विकासे संस्थालाई पारदर्शी र जवाफदेही बन्न आग्रह

कान्तिपुर संवाददाता

बुटवल — सरोकारवालाले विकासमा साझेदारी गर्ने संस्थालाई पारदर्शी र जवाफदेही हुन आग्रह गरेका छन् ।

सामाजिक विकास मन्त्रालय र अन्तर्राष्ट्रिय गैरसरकारी संस्थाले बुधबार बुटवलमा आयोजना गरेको विकास संवाद कार्यक्रमका सहभागीले नतिजा देखाउने काम र तथ्यांक आए मात्रै विकासे संस्थाप्रति सरकारी संयन्त्र र नागरिक सकारात्मक हुने बताए ।

प्रभावकारी विकासका लागि सरकार र साझेदार संस्थाले समन्वयमा काम गर्ने भन्दै मन्त्रालयले कार्यक्रम आयोजना गरेको हो । प्रदेश सरकारले अगाडि सारेका महत्त्वाकांक्षी योजना पूरा गराउन साझेदारी संस्थाको आवश्यकता रहेको बताउँदै सामाजिक विकासमन्त्री सुदर्शन बरालले सरकारसितको समन्वयमा सहजताभन्दा आवश्यकता हेरेर काम गर्न निर्देशन दिए । ‘सही सूचना प्रवाह र सरकारी निकायसँगको समन्वयमा अभाव देखिएको छ,’ मन्त्री बरालले भने, ‘परिणामामुखी कामका लागि काम सकेपछि मात्रै होइन, सुरुदेखि नै सरकारी निकायसित समन्वय गर्नुपर्छ ।’

Yamaha

आन्तरिक मामिला मन्त्रालयका उपसचिव जनार्दन पौडेलले साझेदार संस्थाले मुलुकको विकास र नागरिक चेतनाको क्षेत्रमा ठूलो भूमिका खेलेको बताए । ‘कतिपयले भएको उपलब्धि गुम्ने र राष्ट्रियता मर्ने गरी पनि विदेशी दातृनिकायबाट सहयोग माग्ने गरेको सुनिन्छ,’ उनले भने, ‘साझेदार संस्थाले यस्तो गर्नु हुँदैन ।’ अन्तर्राष्ट्रिय गैरसरकारी संस्थाका सचिवालय सदस्य भोलाप्रसाद दाहालले विकासमा साझेदार गर्ने संस्था सरकारसित लुकेर नभई समन्वय गरेर काम गर्न खोजेको बताए । ‘सुशासन, जवाफदेही र पारदर्शी हुन अनुगमन र समन्वयमा काम गर्न सकिन्छ,’ दाहालले भने, ‘तर, विकासमा सहयोग गर्ने संस्थासित व्यापारिसितजस्तै लिने कर हटाउनुपर्छ ।’

प्रदेश ५ का १२ जिल्लामा १२ वटा अन्तर्राष्ट्रिय गैरसरकारी संस्था कार्यरत छन् । तिनले महिला बालबालिका, स्वास्थ्य, शिक्षा, प्रकोप व्यवस्थापनलगायत १० क्षेत्रमा काम गरिरहेका छन् । सामाजिक विकास मन्त्रालयका सचिव पुष्करराज पन्तले सबै साझेदार संस्थाका काम र परिणाम हेरेर सरकारले थप सहकार्य र समन्वयका योजना बनाउने बताए ।

Esewa Pasal

प्रकाशित : भाद्र १४, २०७५ ०९:२१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कल्भर्ट बगेपछि थुनिए जिप

माधव अर्याल

दोभान (पाल्पा) — सिद्धार्थ राजमार्गको दोभान बजार पश्चिमका विभिन्न क्षेत्रसम्म पुग्ने सडकमा दुई महिनादेखि गाडी गुडेका छैनन् । तिनाउ नदीमा पुल नहुँदा बर्खामा गाडी नचलेका हुन् । दुई वर्षअघिदेखि निर्माण थालिएको पुल अधुरै छ । यस भेगका बासिन्दा सधैं सास्ती बेहोर्न बाध्य छन् ।

पाल्पाको तिनाउ गाउँपालिकाअन्तर्गत तिनाउ खोलामा कल्भर्ट बगाएपछि थुनिएका सवारी साधन । तस्बिर : माधव

‘पक्की पुल नबन्दासम्म हामीलाई सधैंको सास्ती नै हो,’ तिनाउ २ खुर्सानेका मोहन विकले भने, ‘अब त बन्ला भन्यो, अझै बन्दैन ।’ वर्षाको भेलसँगै दुई महिनाअघि नै खानी उद्योगमा जानलाई तिनाउ खोलामा निर्माण गरेको कल्भर्ट बगेपछि सवारीसाधन चल्न नसकेका हुन् ।

