जनमोर्चाले जितेको वडामा शून्य बजेट

असार १७ मा सम्पन्न नगरसभाले आगामी आर्थिक वर्षका लागि ६२ करोड ३ लाख ८८ हजारको बजेट पास गरेको छ । उक्त वजेटबाट त्यस वडालाई नगरस्तरीय योजनाको कुनै पनि शीर्षकमा बजेट विनियोजन गरिएको छैन ।

आफूले बजेट माग गरेर नपाएपछि गत असार २२ को कार्यपालिकाको २९ औं बैठक बहिस्कार गरेको ज्ञवालीले बताए ।

त्यसअघिको २१ औं बैठकमा पनि उनले बजेट वितरणमा असहमति जनाउँदै नोट अफ डिसेन्ट लेखेर बाहिरिएका थिए । उक्त वडामा वडाध्यक्षमा जनमोर्चाले जितेको छ भने ४ वटै वडा सदस्यमा नेपाली कांग्रेसका प्रतिनिधि विजयी भएका छन् ।

आइतबार गैंडाकोट नगरपालिकाको १६ नम्बर चोकस्थित सार्वजनिक थलोमा वडाध्यक्ष गोवर्धन ज्ञवालीले पत्रकार सम्मेलन गरेर सानो दल भएकै कारण नेपाल कम्युनिस्ट पार्टी र नेपाली कांग्रेसले आफ्नो वडालाई रकम नदिएको आरोप लगाए ।

उनले सानो दल हुनु गल्ती नभएको बताउँदै त्यसविरुद्ध आममतदातालाई डाकेर वडा भेला गर्ने जानकारी दिए । पटक–पटक नगरस्तरीय योजना पार्न माग गरे पनि बजेट विनियोजन नगरेको उनले दु:खेसो पोखे ।

गैंडाकोट नगरपालिकाका प्रमुख प्रशासकीय अधिकृत रामप्रसाद आचार्यले नगरपालिकामा गठित विषयगत समितिका विभिन्न शीर्षकमा बजेट विनियोजन गरिएको र त्यही च्यानलबाट आउनुपर्नेमा वडाध्यक्षले हेल्चेक्राइँ गरेका कारण त्यस्तो हुन पुगेको जानकारी दिए ।

नगरस्तरीय योजनाअन्तर्गतका शीर्षकबाट दिइनुपर्ने रकम नपरे पनि सशर्त अनुदानलगायतको शीर्षकमा वडा नम्बर १६ मा ५० लाख रुपैयाँभन्दा बढी बजेट विनियोजन गरेको जानकारी दिए ।

नियतबस त्यस्तो नगरिएको र वडाध्यक्षले सिस्टमबाट बजेट माग्ने समयमा बेवास्ता गरेका कारण त्यस्तो हुनसक्ने उनले दाबी गरे । अत्यावश्यक स्थानमा नगरपालिकाको आकस्मिक कोषबाट समेत फेरि रकम पठाउन सकिने व्यवस्थाका आधारमा उक्त वडालाई रकम दिन आगामी कार्यपालिकाको बैठकमा पेस गर्न सकिने उनले बताए ।

१८ वडा रहेको गैंडाकोटमा मेयरसहित ८ वडाध्यक्ष नेपाल कम्युनिस्ट पार्टीले जितेको छ भने उपमेयर सहित ९ वटा वडा नेपाली कांग्रेसले र वडा नम्बर १६ को वडा अध्यक्षमा जनमोर्चाले निर्वाचन जितेको हो ।

पूर्वी नवलपरासीका ८ स्थानीय तहका ९२ वडामध्ये एउटा वडामा मात्र जनमोर्चाले जितेको हो । जनमोर्चालाई तत्कालीन एमाले, माओवादी केन्द्र, राप्रपालगायतका दलले सघाएपछि त्यहाँ ज्ञवाली वडाध्यक्षमा विजयी भएका थिए ।