कालोपत्रे सडकमै खाल्टैखाल्टा

सडक निर्माणको ठेक्का पाएका ठेकेदारले कमसल निर्माण सामग्री प्रयोग तथा छिटो काम सक्ने बहानामा लापरबाही गर्दा कालोपत्रे टिकेन
हरिराम उप्रेती

गोरखा — कच्ची सडकमा बर्खा लागेसँगै पानी जम्ने र पहिरो जाने कारणले सवारी आवागमनमा ठप्प हुन्छ । यहाँका पक्की सडकमा पनि खाल्टैखाल्टाका कारण सवारीसाधन सहज चल्न सक्दैनन् ।

गोरखाको बाह्रकिलो–बारपाक सडकखण्डको कालोपत्रे सकडमा परेका खाल्डा । तस्बिर : हरिराम

२०७५ असारमै बाह्रकिलो–बारपाक सडक कालोपत्रे गरिसक्ने लक्ष्यका साथ पाँच प्याकेजमा ठेक्का लागेको थियो । बाह्रकिलो–भालुस्वाँरा–बारपाक सडक आयोजनाले चार वर्षअघि नै उक्त सडकअन्तर्गतको बाह्रकिलो–जरेवरको १२ किलोमिटर खण्ड भने कालोपत्रे गरिसकेको थियो ।


Yamaha

कालोपत्रे भएको उक्त खण्डमा हाल साना सवारी पनि मुस्किलले आउजाउ गर्छन् । कालोपत्रे सुरु भएको स्थान बाह्रकिलोको प्रवेशद्वारदेखि नै सावधानी अपनाएर गाडी चलाउनुपर्ने चालक बताउँछन् । बाह्रकिलोको घुम्ती, सिर्दी पुल, छेवेटार पुल, मसानेपाटी र चोरकाटेको घुम्तीलगायतका तीन दर्जन ठाउँमा कालोपत्रे उप्किएका छन् भने खाल्टैखाल्टा परेर पानी जमेका छन् । ‘ठूला दुर्घटना नै चाहिँ भएको छैन । यस्तो सडकले दुर्घटनाको सम्भावना जोखिमचाहिँ बढायो,’ उक्त खण्डमा सवारी चलाउँदै आएका रामबहादुर सुनारले भने ।


सडककै कारण गाडीहरू बिग्रने समस्या पनि बढेको उनले सुनाए । ‘बेलैमा स्पिड घटाइएन, खाल्टो पर्‍यो भने गाडीको पट्टा भाँचिन्छ । गाडी कन्ट्रोल गर्नै गाह्रो हुन्छ,’ उनले भने । पक्की सडककै कालोपत्रे उप्किएपछि पैदलयात्रीलाई आउजाउमा पनि समस्या परेको लक्ष्मीबजारका विष्णु नेपालीले बताए । ‘खाल्टाखुल्टी छ, गाडी पनि यही सडक हिँड्छ,’ उनले भने, ‘कतिखेर हिलोपानी छ्यापिन्छ भन्नै सकिँदैन ।’


टिपरले बालुवा बोकेर पानी चुहाउँदै हिँड्दा कालोपत्रे सडक नै हिलाम्मे हुने स्थानीय बताउँछन् । सडक निर्माणको ठेक्का पाएका ठेकेदारले कमसल निर्माण सामग्री प्रयोग तथा छिटो काम सक्ने बहानामा लापरबाही गर्दा पनि कालोपत्रे धेरै वर्ष नटिकेको आरोप एकथरी स्थानीयको छ ।


बाह्रकिलो–बारपाक सडक आयोजनाका प्रमुख अमृतमणि रिमाल उक्त सडक मर्मतका लागि नयाँ ठेक्का निकाल्ने तयारी भइरहेको बताउँछन् । ‘सडकको आयु नै यति नै हो कि, के कति ठाउँमा क्षति पुगेको छ भनेर स्टिमेट निकाल्दैछौं,’ उनले भने, ‘केही ठाउँमा स्थानीयले पानी सडकमा लगाइदिन्छन्, यसो हुँदा सडक चाँडो भत्कियो ।’ नाला व्यवस्थापन गर्न नसक्दा यहाँका अधिकांश पक्की सडकहरूको अवस्था दयनीय बन्दै गएको उनले बताए ।


गोरखा सदरमुकामको मुख्य बजार हरमटारी चोककै कालोपत्रे सडकमा खाल्टाखुल्टी परेका छन् । हरमटारी–वराह हँुदै ढुंगागाडेको साढे तीन किमि खण्ड, नयाँ बसपार्कबाट नयाँबजार जाने सडक र बसपार्क सतीपीपलको कालोपत्रे सडकमा खाल्टा परेका हुन् ।


सडक मर्मतका लागी गोरखा नगरपालिकामा डेलिगेसन गए पनि हालसम्म सडक मर्मतको काम हुन नसकेको आदर्शनगर टोल विकास संस्था वराहका अध्यक्ष वीरबहादुर गुरुङले बताए । हस्पिटलचोकदेखि वराहसम्मको खण्ड ०६८ सालमा कालोपत्रे भएको थियो । ‘हामी यहाँका बासिन्दाले सडक पिच गर्न पैसा दिएका थियौं । सानो खाल्डो पर्‍यो, पुर्न ढुंगा राख्यौं,’ गुरुङले भने, ‘छ चक्के, आठ चक्के गाडीले त्यो ढुंगा धूलो बनायो अनि खाल्डो बढ्दै गयो ।’ घडेरी खार्दा सडकको छेउभाग उप्किएपछि बढ्दै भत्केर अहिलेको अवस्था आएको स्थानीय बताउँछन् ।


‘रोलर पाइराखेको छैन, छिटै खाल्डो पुर्न सुरु हुन्छ,’ गोरखा नगरपालिकाका इन्जिनियर प्रकाश ढकालले भने, ‘कुन–कुन ठाउँमा के कति क्षति भएको छ भनेर स्टिमेट गर्न भनेर कर्मचारी पठाएका छौं । स्टिमेट सकेपछि कति पैसा विनियोजन गर्नुपर्छ नगरपालिकाले गर्छ ।’ नालीको व्यवस्थापन हुन नसक्दा सडकमा खाल्डा परेको उनले बताए ।

प्रकाशित : भाद्र २५, २०७५ ०९:५७
ADVERTISEMENT
ADVERTISEMENT
प्रतिक्रिया
पठाउनुहोस्

कर्मचारी अझै अन्योलमा

संघीयता कार्यान्वयनसँगै कर्मचारी व्यवस्थापनको नीतिमा अस्पष्टताका कारण दुविधा
कान्तिपुर संवाददाता

स्याङ्जा — साउनबाट कार्यालय खारेजी भएपछि कर्मचारीमा अन्योल भएको छ । प्रदेश र स्थानीय तह मातहतका कार्यालयमा व्यवस्थापन हुन बाँकी रहेका कर्मचारीबीच अन्योलता रहेको हो ।

कार्यालय खारेजी भएपछि कहाँ जाने, कहिले जाने भन्ने ठेगान नभएको जनस्वास्थ्य अधिकृत मित्रप्रसाद अर्यालले बताए । ‘न कार्यालयमा काम छ, न नयाँ जिम्मेवारी नै तोकिएर आएको छ,’ उनले भने, ‘काम नभएपछि कहाँ जाने, के गर्ने भन्ने भएपछि अफिस आयो, फर्कियोको दैनिकी छ ।’ कहिले पत्र आउँछ र कहाँ खटाउँछ भन्ने अन्योल भएको उनले बताए ।


