फोन गर्न डाँडामा

बादल लाग्दा वा पानी पर्दा टावरमा जडित सौर्य ऊर्जाले काम नगर्ने भएकाले पटकपटक सेवा अवरुद्ध
कान्तिपुर संवाददाता

सल्यान — दार्मा गाउँपालिकाको मालिका डाँडामा जडित मोबाइल टावरले काम नगर्दा स्थानीयलाई डाँडामा उक्लिएर फोन गर्नुपर्ने बाध्यता छ । मोबाइल नेटवर्कले गाउँपालिकाको केन्द्र फारुलामा काम नगर्दा जनजीवन प्रभावित भएको छ ।

फोन सेवाबाट वञ्चित सल्यानको दार्मा गाउँपालिकाको केन्द्र फारुला । एनसेल, नमस्ते, स्काईका टावर भए पनि स्थानीयले गुणस्तरीय फोन सेवा पाउन सकेका छैनन् । तस्बिर : विप्लव महर्जन । कान्तिपुर

फारुलाका प्रेमबहादुर बुढाले फोन गर्न डाँडामा उक्लिनुपर्ने बाध्यताले स्थानीयलाई सास्ती भएको बताए । ‘मोबाइलमा फोन आउनेबित्तिकै सबै डाँडातिर दौड्न बाध्य छन्,’ उनले भने, ‘बजार क्षेत्र खोंचमा पर्ने भएकाले फोनले राम्ररी काम गर्दैन ।’ गाउँपालिकाका विभिन्न डाँडामा जीएसएम, स्काई, एनसेल लगायतका टावर जडान गरिए पनि अधिकांश वडाका बासिन्दा मोबाइल सेवाबाट वञ्चित छन् ।

स्थानीय केशव केसीले भरपर्दो टावर नहुँदा स्थानीयलाई सास्ती भएको बताए । ‘बस्ती नजिकै फोन लाग्छ तर बोलेको बुभिँmदैन,’ उनले भने, ‘फोनमा कुरा प्रस्ट नबुभिँmदा डाँडामा जानुपर्ने बाध्यता भएको हो ।’

बादल लाग्दा वा पानी पर्दा टावरमा जडित सौर्य ऊर्जाले काम नगर्ने भएकाले पटकपटक सेवा अवरुद्ध हुने गरेको उनको भनाइ छ । केसीले फारुलामा मनी ट्रान्सफर सेवा सञ्चालन गरे पनि सञ्चार समस्याका व्यवसाय सफल नभएको बताए ।

नेपाल टेलिकम र एनसेलले दार्माको मालिका डाँडामा टावर राखे पनि क्षमता विस्तारमा ध्यान नदिएकाले स्थानीयलाई सास्ती भएको बताए । बारम्बार क्षमता विस्तारका लागि माग गरे पनि बेवास्ता भएको उनको भनाइ छ । ‘गाउँपालिकाको दबाबमा टेलिकमले गाउँमा इन्टरनेट सेवा सुरु गरे पनि मोबाइल सेवा भरपर्दो छैन,’ उनले भने, ‘नेटवर्कले काम नगर्दा मोबाइल गीत र एफएम सुन्नमात्र प्रयोग भएको छ ।’

कुमाख र दार्मा गाउँपालिकाका लागि टावर जडान गरे पनि डाँडा वरिपरिका बासिन्दाले मात्र सेवा लिएको उनको भनाइ छ । उनका अनुसार दुई गाउँपालिकाको बेंसीमा रहेका अधिकांश भाग सञ्चारविहीन छन् । दार्मा गाउँपालिका अध्यक्ष निमबहादुर केसीले मोबाइल टावर डाँडामा र बस्ती खोंचमा भएकाले स्थानीयलाई सञ्चार असुविधा भएको बताए । सञ्चार सेवालाई व्यवस्थित बनाउन गाउँपालिकाले योजना बनाएको र चालु वर्षदेखि लागू गर्ने उनको भनाइ छ ।

प्रकाशित : श्रावण ४, २०७५ १०:०७
ADVERTISEMENT
प्रतिक्रिया
पठाउनुहोस्

सदरमुकाममा फोहोर

वर्षात्मा फोहोर बगेर खानेपानी मुहानमा
नगरपालिकाले सम्झौता कार्यान्वयन गरेन : कुसाडावासी
ज्योति कटुवाल

दैलेख — सदरमुकाम नारायण नगरपालिकाको फोहोरले कुसाडा गाउँ दुर्गन्धित बनेको छ । सदरमुकामको फोहोर नारायण नगरपालिका–२, कुसाडा बस्ती नजिकैको जंगल क्षेत्रमा फाल्ने गरिएको छ । गाउँ नजिकै फोहोर फालिएपछि स्थानीयबासी नाक थुनेर दैनिक कामकाज र आउजाउ गरेका छन् ।

दैलेखको नारायण नगरपालिका–२, कुसाडामा फालिएको फोहोर । तस्बिर : ज्योति कटुवाल । कान्तिपुर

फोहोरको दुर्गन्धले पैदल यात्रीलाई आउजाउमा समस्या भएको स्थानीय कल्पना केसीले बताइन् । उनका अनुसार वर्षात्मा त्यो फोहोर बगेर खानेपानीका मुहानमा जाने गर्छ । ‘नगरको लापरबाहीले बस्ती नै दुर्गन्धित बनेको छ,’ उनले भनिन्, ‘गाउँमा झाडापखालालगायतका प्रकोप फैलन सक्ने जोखिम छ ।’

बजारको फोहोर व्यवस्थापनका लागि स्थानीयवासी र नगरपालिकाबीच विभिन्न विकास योजना सञ्चालन गर्ने सहमति भएको थियो । ‘स्थानीयले सडकको स्तरोन्नति गर्ने र अन्य विकास योजना सञ्चालन गर्ने सहमति नगरपालिकाले बेवास्ता गरेको जनाएका छन् । ‘लामो समयदेखि नगरपालिकाले गाउँ नजिकै फोहोर फाल्दै आएको छ,’ स्थानीय कमल थापाले भने, ‘तर गाउँको विकासबारे नगरपालिकाले चासो दिएन ।’ सिसा तथा अन्य कच्चा पदार्थ फोहोरसँगै फालिने भएकाले ठूलो पानी परेको बेला बगाएर बस्तीमा पुर्‍याउने गरेको उनको भनाइ छ । स्थानीय तह निर्वाचनपछि ठूलो अपेक्षा भए पनि पूरा नभएको स्थानीयको गुनासो छ । ‘जनप्रतिनिधि आएपछि फोहोरको दीर्घकालीन व्यवस्थापन हुने र सहमति कार्यान्वयन हुने आशा थियो,’ केसीले भनिन्, ‘झन्झन् फोहोर अव्यवस्थित बनेको छ ।

निर्वाचनको बेला उम्मेदवारले गरेको वाचा पनि पूरा गरेनन् ।’ बजारमा भएको नालीको फोहोर समेत गाउँमा आउने गरेकाले स्थानीयले सास्ती भोग्नुपरेको छ । कुसाडा गाउँमा बजार आसपासको सबै फोहोर तल झर्ने गरेको स्थानीय बताउँछन् । नगरपालिकाले दिनमा एक पटक फोहोर उठाउँदै आएको दाबी गरेको छ, तर दैलेख बजारका आसपासका सडक तथा चोकमा जताततै फोहोरको डंगुर भेटिन्छ ।

अधिकांश स्थानमा सातादेखि थुपारिएको फोहोर नउठाइएको स्थानीयको गुनासो छ । बजार क्षेत्रमा डस्टबिनको व्यवस्था नहुँदा बटुवाले समेत जथाभावी फोहोर फालेका छन् । बजारवासीले घरअगाडि ल्याएर फोहोर थुपार्ने गरेका छन् । ‘जनप्रतिनिधि आएपछि सुरुसुरुमा नियमित सरसफाइ भयो,’ दैलेख बजारका अमर केसीले भने, ‘नगरपालिकाले अहिले अधिकांश हप्ताभरिको फोहोर पनि उठाउन सकेको छैन ।’ उनले एक सातासम्म फोहोर जम्मा हुन थालेपछि बजार क्षेत्रसमेत दुर्गन्धित बन्दै गएको बताए ।

फोहोर फाल्ने ठाउँ भरिए पनि नगरपालिकाले चासो नदिएको स्थानीयको गुनासो छ । किमुगाउँ, झुर्पेसाल र कुइकाना क्षेत्र फोहोरले भरिएपछि नगरपालिकाले सात वर्षदेखि कुसाडामा फोहोर फाल्ने गरेको छ । फोहोरका कारण कुसाडा वरपरको क्षेत्रमा खाली जग्गा भेटाउन मुस्किल हुन थालेको छ ।

जताततै फोहोर भरिए पनि नगरपालिकाले बेवास्ता गरिरहेको स्थानीयको आरोप छ । नगरपालिकाका प्रमुख प्रशासकीय अधिकृत जगत् बस्नेतले फोहोरका कारण बस्तीमा असर पर्न थालेपछि वैकल्पिक स्थानको खोजी भइरहेको बताए । उनले दीर्घकालीन फोहोर व्यवस्थापनका लागि नगरपालिकाले योजना निर्माण गरिरहेको बताए ।

प्रकाशित : श्रावण ४, २०७५ १०:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT