गोरखा — मजदुर दिवस मनाइरहँदा मंगलबार यहाँ एक महिलाले रोजगारीका लागि विदेश गएर जेलमा परेका श्रीमान्को उद्धारका लागि सहयोग गरिदिन आग्रह गरेकी छन् । भीमसेन थापा गाउँपालिका ७ बोर्लाङका कुमार रानामगर सेप्टेम्बर २०१७ देखि प्रहरी हिरासत र जनावरी २०१८ देखि साउदी अरबको अफिम सेन्ट्रल जेलमा छन् ।
साउदीको खालिद एसअल कम्पनीमा हेल्पर काम गर्दै आएका मगरले सवारीचालक अनुमतिपत्रबिनै चलाएको गाडी २४ अप्रिल २०१६ मा दुर्घटना हुँदा साउदी नागरिक खालिद अल गताइवी घाइते भएका थिए । दुर्घटनामा घाइते भएका ओताइवीले क्षतिपूर्ति माग गर्दै (दिया रकम ब्लडमनी) अदालतसमक्ष २०१६ डिसेम्बर १९ मा मुद्दा दर्ता गरे । अफिम जनरल कोर्टले २०१७ अप्रिल १७ मा कुमारले २ लाख ९४ हजार साउदी रियाल (नेपाली ८३ लाख रुपैयाँ) घाइते व्यक्तिलाई क्षतिपूर्ति दिनुपर्ने फैसला सुनायो ।
क्षतिपूर्ति तिर्नुपर्ने अवधि सकिँदासम्म तिर्न नसकेपछि पक्राउ गरिएका उनलाई जेलमा राखिएको छ । ‘कमाउन गएको श्रीमान् जेलमा हुनुहुन्छ, उल्टो उहाँलाई निकाल्न त्यत्रो पैसा लाग्छ रे,’ रुँदै श्रीमती अम्बिकाले भनिन्, ‘मेरो पतिका तर्फबाट कुनै वकिल नराखी, भाषा अनुवादसमेत नगरी एकोहोरो रूपमा अदालतले ब्लडमनी तिर्नुपर्ने र नतिरेसम्म आजीवन जेल बस्नुपर्ने कागजमा सही गर्न लगाएछ ।’ विदेशको ठाउँमा आफ्ना श्रीमान्लाई फसाएको उनको आरोप छ । कम्पनीका मालिक सुलेमान खालिद अलहाजिरीले जबर्जस्ती गाडी चलाउन लगाउँदा दुर्घटना भएको श्रीमान्ले टेलिफोनमा बताएको उनले सुनाइन् ।
कहिलेकाहीं हुने फोन सम्पर्कमा कुमारले आफ्नो रिहाइका लागि देशबाट कुनै पहल भए/नभएको सोध्ने गरेको उनले बताइन् । ६ वर्षदेखि वैदशिक रोजगारीबाट कमाएको रकमले घर खर्च चलाउँदै आएका कुमार जेल परेपछि परिवारको बिचल्ली भएको छ । कुमार र अम्बिकाका तीन सन्तान छन् । उनीहरूलाई पढाउन अम्बिका चितवन बसेकी छन् । सवारी दुर्घटनामा परेपछि कुमारलाई तीन दिन साउदी प्रहरीले हिरासतमा लिएर छाडेको थियो । छुटेपछि काम गर्न थालेका उनलाई कम्पनीले पनि नआत्तिइकन काम गरे सबै मिलाउने आश्वासन दिएको थियो ।
गत असोजमा दसैं मान्न घर जानुअघि अम्बिकाले श्रीमान्लाई सम्पर्क गर्न खोज्दा राति अबेरसम्म अनलाइन आएनन् । असोज १० मा उनका साथीले फोनमा कुमार जेल गएको बताएका थिए । ‘जेल भनेपछि छाँगाबाट खसेजस्तै भएँ । उहाँ एक्लो छोरो हो, सासू–ससुरालाई के भनौं भएँ,’ अम्बिका भन्छिन् । श्रीमान्को रिहाइका लागि कूटनीतिक तहबाट पहल गरिदिन आग्रह गर्दै उनी परराष्ट्र मन्त्रालय र कन्सुलर विभाग पनि पुगेकी थिइन् । जेल परेका श्रीमान्सँग टेलिफोन गर्न यहीँबाट रकम पठाउने गरेको उनले सुनाइन् ।
श्रीमान् रिहाइका लागि घाइतेलाई क्षतिपूर्ति दिनुको विकल्प नरहेको उनको बुझाइ छ । कुमार रानामगरको जीवन रक्षाका लागि ब्लडमनी संकलन अभियान पनि सुरु गरिएको छ । ‘वैशाख १ बाट अभियान सुरु गरेका हौं, अहिलेसम्म १ लाख ५० हजार संकलन भएको छ,’ अभियानका अगुवा कृष्णप्रसाद ढकालले भने ।