हत्याको आरोपमा दुई पक्राउ

प्रतिक्षा काफ्ले

स्याङ्जा — पुतलीबजार नगरपालिका–३ सरादुमकी ५५ वर्षीया फुलमाया विकलाई हत्या गरेको आरोपमा प्रहरीले दुई जनालाई पक्राउ गरेको छ । 

जेठ २६ गते राति मादक पदार्थ सेवन गरेर हत्या गरेको मृतकका श्रीमान्‌ले जिल्ला प्रहरीमा किटानीसहित दिएको जाहेरीको आधारमा पक्राउ गरिएको जिल्ला प्रहरीका प्रवत्ता डिएसपी प्रकाश विष्टले जानकारी दिए। डिएसपी विष्टका अनुसार पक्राउ पर्नेहरुमा मृत्तकका आफन्त छन्। मृत्तकको श्रीमान् दिबहादुरले २७ गते जिल्ला प्रहरीमा मुद्दा दर्ता गराएका थिए।

निवेदनमा किटानी गरेपछि प्रहरीले पुतलीबजार-३ सरादुमका ४६ वर्षीय जीतबहादुर विक र पुतलीबजार २ चिरुवाका ४६ वर्षीय राजु भन्ने टेकबहादुर विकलाई पक्राउ गरेको हो। जीतबहादुरलाई घटनाको ३ पछि पक्राउ गरिएको विष्टले बताए। ‘घटनापछि राजु भन्ने टेकबहादुर फरार थियो’ उनले भने, ‘विशेष खोजतलासमार्फत १४ दिनपश्चात् मध्येविन्दु नगरपालिका-५ बासपुर भन्ने स्थानमा पक्रिएको हो।’

स्याङ्जाबाट गएको प्रहरीको टोली र पूर्वी नवलपरासीको सहयोगमा पक्रिएको उनले बताए। पक्राउ परेका दुवै जनालाई कर्तव्य ज्यान मुद्दामा जिल्ला अदालतमा दर्ता गरिएको छ।

प्रकाशित : असार १४, २०७५ १९:१३
प्रतिक्रिया
पठाउनुहोस्

नेपाल आइपुग्यो वाइड बडी एयरबस

कान्तिपुर संवाददाता

काठमाडौँ — नेपाल वायुसेवा निगमले बिहीबार पहिलो वाइड बडी एयरबस ए३३० विमान काठमाडौंमा अवतरण गरेको छ ।


निगमले दुई विमान हाइफ्लाई एक्स, जर्मन एभिएसन क्यापिटल र अमेरिकी कम्पनी एएआर कर्पोरेसनसँग मिलेर खरिद सम्झौता गरेको हो। दोस्रो वाइडबडी विमान पनि चाडै ल्याइने निमगले जनाएको छ।


नयाँ विमानमा १६ वटा बिजनेस श्रेणीका सहित २ सय ७४ सिट छन्। यो विमानले अहिले निगमले उडान भरिरहेको काठमाडौं–दोहा–काठमाडौं सेक्टरमा उडान भर्नेछ। तीन महिनापछि मात्रै नयाँ रुटमा उडाउने निगमको योजना छ।

२०४६ सालताका निगम ११ वटा अन्तर्राष्ट्रिय गन्तव्यमा उड्थ्यो। तर, अहिले अन्तर्राष्ट्रियतर्फ आठवटा गन्तव्यहरू हङकङ, बैंकक, मलेसिया, दिल्ली, मुम्बई, बैंगलोर, दोहा र दुबईमा मात्रै उडान भर्दै आएको छ।

निगमले दुईटा वाइडबडी खरिदका लागि नागरिक लगानी कोष र कर्मचारी सञ्चय कोषबाट ९ प्रतिशत ब्याजमा २४ अर्ब ऋण लिएको थियो। यी दुवै वित्तीय संस्थासँग निगमले १५ वर्षको ऋण तिर्ने भाका राखेको छ।

प्रकाशित : असार १४, २०७५ १९:१२
पूरा पढ्नुहोस्
प्रतिक्रिया
पठाउनुहोस्