आकाशे पुल निर्माण सुस्त

सम्झौता अवधिमा ३५ प्रतिशत मात्रै काम
६ महिना म्याद थप
अमृता अनमोल

बुटवल — रूपन्देहीमा निर्माणाधीन १० आकाशे पुलको काम ज्यादै सुस्त चलेको छ । भारतीय सीमा क्षेत्रसम्म ६ लेन सडक बनाउन थालेसँगै बेलहिया–बुटवल सडक खण्डमा अन्तर्राष्ट्रिय मापदण्डका आकाशे पुल निर्माण थालिएको थियो ।

बुटवलको मिलन चोकमा निर्माणाधीन आकाशे पुल । तस्बिर : अमृता

पुल निर्माणका लागि दुई वर्षअघि महादेव खिम्ती एसियाटिक महेश जेभी कम्पनीले ठेक्का पाएको थियो । कम्पनीले ठेक्का अनुसार काम नगर्दा निर्माणाधीन आकाशे पुलको कामले गति लिन नसकेका हुन् ।

बेलहिया–बुटवल व्यापारिक मार्ग विस्तार आयोजनाले १० वटा आकाशे पुल निर्माणका लागि १२ करोड ४८ लाख ५२ हजार २ सय ४८ रुपैयाँ लाग्ने अनुमानमा ठेक्का आह्वान गरेको थियो । महादेव खिम्तीले भने ११ करोड ११ लाख १५ हजार २ सय २५ रुपैयाँमा ठेक्का लिएको हो ।

Yamaha

सन् २०१७ मार्चमा लिएको ठेक्का सन् २०१८ जुलाईमा सम्पन्न गर्ने सम्झौता थियो । ठेक्का सम्झौता सकिँदासम्म भौतिक निर्माणका हिसाबले ३५ प्रतिशत मात्रै काम सम्पन्न भएको छ । बाँकी ६५ प्रतिशत काम कहिले सकिने, टुंगो छैन ।

रकम खर्चका हिसाबले आकाशे पुलका लागि ३० प्रतिशत रकम खर्च भइसकेको छ । कम्पनीले धेरै ठाउँमा ठेक्का लिने र काम सुरु गरे पनि बीचबीचमा रोक्ने गर्दा यस्तो भएको सरोकारवालाहरू बताउँछन् । ‘निर्माण कम्पनीलाई समयमा काम नगरे पनि कारबाही नहुने र सजिलै समय थप्न सकिन्छ भन्ने विश्वासले गर्दा यस्तो भएको हो,’ उद्योग वाणिज्य महासंघका केन्द्रीय सदस्य सुरेन्द्र श्रेष्ठले भने ।

समय सकिएपछि ठेकेदार कम्पनीले अहिले निर्वाचन, बन्दलगायतका कारण काम गर्न नसकिएको दाबी गर्दै आठ महिना म्याद थपका लागि आयोजनाको कार्यालयमा निवेदन दिएको थियो । आयोजनाले भने चेतावनीसहित ६ महिनाको म्याद थपेको कार्यालय प्रमुख जीवेन्द्र मिश्रले बताए ।

अबको ६ महिनाभित्र पनि पुल निर्माण नसकिए अर्को दिनदेखि नै हर्जना लगाउने उनले बताए । ‘यसअघि पटक–पटक चेतावनी दिएकाले अबको ६ महिनाभित्र कम्पनीले १० वटै आकाशे पुलको निर्माण काम सक्नेछ,’ मिश्रले भने, ‘ठेकेदार कम्पनीले यही प्रतिबद्धता जनाएको छ ।’ आउँदो ६ महिनाभित्र निर्माणाधीन सडक सम्पन्न गर्ने आयोजनाको लक्ष्य छ । सडक विस्तारसँगै पैदल यात्रुलाई सडक वारपारमा समस्या देखिएको र दुर्घटना कम गर्न सडकभन्दा पहिले आकाशे पुलको निर्माण सक्ने आयोजना प्रमुख मिश्रले बताए ।

बेलहिया–बुटवल खण्डको दूरी २७ किलोमिटर छ । त्यसमध्ये बुटवल आसपास ७ र भैरहवाका ३ स्थानमा पुल निर्माण हुँदैछन् । बुटवल क्षेत्र अन्तर्गत योगीकुटी, कालिकानगर, राजमार्ग चौराह, मिलनचोक, अस्पताल लाइन, ट्राफिक चोक र गोलपार्कमा आकाशे पुल निर्माण हुँदैछन् ।

भैरहवामा बुद्धचोक, देवकोटा चोक र आँखा अस्पतालअगाडि पुल बन्दैछन् । सबै पुल ५ मिटर उचाइ, २४ मिटर लम्बाइ र साढे २ मिटर चौडाइका हुनेछन् । तिनलाई एकै किसिमबाट डिजाइन गरिएको छ । पुलमा टल्किने खालको डिजिटल बोर्ड राखिनेछ । यसले उज्यालो र सौन्दर्य थप बढाउने इन्जिनियर गोविन्द श्रेष्ठले बताए । ‘त्यसमा ट्राफिक चेतना जगाउने खालका सूचनासमेत राखिनेछन्,’ उनले भने, ‘यसले सडक दुर्घटना कम गर्न पनि मद्दत गर्नेछ ।’