खारेजीमा परेको जिल्ला भू–संरक्षण कार्यालयका कर्मचारीको पनि अवस्था उस्तै छ । यहाँका कर्मचारी पनि दिउँसो कार्यालय आउने र जाने मात्र काम भएको बताउँछन् । ‘वन डिभिजन कार्यालय बस्यो भनेर बोर्ड ल्याएर राखेपछि अब त हाम्रो कार्यालयको भवन पनि रहेन,’ नायब सुब्बा धु्रव दोरंगा भन्छन्, ‘कहाँ सरुवा हुन्छ भन्ने थाहा छैन । यदि सरुवा भएको भए पनि मन्त्रालयबाट रमाना नदिने भनेर रोक लगाएको छ ।’ संघीयता कार्यान्वयनसँगै कर्मचारी व्यवस्थापनको नीतिमा अस्पष्टताका कारण धेरैलाई दुविधा भएको
उनले बताए ।


सरकारले विकाससँग सम्बन्धित जिल्ला कार्यालय खारेज गरेर स्थानीय तहमा समाहित गर्ने भने पनि केहीका नाम परिवर्तन गरेर साइनबोर्ड फेरिएका छन् । तर, माथिल्ला निकायबाट स्पष्ट निर्देशन नआउँदा कर्मचारीमा अन्योल हटेको छैन । प्रदेश मातहतका कार्यालय भन्दै केही दिनअघि उद्घाटन गरिएका डिभिजन वन कार्यालय र कृषि ज्ञान केन्द्रबारे पनि प्रष्ट नीति नआएको कर्मचारीको भनाइ छ । स्थानीय तहमा शिक्षा समिति रहने भन्दै भूमिका खुम्च्याइएको जिल्ला शिक्षा विकास तथा समन्वय इकाइमा पनि कर्मचारी अन्योलमा छन् ।


कृषि ज्ञान केन्द्रका प्रमुख तेजप्रसाद दवाडीले कार्यालयको प्रष्ट खाका तयार नभएसम्म आफ्नो काम र जिम्मेवारी के हो भन्नेबारे नै जानकारी नभएको बताए । ‘हिजोको दिनमा कामको चापले खाना खाने फुर्सद हुँदैथ्यो,’ उनले भने, ‘अहिले फ्री छौं तर काम छैन । समय सदुपयोग गर्न नै समस्या भएको छ ।’ स्थानीय तहमा अपुग कर्मचारीको संख्या हेरेर कर्मचारीको दरबन्दी मिलान गरिदिए सबैको सदुपयोग हुने उनले बताए ।


डिभिजन कार्यालयमा परिणत भएको जिल्ला वन नयाँ नामकरणसँगै प्रदेश सरकार मातहत रहने भनिएको भए पनि काम गर्ने तौरतरिकाबारे अझै अन्योल रहेको प्रमुख कोमलराज काफ्लेले बताए । पशुसेवा कार्यालय पशुसेवा विज्ञ केन्द्र बनाइएको छ । मन्त्रालयबाट स्पष्ट निर्देशन नआउँदा पशुसेवा विज्ञ कार्यालयका कर्मचारी पनि आउने र दिनभरि समय बिताउने र फर्कने काम मात्र भएको छ ।


खारेजीमा परेका महिला तथा बालबालिका र सहकारी डिभिजन कार्यालय भने स्थानीय तहमा गएका छन् । ती कार्यालयका सामग्री समान रूपमा जिल्लाका सातवटै स्थानीय तहलाई बाँडिएको छ । कार्यालयका कागजात जिल्ला समन्वय समितिको जिम्मामा छन् । स्थायी कर्मचारीलाई कार्यालय खारेजीको घोषणासँगै स्थानीय तहमा पठाइएको थियो ।

खानेपानी तथा सरसफाइ डिभिजन कार्यालय पनि अलपत्र छ । कार्यालयमा कुनै निर्देशन नआएको कर्मचारीले बताएका छन् । ‘हामीलाई कुनै निर्देशन आएको छैन,’ डिभिजन प्रमुख तुलसी बस्नेतले भने।

प्रकाशित : भाद्र २५, २०७५ ०९:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT