जुनीचाँदेमा केन्द्र विवादले बखेडा

जुनीचाँदेका जनप्रतिनिधिबीच लुहादह वा स्यानाखोलामध्ये कुनलाई प्रशासनिक केन्द्र तोक्ने भन्ने विवाद चर्किएको छ । गाउँपालिका अध्यक्षपक्षले लुहादहलाई र अन्य केही वडा अध्यक्षले स्यानाखोलालाई केन्द्र बनाउन लबिङ गर्दा विवाद भएको हो । दुवै पक्षमा दुई तिहाइ बहुमत नपुगेपछि केन्द्र निर्धारणको निर्णय ढिलाइ भएको हो । निर्वाचन भएको ६ महिनाभित्र सामान्य बहुमतले केन्द्र तोक्ने निर्णय गर्न सकिने प्रावधान थियो तर, ६ महिना बितिसकेपछि दुईतिहाइ बहुमतले निर्णय गर्नुपर्ने प्रावधान रहेको छ ।

‘सर्वसहमति नजुटे पनि ६ महिनाअघि सामान्य बहुमतले निर्णय गर्न सकिन्थ्यो । तर माथिल्ला तहका नेताले प्रदेश तथा संघको निर्वाचनका बेला मतदाता प्रभावित हुन्छन् भन्दै गर्न दिएनन्,’ गाउँपालिका अध्यक्ष कृष्ण केसीले भने, ‘अहिले गाउँसभाको दुई तिहाइ बहुमत जुटाउन कठिन भएको छ ।’

सरकारले जुनीचाँदे गाउँपालिकाको अस्थायी केन्द्र स्यानाखोला नै तोकेको थियो । ११ वडा रहेको गाउँपालिकामा चार/चार वडा तत्कालीन एमाले र माओवादी केन्द्रले र नेपाली कांग्रेसले ३ वटा वडामा जितेको छ । उक्त गाउँपालिकामा अध्यक्ष र उपाध्यक्ष पनि दुवै तत्कालीन माओवादी केन्द्रले नै जितेको छ । जुनीचाँदेका वडाध्यक्ष केन्द्र तोक्ने विषयमा एकमत हुन नसकेपछि समस्या भएको केसीले बताए ।

गाउँपालिकाको केन्द्र नतोक्दा वडा कार्यालय समेत स्थापना हुन नसकी विषयगत कार्यालय समेत अन्योलमा छन् । गाउँपालिकाले पूर्वाधार विकासका लागि आवश्यक बजेटसमेत विनियोजन गर्न सकेको छैन । विषयगत कार्यालय र गाउँपालिकाको कार्यालय भाडाको घरमा बस्दै आएका छन् । विवादका कारण पुँजीगततर्फको बजेटसमेत खर्च हुन सकेको छैन । वैशाख मसान्तसम्म ४० प्रतिशत मात्र पुँजीगत बजेट खर्च भएको गाउँपालिका उपाध्यक्ष शिवा आचार्यले बताइन् ।

अबको १/२ दिनमै गाउँपालिकाको केन्द्र लुहादहलाई नै तोकिने उपाध्यक्ष आचार्यले बताइन् । लुहादह केन्द्र तोक्ने विषयमा अन्तिम सहमति जुटेको उनले बताइन् । २/३ जना वडाअध्यक्षबाहेकको एकमत भएको उनले बताइन् ।