युवा क्लबद्वारा विद्यालयमा शिक्षक

हरि गौतम

रुकुमपूर्व — जिल्लास्थित एक युवा क्लबले स्थानीय विद्यालयका लागि शिक्षक उपलब्ध गराएको छ । भूमे गाउँपालिका २ गाबाङको सल्लेरी जनविकास युवा क्लबले आफैं तलब बेहोरेर स्थानीय हिमालय आधारभूत विद्यालयलाई शिक्षक उपलब्ध गराएको हो ।

रुकुमपूर्व भूमे गाउँपालिका २ को सल्लेरी जनविकास युवा क्लबले शिक्षक नियुक्त गरिदिएको हिमालय आधारभूत विद्यालय गाबाङ । तस्बिर : हरि

पर्याप्त शिक्षक नभएका कारण पठनपाठनमा समस्या भएपछि शिक्षक नियुक्त गरेर पठाइदिएको क्लबका अध्यक्ष दिलमान बुढाले बताए ।

‘विद्यालयमा शिक्षक अभाव हुँदा गाउँकै केटाकेटीले समस्या भोग्नुपरेपछि थोरै भए पनि सहयोग होस् भनेर शिक्षक नियुक्त गरेर पठाइदिएका छौं,’ बुढाले भने, ‘आशा छ, यसबाट पक्कै पनि विद्यालय र बालबालिकालको सिकाइमा टेवा पुग्नेछ ।’

Yamaha

बालशिक्षादेखि ५ कक्षासम्म पठनपाठन हुने उक्त विद्यालयमा रुजी बुढालाई मासिक ५ हजार रुपैयाँका दरले तलब बेहोर्ने गरेर पठाइएको छ । क्लबले देउसीभैलोबाट संकलित रकम, श्रम गरेर जम्मा गरेको रकम तथा विभिन्न ठाउँबाट क्लबलाई आएको सहयोग रकमको ब्याजबाट शिक्षकको तलब व्यवस्थापन गर्ने गरी योजना बनाएको छ ।

अहिले क्लबले तीन लाख रुपैयाँ लगानी गरेको छ । सोको ब्याजबाट विद्यालयमा शिक्षक खटाइएको हो । ‘पाँचवर्षे कार्ययोजना बनाएर विद्यालयमा शिक्षक नियुक्त गरिएको छ, विद्यालयको अवस्था सुधार हुँदै गएमा शिक्षकको तलब बढाउनेदेखि विद्यालयमा थप सहयोग गर्ने पनि क्लबले योजना बनाएको छ,’ अध्यक्ष बुढाले भने ।

पाँच जना शिक्षक कार्यरत रहेको यस विद्यालयमा अब शिक्षकको संख्या ६ पुगेको छ । विद्यालयको शैक्षिक गुणस्तर वृद्धिका लागि विद्यालयलाई शिक्षक उपलब्ध गराइएको क्लबले जनाएको छ ।

प्रधानाध्यापक झगबहादुर श्रेष्ठले सल्लेजरी जनविकास युवा क्लबले विद्यालयमा शिक्षक पठाइदिएको बताए । शिक्षकको संख्या थपिएपछि पठनपाठनमा सहजता हुने श्रेष्ठको भनाइ छ ।

क्लबले फोहोर व्यवस्थापन गर्न भन्दै विद्यालय परिसरका साथै गाउँमा पनि खाडल तयार पारेको छ । खाडलमा कुहिने र नकुहिने वस्तु राख्ने, कुहिनेबाट मल बनाउने र नकुहिने खाडलमा जम्मा भएको फोहोरलाई पुन: व्यवस्थापन गरिने क्लबका सचिव जयमान बुढा मगरले बताए ।

प्रकाशित : भाद्र १९, २०७५ १०:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खच्चड बेचेर गाडी

हरि गौतम

रुकुम पश्चिम — कुनै बेलाका खच्चड मालिक हाल गाडी साहु । सडकले उनीहरूलाई खच्चडबाट गाडी मालिकमा रूपान्तरण गरिदियो । केही लगानीसँगै आम्दानी पनि बढयो ।

रुकुम पश्चिम आठबीसकोट नगरपालिकाको छरेबगरदेखि डोल्पाको सिमाना त्रिवेणीसम्म चल्ने जिपमा सवार स्थानीयवासी । तस्बिर : हरि गौतम

आठबीसकोट नगरपालिका–४, का पृथीबहादुर विष्टसँग दुईवटा गाडी छन् । एक यात्रुबाहक जिप र मालबाहक टयाक्टर । एक वर्षअघिसम्म ५ खच्चडका मालिक विष्टले गत पुसमा खच्चड बिक्री गरेर गाडी खरिद गरेका हुन् ।

उनकै छिमेकी कर्ण केसीले पनि खच्चड बेचेर दुईवटा टयाक्टर खरिद गरेका छन् । आठबीसकोट नगरपालिका–४, को छरेबगरदेखि डोल्पाको सिमानासम्म टयाक्टरबाटै सामान ढुवानी गरेर राम्रो आम्दानी गरिरहेको उनले बताए ।

विष्ट र केसी मात्रै होइन आठबीसकोटका अधिकांश खच्चड व्यवसायीले पछिल्लो समय गाडी खरिद गरेर ढुवानी व्यवसाय सुरु गरेका छन् । जाजरकोट–डोल्पा सडक डोल्पासम्मै पुगेपछि खच्चड व्यवसायीले खच्चड छाडेर गाडी किनेका हुन् । ‘खच्चडले सामान ढुवानी गर्ने सबै ठाउँमा सडक पुगिसकेपछि गाडी किनेका हौं,’ विष्टले भने, ‘गाडी नै गुड्ने भएपछि खच्चडको काम भएन ।’ सडक पुग्नुअघि उनीहरूले खच्चडमा सामान लादेर डोल्पा पुर्‍याउने काम गर्थे । अहिले त्यो काम उनीहरूका गाडीले गरिरहेका छन् ।

२० लाखमा ५ खच्चड बिक्री गरेर उनले जिप र टयाक्टर खरिद गरेको केसीले बताए । खच्चड बिक्रीबाट आएको रकममा अरू थपेर उनले टयाक्टर र जिप खरिद गरेको उनको भनाइ छ ।

सडक निर्माण भइसकेपछि खच्चड पालिराख्नुको कुनै अर्थ नभएको केसीले जनाए । ‘खच्चडको ठाउँमा गाडी गुड्ने भएपछि हामीहरू गाडी खरिदतर्फ लाग्यौं,’ उनले भने, ‘आम्दानी पनि राम्रो हुने भएकाले ऋण गरेरै भए पनि गाडी किनियो ।’ उनका अनुसार ढिला खच्चड बिक्री भएकाहरू पनि गाडी किन्ने क्रममै छन् ।

जिल्लामा परम्परागत ढुवानीका साधन खच्चड प्रयोग शून्य बनेको छ । एक दशकअघिसम्म जिल्लाका सबै ठाउँमा खच्चडमार्फत नै मालसामान ढुवानी हुने गरेको थियो । गोतामकोट क्षेत्रमा पालिएका खच्चडले अहिले डोल्पातिर सामान ढुवानी गर्ने गरेका छन् ।

डोल्पा सदरमुकामदेखि गाउँगाउँमा मालसामान ढुवानी गर्न खच्चडकै भर पर्नुपर्ने बाध्यता छ । अहिले जाजरकोट, नलगाड नगरपालिका–१२, तल्लुबगरबाट झोलुंगेपुल तरेपछि भेटिने छरेरबगरबाट डोल्पाको सीमासम्म गाडी सञ्चालन भइरहेका छन् ।

डोल्पा र रुकुम पश्चिमको सिमाना त्रिवेणीदेखि माथि पनि गाडी जाने गरेका छन् । स्थानीय दीनानाथ विकले जाजरकोट–डोल्पा सडकको छरेबगर–त्रिवेणी खण्डमा गाडी चल्न थालेपछि आउजाउका साथै सामान ढुवानीमा सहज भएको बताए ।

प्रकाशित : भाद्र १९, २०७५ ०८:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT