आन्दोलनमा हिँडेका शिक्षक तीन घण्टा प्रहरी नियन्त्रणमा 

शिक्षकहरुकै पेशागत हकहितसँग सम्बन्धित अान्दाेलनका लागि धादिङवेंसीबाट काठमाडौं जाँदैं गरेका सबै राजनैतिक दल निकट शिक्षक संगठनका २२ जना प्रतिनिधिहरु चढेको बा ३ ख ४१२६ नम्बरको माइक्रोबस प्रमुख जिल्ला अधिकारी भगीरथ पाण्डेयको आदेशमा प्रहरीले नियन्त्रणमा लिएको हो ।

शिक्षकहरु चढेको माइक्रो नियन्त्रणमा लिएको खानीखोलास्थित इलाका प्रहरी कार्यालयका प्रहरी निरीक्षक उद्धव पोखरेलले स्वीकार गरेका छन् ।

नेपाल शिक्षक महासंघ, राष्ट्रिय समितिले शुक्रबार आयोजना गरेको आमसभामा भाग लिन केन्द्रिय, प्रदेश र जिल्ला तहमा रहेका पदाधिकारीहरु गएका थिए । ‘प्रहरीसँगको व्यापक बहस पछि माइक्रोबस जिल्ला तिर नै फर्काइयो । अरु लोकल सवारी साधनमा चढेर गन्तव्यमा जाँदैछौं,’ नेपाल शिक्षक संघका जिल्ला अध्यक्ष विष्णु अधिकारीले टेलिफोनमा बताए ।

उक्त माइक्रोबसमा शिक्षक संघका ३ नम्बर प्रदेश महासचिव दिपक सिम्खडा, केन्द्रिय सदस्य भवानी तिमिल्सिना, शिक्षक संघ जिल्ला सचिव देवी छत्कुली, प्रदेश सदस्य शिवहरि अधिकारी, केन्द्रिय सदस्य गोपाल अधिकारी लगायत २२ जना शिक्षक अगुवाहरु थिए ।