विद्युत आयोजना पुरियो
रुकुमपूर्व — यहाँको एक लघु जलविद्युत आयोजना पहिरोले पुरेको छ । सिस्ने गाउँपालिका–८ धपेमा रहेको जामाखोला लघु जलविद्युत आयोजनाको विद्युत उत्पादन गृह माथिबाट खसेको पहिरोले पुरिएको हो ।
मंगलबार बिहान माथिबाट आएको पहिरोले आयोजनामा ठूलो क्षति पुर्याएको छ । पहिरोमा परी स्थानीय २० वर्षीया जेनुका गौतम घाइते भएकी छन् ।
घाइते गौतमलाई उपचारको लागि रुकुम पश्चिमको जिल्ला अस्पताल सल्लेतर्फ पठाइएको वडा अध्यक्ष खर्कसिङ थापाले बताए । पेनस्टक पाइप फुटेपछि पहिरो गएको अध्यक्ष थापाले बताए ।
पहिरो झरे लगत्तै वडाअध्यक्ष थापासहित स्थानीय विद्युत आयोजनाको मुख्य मेशिन जोगाउने प्रयासमा लागेका छन् । पहिरोमा पुरिएको मेशिन जोगाउने प्रयास भइरहेको थापाले जानकारी दिए ।
४ वर्षअघि निर्माण गरिएको उक्त आयोजनाबाट ९ सय बढी उपभोक्ता लाभान्वित छन् । ९० किलो वाट उत्पादन क्षमताको उक्त विद्युत आयोजनाबाट रुकुमपूर्व सिस्ने गाउँपालिकाका ७ र ८ वडा तथा रुकुम पश्चिम मुसीकोट नगरपालिकाको १ नम्वर वडाको छिङ वस्तीमा बत्ति बलेको थियो ।
प्रकाशित : आश्विन ३०, २०७५ ०८:५८