खोलाहरुमा बाढी आउँदा यातायात सञ्चालनमा कठिनाई

घोराही–तुलसीपुर सडक खण्डका ग्वार र गुर्जे खोलामा बाढी आएपछि नियमित यातायात सञ्चालनमा समस्या भएको जिल्ला प्रहरी कार्यालयका डिएसपी रामप्रसाद घर्तीले बताए । पानीको सतह घटबढ भइरहेकाले यातायात खुल्ने र बन्द हुने क्रम चलिरहेको उनले जानकारी दिए ।

अन्य खोलामा पनि बाढी आएपछि जीप, कार, मोटरसाइकल जस्ता साना सवारी साधनलाई पार गर्न कठिन भएको छ । यात्रुहरु ठूला गाडीमा मात्रै यात्रा गर्न बाध्य छन् । खोलाहरुमा पुल निर्माण गर्न ढिलाई भएपछि बाढीले सास्ती भएको छ ।

ग्वार, पत्रे, गुर्जे, कटुवा र बबई खोलामा पुल निर्माणका क्रममा सडक भत्काएपछि यातायात जोखिमपूर्ण भएको छ । बाढीले डाईभर्सनहरु बगाइदिएपछि गाडी पार गराउन कठिन भइरहेको छ ।

राप्ती र बबई नदीमा पनि पानीको सतह बढेपछि आसपासका बासिन्दा त्रसित भएका छन् । बबई गाउँपालिका-५ स्थित ट्वाङ खोलामा बाढीले बस बगाएको छ । बबईबाट तुलसीपुरतर्फ आउँदै गरेको ना १ ख १८६१ नम्बरको बस खेलामा बिग्रिएपछि पानीको सतह बढेर बगाएको हो ।

बसमा क्षती भएपनि यात्रुहरु सबै पहिले नै निस्किसकेकाले केही समस्या नभएको डीएसपी घर्तीले बताए ।