यस भेगका सयौं यात्रुले वर्षा लागेपछि चार महिना सास्ती खेप्नुपर्छ । खोलापारि नै आठवटा जिप रोकिएका छन् । रोकिएका जिपले सात किलोमिटर टाढाको खुर्सानेसम्म सेवा दिन्छन् । पहिरो गयो भने समस्या हुन्छ । ‘हामी खोलावारि नै रोकिएका छौं,’ एक जिप चालकले भने, ‘खोला नघटिकन राजमार्गमा निस्कने उपाय छैन ।’ रोकिएका सवारीले महँगो भाडा लिने गरेको यात्रुको गुनासो छ । ‘सात किलोमिटर हिँड्नु परेको छैन,’ कचलकी लक्ष्मीदेवी बगालेले भनिन्, ‘भाडा महँगो भन्दा पनि सेवासुविधा हेरेका छौं ।’ जिपले सात किलोमिटरको ५० रुपैयाँ लिने गरेको यात्रुले बताए ।

यहाँबाट कचलका विभिन्न भाग, दोभानकै पश्चिम क्षेत्रका गाउँ, ठिमुरे, जुठापौवा, फेकलगायत स्थानमा जानलाई नजिक पर्छ । सवारी साधन सञ्चालन हुन नसक्दा यस भेगका बासिन्दा मर्कामा परेका छन् । यहाँ तिनाउमा ह्युम पाइप नबगाउँदासम्म दैनिक दुई सयभन्दा बढी टिपर चल्थे । यही बाटोबाट कचलको चुनढुंगा नवलपरासी र रूपन्देहीका सिमेन्ट उद्योगमा लैजान्छन् । कचल, दोभानका विभिन्न स्थानमा जाने साना–ठूला सवारी साधन ओहोरदोहोर गर्छन् ।

सरकारले पाँच करोडभन्दा बढी लगानी गरेर खानी उद्योगको पहुँच मार्ग स्तरोन्नति गरेको छ । तर, असारको पहिलो साता परेको पानीले हयुम पाइप बगाएपछि सधैंको सास्ती बेहोर्नुपरेको वडाध्यक्ष राजेश श्रेष्ठले बताए । दोभान पश्चिम भेगका बासिन्दालाई ६ घण्टा पैदल हिँड्नुपर्छ । ‘बुटवल बजार नगई हुँदैन । बाटोमा सवारी साधन नचलेपछि चार घण्टा पैदल हिँड्नुपर्छ,’ उनले भने, ‘ भर्खरै वर्षा सुरु हुँदा पाइप बगाएपछि सवारी साधन आउजाउ बन्द छ ।’

उनका अनुसार यसपटक जिप थुनिएकाले स्थानीयले राहत पाएका हुन् । स्तरोन्नति गरेको सडकमा आउजाउ गर्न सहज भए पनि वर्षाले सवारी साधन चल्दैनन् । मोटरबाटो खानी पहुँचका लागि स्तरोन्नति गरिएको छ । तिनाउ खोलामा पक्की पुल नहुँदा सर्वसाधारण र खानी उद्योगलाई समस्या भएको हो ।

असारदेखि भदौसम्म खानी उद्योग चल्न सक्दैन । दोभानकै सुकेताल, खुर्साने, कचलको ओखलढुंगा, कचल फाँटमा नियमति जिप सेवा थियो । अहिले ती सबै सेवा बन्द छन् । शनिबार र बुधबार बुटवलमा लाग्ने हाटमा जानसमेत वर्षायाममा पैदल हिँड्न बाध्य हुन्छन् ।

सवारी साधन चल्दा र नचल्दा धेरै फरक पर्ने स्थानीय तुलबहादुर घर्तीले बताए । ‘सवारी साधन चढेर जान पाइने भए पनि अहिले पैदल हिँड्नुपर्दा बुटवल जानेमा समेत कमी आएको छ,’ उनले भने । यस भेगमा उत्पादन हुने तरकारीका साथै बाबियोको डोरी, अम्लिसोको कुचो, गेडागुडी बिक्रीका लागि बुटवल जान्छन् । अहिले केही बाटोमा जिप चले पनि अन्यत्र पैदल हिँड्नु परेको छ ।

खुर्सानेबाट हरियाली गाउँ, कचलका विभिन्न भागमा पैदल हिँड्नै ्पर्छ । सडक डिभिजन कार्यालयले दोभानदेखि कचल जाने तिनाउ खोलामा पक्की पुल निर्माणको काम अघि बढाएको जनाएको छ । तर, काममा भएको ढिलासुस्तीले अझ केही वर्ष सास्ती खेप्नुपर्ने हो कि भन्ने चिन्तामा स्थानीय छन् । सडक डिभिजनका सूचना अधिकारी पवित्रमणि आचार्यले पुल नर्माणको काम अघि बढेको तर कहिले सम्पन्न हुन्छ भन्ने थाहा हुन नसकेको बताए ।

प्रकाशित : भाद्र १४, २०७५ ०९:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT