सस्तो बजारमा ग्राहकको भीड

अमृता अनमोल

बुटवल — उपभोक्तालाई चाडपर्व उपयोगी वस्तु सस्तो र सुलभ रुपमा उपलब्ध गराउन बुधबार यहाँ सस्तो दसैं बजार सुरु भएको छ  । उद्योग वाणिज्य संघले बुधबारदेखि बजार आयोजना गरेको हो  ।

त्यहाँ उपभोग्य वस्तुका ४० स्टल छन् । बालमन्दिर परिसरमा लागेको बजारमा घिउ, चिनी, नुन, चामल, चिउरा, चिया, तेल, सावुन, मसला लगायतका दैनिक उपभोग्य वस्तु छन् । पेय पदार्थ, जुत्ता, सावुन सरफ, लत्ताकपडा, माछामासुलगायत वस्तु उपलब्ध छन् । सबै सामान बजार मुल्यभन्दा १५ देखि ४० प्रतिशतसम्म छुटमा उपलब्ध रहेको संघले जनायो ।

साल्ट टेर्डिङ कर्पोरेसनले नुन, चिनी, लुम्बिनी दुग्ध वितरण आयोजनाले घिउ ल्याएका छन् । चिनी ५८ र घिउ ८ सय १० रुपैयाँ प्रतिकिलोमा बिक्री गरिएको छ । आयोजक संघका अध्यक्ष खिमबहादुर हमालले ससाना सामान किन्न भारतीय बजार जाने उपभोक्तालाई रोक्न र स्वदेशी बजार प्रवद्र्धन गर्न बजार लगाएको बताए । ‘चिनी लगायत केही दैनिक उपभोग्य वस्तु हामीले खरिद गरेको भन्दा पनि सस्तोमा बेचेका छौं,’ उनले भने, ‘स्वदेशी वस्तु र बजारप्रति उपभोक्ताको आकर्षण बढाउन पनि यसो गरेका हौं ।’ सीमावर्ती बजार भएकाले यहाँका धेरै उपभोक्ता चाडबाड आयो कि धेरै उपभोग्य सामान किन्न भारतको सुनौली पुग्छन् ।

तर, सुनौलीको भन्दा यहाँ धेरै सामान सस्तोमा उपलब्ध छन् । भारतीय बजारभन्दा स्वदेशमा सस्तो मूल्यमा पाइने सामानबारे उपभोक्तालाई जानकारी गराउने व्यवस्था गरेको संघका वरिष्ठ उपाध्यक्ष उज्जवलकुमार कसजुले बताए । ‘सामान सस्तो दिएर र गुणस्तर बढाएर मात्र व्यापार बढाउन सकिन्छ,’ उनले भने, ‘उपभोक्तालाई भारतीय बजारमा जानबाट रोक्न नसकेकाले बजारमा मूल्य सूचीबारे पनि जानकारी दिन थालेका हौं ।’

यहाँका उपभोक्ताले भारतमा बढी किन्ने अन्तर्राष्ट्रिय बहुचर्चित कम्पनीका सामान मुलुकमा सस्तो मूल्यमा उपलब्ध छन् । हर्लिक्स, बुस्ट, चिया, डाबर च्यवन प्रास, सेरलेक्स, दूध, ल्याक्टोजिन, डाबर लाल दन्तमञ्जन, डाबर अमला तेल छन् । साबुन, सरफ, फेयर एन्ड लब्ली, मञ्जन, लगायतका सामान नेपाली बजारमा भन्दा भारतीय बजारमा धेरै महँगा छन् ।

मेलाले उपभोक्तालाई आफ्ना सामानबारे सही सूचना दिन र सचेत बनाउन पनि सहयोग गर्ने आयोजक अध्यक्ष हमालले बताए । बजारमा दसैंमा चाहिने नयाँ नोट सटहीको समेत व्यवस्था छ । आयोजकले राष्ट्र बैंक सिद्धार्थनगरको सहयोगमा उपभोक्तालाई ५ हजारका दरले नोट साट्ने व्यवस्था मिलाएका हुन् । सस्तो बजार ५ दिनसम्म चल्नेछ।

Yamaha

प्रकाशित : आश्विन २५, २०७५ ०९:३६
ADVERTISEMENT
प्रतिक्रिया
पठाउनुहोस्

बबई पुल पुनर्निर्माणका लागि दबाब

कमल पन्थी

बर्दिया — गुलरिया र बारबर्दिया नगरपालिका जोड्ने जब्दीघाटस्थित बबई नदीमा निर्मित पुल निर्माण गराउन स्थानीयले जनप्रतिनिधिलाई चौतर्फी दबाब दिन थालेका छन्  ।

पप्पु कन्स्ट्रक्सनले बनाएको केही समयमै भासिएको बर्दियाको बबई पुल । तस्बिर : कान्तिपुर

गत वर्ष साउन २८ गते बबई नदीको जब्दीघाटमा पुल भासिएपछि दुई नगरपालिकाबीच यातायात सम्पर्क विच्छेद भएको थियो ।

हस्तान्तरण नहुँदै पुल भासिएपछि अख्तियार दुरुपयोग अनुसन्धान आयोगले पप्पु कन्स्ट्रक्सनका तत्कालीन अध्यक्ष हरिनारायण रौनियार, हालका अध्यक्ष छोरा सुमितलगायतविरुद्ध विशेष अदालतमा बिगो सहित मुद्दा दायर गरेको छ । पुल भासिएका कारण एक वर्षभन्दा बढी स्थानीय यातायात सम्पर्कबाट विच्छेद भएपछि कष्टकर यात्रा गर्न बाध्य छन् ।

बारबर्दिया ४ का परशुराम थारूले पुल भासिएका कारण स्थानीयवासी निकै कष्टकर यात्रा गर्नु परेको बताए । पुल भासिएपछि सबैभन्दा बढी बिरामी प्रभावित भएका छन् । ‘सदरमुकाम पुग्न निकै समस्या भएको छ,’ उनले भने, ‘आधा घण्टाको समय लाग्ने जिल्ला अस्पताल गुलरिया पुग्न दुई घण्टा लाग्छ ।’ बारबर्दिया र गुलरिया नगरपालिका जोड्ने बबई नदी स्थित जब्दीघाटमा भासिएको पुल निर्माण कहिले हुने भन्दै स्थानीय दिनहुँ जनप्रतिनिधिलाई दबाब दिँदै आएका छन् ।

बारबर्दियाका मेयर दुर्गाबहादुर थारूले नगरलगायत जिल्लावासीले पुल निर्माणका लागि दिनहुँ दबाब दिने गरेको बताए । ‘अख्तियारले कारबाही प्रक्रिया अघि बढाएपछि अहिले पुल निर्माणका लागि चौतर्फी दबाब बढेको छ,’ उनले भने, ‘त्यसैले हामीले पनि दबाबमूलक कार्यक्रम गर्दैछौं ।’ पप्पु कन्स्ट्रक्सनले करिब ६ वर्षअघि सुरु गरेको उक्त पुल १६ करोड ६८ लाखको लागतमा निर्माण गरेको थियो । पुल भासिएका कारण यस भेगका करिब एक लाख बासिन्दा प्रभावित भएका छन् ।


गुलरिया नगरपालिकाका प्रमुख मुक्तिनाथ यादवले पुल छिटो निर्माण गर्न दबाब दिन सडक आन्दोलन गर्ने बताए । ‘दोषीमाथि कारबाही हुँदै जान्छ तर पुल निर्माणको काम रोकिनु हुन्न,’ उनले भने, ‘पुल आउँदो असार मसान्तभित्रै सम्पन्न गर्ने गरी सरकारलाई दबाब दिन्छौं ।’ पुल भासिएपछि किसानले उत्पादन गरेको खाद्यान्न गुलरियालगायत दक्षिणी भेगमा पुर्‍याउन सकेका छैनन् । धान र गहुँको उत्पादन बढी हुने बारबर्दियाका किसान पुल भासिएपछि सबैभन्दा बढी पप्पु कन्स्ट्रक्सनविरुद्ध आक्रोशित छन् । अख्तियारको निर्णय भएपछि केही आशा पलाएको बारबर्दिया १ का किसान लहानु थारूले बताए ।

पुलको १७ वटा स्परमध्ये पूर्वतिरको एउटा पिल्लर भासिएको छ । पुल भासिएपछि अन्य दुईवटा पिल्लर क्रेक भएका छन् । पुल भासिएका एकसहित तीन पिल्लर पुनर्निर्माण भए यातायात सुचारु हुन्छ । डिभिजन सडक कार्यालय नेपालगन्जका प्रमुख इन्जिनियर अर्जुन बमले भासिएको पुल निर्माण गर्ने आदेश आए ५ महिनामै निर्माण गर्न सकिने बताए । डिभिजन सडक कार्यालयले तीन महिनाअघि पुलको वैकल्पिक डिजाइन तयार गरी पप्पु कन्स्ट्रक्सनलाई पुनर्निर्माणका लागि पत्रचार गरेको थियो ।

‘भासिएको पुल निर्माणको जिम्मा सरकारको होइन पप्पु कन्स्ट्रक्सनको हो,’ उनले भने, ‘तर, गर्न सरकारबाटै निर्देशन आउनुपर्छ ।’ सदरमुकामसँग पूर्व–पश्चिम राजमार्ग जोड्ने सबैभन्दा नजिकको पुल भासिएपछि गुलरिया–रम्मापुर सडक खण्डमा पनि सवारी साधन ठप्प छ । तीन वर्षअघि ठेकेदार कम्पनी र तात्कालीन सडक डिभिजन कार्यालयका प्रमुखको मिलेमतोमा निर्मित उक्त पुल कमलस सामग्री र डिजाइनअनुसार नभएको भन्दै स्थानीय प्रशासनले विरोध गर्दै काम रोक्ने प्रयास गरेका थिए । भासिएको पुल त अहिले पर्यटकीय केन्द्र जस्तै भएको छ ।

प्रकाशित : आश्विन २५, २०७५ ०९:३५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT