारका लागि तत्पर भएर लागिरहेका छौँ,’उनले भने ।
प्रकाशित : आश्विन २८, २०७५ १७:३५