भूकम्पपीडितलाई ऋणकै चिन्ता

घर बनाउँदा लागेको पाँच लाख ऋणको सावाँ र ब्याजको किस्ता तिर्न उनलाई यतिबेला मुस्किल परेको छ । ‘बैंकबाट ऋण निकालेर घर बनायौं,’ उनले भनिन्, ‘अहिले ऋणको सावाँ–ब्याज तिर्न गाह्रो भएको छ ।’ भूकम्पलगत्तै सरकारले पीडितलाई घर बनाउन सहयोग गर्ने सुनेपछि चर्को ब्याजमा ऋण लिएर भए पनि घर बनाएको उनले बताइन् । ‘घर बनेपछि बस्न त ढुक्क भएको छ तर महिना–महिनामा १६ हजार रुपैयाँका दरले किस्ता तिर्नुपर्दा निद्रा लाग्दैन,’ सरकारले दिएको अनुदानले ब्याज तिरेर बाँकी सावाँ रकम घटाएको उनले बताइन् ।

देप्चेकी मीना नेपालीले घर बनाउन बैंकबाट ६ लाख र आफन्तबाट १० लाख रुपैयाँ ऋण लिएको पाँच महिना भयो । ‘आफन्तको बिस्तारै तिरौंला भने पनि बैंकको किस्ता मासिक तिर्दै आउनुपरेको छ,’ उनले भनिन्, ‘अहिले त ऋणले गर्दा भोक–निद्रा सबै हराएको छ ।’ सरकारले सबैतिर एउटै निर्धारित रकम मात्रै घर बनाउन दिने व्यवस्थाले दुर्गम गाउँका भूकम्पपीडितलाई मर्का परेको उनले बताइन् । चारकोठे पक्की घर बनाएकी विष्णुमाया नेपालीको १८ लाख रुपैयाँ ऋण छ । ‘सरकारले दिने भनेको पैसा बेलामा आइदिएन, आफन्तबाट ऋण लिइयो,’ उनले भनिन् ।