म्याद गुज्रेका सामान बजारभरि

लमजुङ–
धेरै पसल दर्ताबिना नै सञ्चालन गरिएको र मूल्यसूची नै नराखेको भेटिएका उनीहरूले बताए ।
बेंसीसहरको मनाङेचौतारादेखि शेरा बजारसम्म गरिएको अनुगमनका क्रममा साना पसल र होटल व्यवसाय दर्ताबिना सञ्चालन गरेको पाइए । अनुगमन टोलीले किराना पसल, मासु पसल, औषधि पसल, ब्युटीपार्लर, बेकरी उद्योग, होटल र स्टेसनरी पसलमा अनुगमन गरेको हो ।
टोली सदस्य जनस्वास्थ्य अधिकृत केशवप्रसाद चापागाईंले भने, ‘दर्ताबिना सञ्चालितलाई प्रक्रियामा आउन आग्रह गरेका छौं । म्याद गुज्रेका सामान जफत गरेर पुन: गल्ती नगर्न सुझाव र चेतावनी दिएका छौं ।’

बजारका केही मासु पसल फोहोर पाइएको वरिष्ठ पशु चिकित्सक लक्ष्मणबहादुर ढकालले बताए । कुखुरापालन पनि मानिसको स्वास्थ्यमा असर पर्नेगरी सञ्चालन गरिएका भेटिएको उनले बताए । ‘कुखुरापालन गर्ने निश्चित मापदण्ड हुन्छ । मासु काट्नलाई पनि निश्चित दायरा छ,’ उनले भने, ‘जथाभावी पाल्ने, जथाभावी काट्ने, अचानो फोहोर राख्ने र माखा भन्किने गरी राख्ने गरेको पायौं ।’ धेरै फोहोर पाइएका फ्रेस हाउसलाई एक साताको अल्टिमेटम दिएको उनले बताए । ‘एक सातापछि पनि सुधार भएको नदेखिए पसल सिल गरिदिन्छौं,’ उनले भने ।

बेंसीसहर बजारका कतिपय फार्मेसीले डाक्टरको ‘प्रेस्क्रिप्सन’ बिना नै औषधि बिक्रीवितरण गरेको पाइएको अनुगमन टोलीले जनाएको छ । केही फार्मेसीले लागूऔषधजन्य औषधि बिक्रीवितरण गरेको पनि पाइएको छ । केही पाउरोटी उद्योग फोहोर पाइएपछि टोलीले सुधार्न समय दिएको छ ।

अनुगमनमा उद्योग वाणिज्य संघ, प्रहरी र प्रशासनका प्रतिनिधि सम्मिलित थिए । बेंसीसहर नगरपालिकाका अधिकृत राजेश्वर सिलवालका अनुसार नगरपालिकाले बजार अनुगमनसम्बन्धी कानुन बनाएर अघि बढेको हो । ‘हामीले बेंसीसहर बजारको अनुगमन सुरु गरेका छौं । पहिले बेलाबेलामा हुने गरेको अनुगमन अब नियमित हुन्छ,’ उनले भने । पसल दर्ता नगरी, मूल्यसूची टाँस नगरी सञ्चालन गर्न पाइन्छ भन्ने मानसिकता त्याग्नुपर्ने उनले बताए ।