Esewa Pasal

प्रकाशित : भाद्र १९, २०७५ १०:२५
प्रतिक्रिया
पठाउनुहोस्
ADVERTISEMENT
ADVERTISEMENT

अनुपात नमिल्दा गुणस्तरमा समस्या

अमृता अनमोल

बुटवल — शिक्षक दरबन्दी पुन: वितरण सुझाव कार्यदलको तथ्यांकअनुसार पाल्पाको बगनासकाली गाउँपालिकामा प्राथमिक तहमा एक शिक्षक बराबर १२ विद्यार्थी छन् ।

पाल्पाकै रिब्दीकोटमा एक शिक्षकको भागमा १४ विद्यार्थी पर्छन् । कपिलवस्तुको विजयनगरमा भने एक शिक्षक बराबर १ सय २६ विद्यार्थी छन् । निम्न माध्यमिक तहमा पनि पाल्पाकै बगनासकाली गाउँपालिकामा एक शिक्षकको जिम्मामा २० विद्यार्थी मात्रै छन् ।

कपिलवस्तुको विजयनगरमा भने एक शिक्षक बराबर २ सय ४९ विद्यार्थी अनुपात छ । माध्यमिक तहमा गुल्मीको रूरू गाउँपालिकामा एक शिक्षक बराबर १३ विद्यार्थी छन् । सबैभन्दा बढी रूपन्देहीको मर्चवारी गाउँपालिकामा एक शिक्षक बराबर १ सय ८७ विद्यार्थी छन् ।

शिक्षा नियमावलीले विद्यार्थी शिक्षक अनुपात हिमालमा ४०, पहाडमा ४५ र तराई तथा उपत्यकामा ५० हुनुपर्ने व्यवस्था गरेको छ । यसलाई घटाउँदै विद्यालय क्षेत्र विकास योजनाले विद्यार्थी–शिक्षक अनुपात हिमाली क्षेत्रमा ३०, पहाडी क्षेत्रमा ३५ र तराई तथा उपत्यकामा ४० रहनुपर्ने अवधारणा ल्याएको छ ।

तर, प्रदेश ५ मा भने यो अवधारणाअनुसार शिक्षक व्यवस्थापन भएका छैनन् । यसले गर्दा सामुदायिक विद्यालयको व्यवस्थापन र शैक्षिक गुणस्तर कायम गर्ने विषय चुनौतीपूर्ण बनेको सरोकारवालाको गुनासो छ ।

प्रदेश ५ जस्तै देशभरको दरबन्दी मिलानका लागि संघीय सरकारले महाश्रम शर्माको संयोजकत्वमा गठन गरेको दरबन्दी पुन: वितरण सुझाव कार्यदलले ७ वटै प्रदेशमा सुझाव संकलन थालेको छ । आइतबार बुटवलमा आयोजना गरेको सुझाव संकलन कार्यक्रममा सरोकारवालाले शैक्षिक गुणस्तरका लागि विद्यालयमा आएका विद्यार्थी संख्याका आधारमा मात्रै दरबन्दी मिलान गर्न नहुने सुझाव दिए ।

विद्यार्थी संख्या मात्रै होइन, विषय शिक्षक, प्राविधिक शिक्षक र मातृभाषा शिक्षकको पनि व्यवस्था हुने गरी विषय र कक्षा हेरेर दरबन्दी मिलान गर्न शिक्षक संघ रूपन्देहीका अध्यक्ष तथा शान्ति नमुना माविका प्रधानाध्यापक कुलप्रसाद लामिछानेले आग्रह गरे ।

कक्षा व्यवस्थापनका लागि एक कक्षामा ३० भन्दा बढी विद्यार्थी राख्नु नपर्ने वातावरण बनाउन सहभागीले सुझाव दिए । ‘कक्षा ३ सम्मका बालबालिकालाई त ३० जनाभन्दा बढी राखेर हेर्नै सकिँदैन,’ जनज्योति मावि कपिलवस्तुका प्रधानाध्यापक विष्णुप्रसाद भण्डारीले भने, ‘बरु ठूलो कक्षामा धेरै विद्यार्थी राख्ने गरी सानो कक्षामा विद्यार्थी घटाउनुपर्छ ।’

उच्च माध्यमिक तहका शिक्षक, प्राविधिकतर्फका प्रशिक्षकको व्यवस्थापन र धार्मिक वैकल्पिक प्रकृतिका विद्यालयमा शिक्षक व्यवस्थापनका लागि छुट्टै दरबन्दी सिर्जना गर्न उनले आग्रह गरे ।

प्रकाशित : भाद्र १८, २०७५ ०९:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT