गाउँका सडक हिलाम्य

गिरुप्रसाद भण्डारी

प्यूठान — बाग्दुला–मच्छी सडक हिलाम्य बनेपछि गाडी सञ्चालनमा समस्या देखिएको छ । पहिरो हटाइएको छैन । हिलोमाथिबाट यातायातका साधन सञ्चालन गरिएकाले सडकको बेहाल छ ।

बाग्दुला–­मच्छी सडकअन्तर्गत मच्छी–ढाँड सडक क्षेत्रमा देखिएको खाडल र हिलो । तस्बिर : गिरुप्रसाद भण्डारी

मरन्ठानादेखि मच्छी र मच्छीदेखि ढाँडसम्मको बाटो काम नलाग्ने बनेको ओखरकोट, दारिमचौरका पदम खड्काले बताए ।

‘सडक दिनदिनै बिग्रिरहेको छ,’ उनले भने, ‘असारयता खाडल पुरिएका छैनन् ।’ बस, ट्रक हिलोमा फस्ने र साना जिप, मोटरसाइकल डुब्नाले यात्रुले दु:ख पाइरहेका छन् । जिल्ला प्राविधिक कार्यालय अन्तर्गत राष्ट्रिय ग्रामीण यातायात सुदृढीकरण कार्यक्रम (एसएनआरडीपी) मार्फत सडक मर्मतका लागि राखिएका कर्मचारी हटेपछि यस्तो बेहाल भएको हो ।

Yamaha

‘ती कर्मचारीले पहिरो पन्छाउने, नाला तर्काउने काम गर्थे,’ खडकाले भने, ‘उनीहरूले असारदेखि काम नगरेपछि सडकको बिजोग भएको हो ।’ प्यूठान नगरपालिका ९ स्थित मरन्ठाना र झिमरुक गाउँपालिका ६ चिसाबाङ मच्छी क्षेत्रमा सडक धेरै बिग्रिएको तुसाराका शंकर थापाले बताए । ‘पानी परेका बेला सडकमा पैदल हिँड्न सकिँदैन,’ उनले भने, ‘स्थानीय सरकारको ध्यान पुगेको छैन ।’ उनले आफ्नो क्षेत्रमा पर्ने स्थानीय तहले मर्मत नगर्दा दु:ख पाएको बताए ।

मरन्ठाना–चिसाबाङ मच्छी क्षेत्रको सडक बाग्दुला भीमगिठे सडक आयोजना अन्तर्गत पर्ने भएकाले वडाबाट मर्मतमा बजेट विनियोजन नगरेको झिमरुक गाउँपालिका ६ का वडाध्यक्ष निमानसिङ जीसीले बताए । ‘आयोजनामा परेकाले खाडल पुर्नेसमेत बजेट राखेनौं,’ उनले भने, ‘हिजोआज हिलो र खाडलले निकै समस्या भइरहेको छ ।’ उनले आयोजनामार्फत काम चाँडै अगाडि बढाउन पहल गरेको बताए ।

बिजुवार–­ढुंगेठाटी–रोल्पा सडक पैदल हिँड्नसमेत नमिल्ने गरी बिग्रेको प्यूठान नगरपालिका ५ ढुंगेठाँटीका सानुकुमार भण्डारीले बताए । ‘हिजोआज यो सडक कसैले हेर्दैन,’ उनले भने, ‘धेरै ठाउँमा सडक भैंसी खाल बस्ने खाडल बनेका छन् ।’ सडकमा थुप्रिएको हिलोका कारण जनताले धेरै दु:ख पाएको उनले बताए ।

जिल्लामा ७ ग्रामीण सडकमा ७५ सडक मर्मत सम्भारकर्ता थिए । उनीहरूले दैनिक ५ सय ५० रुपैयाँका दरले महिनमा २६ दिनको ज्याला पाउँथे ।

Esewa Pasal

प्रकाशित : भाद्र २३, २०७५ ०९:५१
ADVERTISEMENT
प्रतिक्रिया
पठाउनुहोस्
ADVERTISEMENT

पर्यटकीय पूर्वाधार बनाउन अध्ययन

सडक सुधार र दरबार पुनर्निर्माणलगायत पूर्वाधारका लागि बजेट विनियोजन
गिरुप्रसाद भण्डारी

प्यूठान — ऐतिहासिक स्थल भित्रीकोट दरबार क्षेत्रमा पर्यटकीय पूर्वाधारको गुरुयोजना बनाउन सम्भाव्यता अध्ययन थालिएको छ । प्यूठान नगरपालिकाको आर्थिक सहयोगमा आइतबारबाट प्राविधिक टोलीले अध्ययन सुरु गरेको हो ।

प्यूठानको भित्रीकोट क्षेत्रमा घुम्न आएका आन्तरिक पर्यटक । तस्बिर : गिरुप्रसाद

भित्रीकोट क्षेत्रमा रहेका १७ ऐतिहासिक केन्द्रलाई पूर्वाधार विकास गर्न लागिएको छ । भित्रीकोट आउने पर्यटकलाई घुम्न र एक दिन बस्न अभिप्रेरित गर्ने उद्देश्यले नगरपालिकाले पूर्वाधार विकासको योजना बनाएको जनाएको छ ।

ऐतिहासिक भित्रीकोट किल्ला, रक्तीपोखरी, खुलखुलेडाँडा, वृत्तिस्थान, ढुंगेपाइला, रानीगुफालगायत गन्तव्यलाई मुख्य केन्द्रमा राखेर अध्ययन सुरु गरिएको प्यूठान नगरपालिकाका मेयर अर्जुनकुमार कक्षपतिले बताए ।

नगरपालिकाभित्रका पर्यटकीय स्थानमध्ये भित्रीकोट मुख्य पर्यटकीय गन्तव्य रहेकाले पहिलो प्राथकिकतामा राखेर विकास गर्न थालिएको उनले बताए । सडक सुधार, दरबार पुनर्निर्माणलगायत पूर्वाधारका लागि बजेट विनियोजन गरेको नगरपालिकाले जनाएको छ ।

यस क्षेत्रका गुरुङ संस्कृति, ऐतिहासिक डल्ले सराय नाच, रक्तीपोखरी, ढुंगेपाइला, भित्रीकोट दरबारलगायत यहाँका मन्दिरको संरक्षण गरी पूर्वाधार निर्माण गरिने भएको छ । ‘नगरसभाले भित्रीकोट दरबार क्षेत्रलाई नगरको मुख्य पर्यटकीय स्थलका रूपमा लिएर बजेट व्यवस्था गरेको छ,’ कक्षपतिले भने, ‘अब यहाँ आउने पर्यटकलाई केही दिन यतै रमाउने वातावरण बनाउनेछौं ।’

भित्रीकोटबाट प्यूठान उपत्यका हेर्न सकिन्छ । एक वर्षअघि जिल्ला वन कार्यालयको सहयोगमा पार्क, भ्यु टावर, गौल चौपारीलगायत पूर्वाधार निर्माण गरिएको छ । ‘भित्रीकोट घुम्न आउने पर्यटक केही समय घुमेर फर्कने गर्दा यहाँका स्थानीयले कुनै फाइदा लिन नसकेको प्यूठान नगरपालिकाका ४ का वडाध्यक्ष लक्ष्मीप्रकाश राजभण्डारीले बताए ।

‘बास बस्ने गरी पर्यटकलाई भुलाउने पूवार्धार बनाउनुपर्छ,’ उनले भने, ‘आएका पर्यटकलाई एक दिन भए पनि यहाँ रोक्न सकियो भने स्थानीय स्वरोजगार हुने थिए ।’ दिनभर भित्रीकोट क्षेत्रमा घुमाउने र बेलुका गुरुङ गाउँमा बास बसाल्ने गरी होमस्टे बनाउने नगरपालिकाको योजना रहेको राजभण्डारीले बताए ।

प्रकाशित : भाद्र १८, २०७५ ०९:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT