सामाजिक संस्कार नबदलिँदा महिला हिंसा : सभामुख महरा

दुर्गालाल केसी

दाङ — संघीय संसद्का सभामुख कृष्णबहादुर महराले सामाजिक संस्कार परिवर्तन हुन नसक्दा महिला हिंसा हुने गरेको बताएका छन् ।

महिला बालबालिका तथा ज्येष्ठ नागरिक मन्त्रालयले बिहीबार घोराहीमा गरेको ‘लैंगिक हिंसा अन्त्यका लागि सरोकारवाला निकायको जिम्मेवारी र भूमिका’ विषयक अन्तर्क्रियामा बोल्दै उनले समाजमा रुढिवादी सोच र विश्वासहरु अझै पनि कायम भएकाले हिंसा भइरहेको बताए ।

Yamaha


‘मानिसहरुमा अझै पनि विभिन्न विभेद्पूर्ण संस्कार र परम्पराप्रति विश्वास छ । समाज यस्ता सोचबाट माथि उठ्न नसक्दा महिलामाथि विभेद र हिंसा भएको छ,’ उनले भने, ‘यस्ता गलत प्रचलन हटाउन सामाजिक चेतनाको जरुरी छ । सामाजिक जागरण फैलाउन आवश्यक छ ।’

महिला हिंसाविरुद्ध कडा कारबाहीका कानुनी व्यवस्था भए पनि प्रभावकारी कार्यान्वयनमा समस्या भइरहेको उनले बताए । ‘नीति नियमहरु राम्रा बनेका छन् । त्यसको कार्यान्वयन गर्न सकेमा महिला हिंसा न्यूनिकरणमा धेरै मद्दत पुग्छ,’ उनले भने,‘प्रभावकारी कार्यान्वयनमा समस्या देखिएको छ । हिंसाका दोषीलाई कारवाही गर्न सबैले सहयोग गर्नुपर्छ ।’

महिला बालबालिका तथा ज्येष्ठ नागरिकमन्त्री थममाया थापाले महिला हिंसा विरुद्धको १६ दिने अभियानअन्तर्गत प्रदेशका १२ वटै जिल्लाका जनप्रतिनिधिहरुको सहभागितामा अन्तर्क्रिया आयोजना गरिएको बताइन् । प्रदेशका विभिन्न जिल्लाका गाउँपालिका, नगरपालिका र जिल्ला समन्वय समिति प्रमुख र उपप्रमुख कार्यक्रममा उपस्थित भएका छन् । दुई दिनसम्म महिला हिंसाबारे छलफल गरी न्यूनिकरणको कार्ययोजना तयार गरिने उनले जानकारी दिइन् ।

कार्यक्रममा प्रदेशका सामाजिक विकासमन्त्री सुदर्शन बरालले महिला हिंसा न्यूनिकरणका लागि समाजका सबै सचेत नागरिकको भूमिका महत्वपूर्ण हुने बताए ।

प्रकाशित : मंसिर २०, २०७५ १७:१६
ADVERTISEMENT
ADVERTISEMENT
प्रतिक्रिया
पठाउनुहोस्

छोरी हत्या आरोपमा आमा पक्राउ

सन्तोष सिंह

जनकपुर — जनकपुरमा छोरीलाई घाटी थिचेर हत्या गरेको आरोपमा आमा पक्राउ परेका छिन् । जनकपुर उपमहानगरपालिका २४ सोनापडाकी १६ वर्षीया छोरी सोनी मण्डलको हत्या आरोपमा ४० वर्षीया आमा राजकुमारी देवीलाई प्रहरीले पक्राउ गरेको छ ।  

कक्ष ८ मा अध्ययनरत सोनी मण्डल र आमा राजकुमारीबीच घरायसी झगडाको क्रममा हत्या भएको जिल्ला प्रहरी कार्यालय धनुषाका प्रहरी उपरीक्षक गोविन्द थपलियाले बताए । विवाह गर्ने विषयमा आमा छोरीको झगडा भएपछि एउटै घरमा छुट्टै खाना पकाएर खाँदै आएका थिए ।

बुधबार भान्सामा बनाएको तरुवाको विषयमा झगडा हुँदा सोनीले आमामाथि आग्लो प्रहार गरेको र आमाले छोरीको घाटी थिच्दा सोनीको मृत्यु भएको प्रहरी उपरीक्षक थपलियाले बताए । आफूले मन पराएको केटासँग बिवाह गर्न खोज्दा आमा छोरीको झगडा हुँदै आएको स्थानीय बताउँछन् ।

झगडाको क्रममा बेहोस हुने नाटक गर्ने गरेको र बुधबार घाटी थिचिँदा फेरि बेहोसको नाटक गरेको हुन सक्ने भन्दै केहीबेरपछि हेर्दा सोनी मृत अवस्थामा फेला परेका थिए । भूइँमा ढलेकी छोरीलाई आमाले स्थानीयको सहयोग लिएर पछि खाटमा राखेको अनुसन्धानमा खटेका प्रहरी नायव उपरीक्षक दिपेन्द्र शाहीले बताए ।

प्रकाशित : मंसिर २०, २०७५ १६:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT