आँधीखोलामा डुबेर वृद्धको मृत्यु
स्याङ्जा — आँधीखोला नदीमा डुबेर एक वृद्धको मृत्यु भएको छ । जिल्ला प्रहरी प्रमुख जयराज सापकोटाका अनुसार स्याङ्जाको भीरकोट नगरपालिका-३ रिजुका ६५ वर्षका खोंचबहादुर खत्रीको आँधीखोलामा डुबेर मृत्यु भएको हो ।
भीरकोट-६ बयरघारीस्थित आँधीखोलातिरमा मृत अवस्थामा भेटिएपछि स्थानीयले प्रहरीलाई खबर गरेका थिए ।
शुक्रबार बिहान साढे ७ बजे घरबाट औषधि लिन बयरघारी बजारतर्फ गएका खत्री दिउँसो आँधीखोलामा मृत अवस्थामा फेला परेको सापकोटाले बताए । शवलाई पोस्टमार्टमका लागि प्राथमिक स्वास्थ्य केन्द्र वालिङमा ल्याइएको छ । पोस्टमार्टमपश्चात् शव आफन्तको जिम्मा लगाउने प्रहरीले बताएको छ ।
प्रकाशित : जेष्ठ ११, २०७५ १७:१९प्रतिक्रिया
