पुल बगाएपछि सास्ती

आधा घण्टाको बाटो एक दिन
भीमबहादुर सिंह

जाजरकोट — नलगाड नगरपालिका–३, कटेका गोवर्धन वलीलाई सोही वडाको कैनाबजारस्थित स्वास्थ्य चौकीमा उपचारका लागि पुग्न ५ घण्टा पैदल हिंड्नुपर्ने बाध्यता छ । त्यस्तै विद्यार्थी राजेन्द्र वली पनि सुर्योदय माध्यमिक विद्यालय कैना पुग्न उति नै समय हिंड्छन् ।

उनी ९ कक्षामा अध्ययनरत छन् । उनीहरू मात्र हैन, कटेका दर्जनौं स्थानीय कैनाबजारस्थित वडा कार्यालय, स्वास्थ्य चौकी, विद्यालयलगायत संघसंस्थाबाट सरकारी सेवा लिन र दैनिक उपभोग्य वस्तु किन्न दिनभर पैदल हिंड्न बाध्य छन् ।


खोलामा पुल नभएपछि उनीहरू आधा घण्टाको बाटो एक दिन हिंड्न बाध्य भएका हुन् । त्यस्तै झमरा खोलामा पुल नहुँदा उनीहरूलाई सदरमुकाम खलंगा आउनका लागि रुकुमको आठबीसकोट भएर एक दिनको लामो दूरी हिंड्नुपर्ने बाध्यता भएको छ ।

Yamaha


बाढीले विभिन्न खोलामा पुल बगाएपछि नलगाडका हजारौं स्थानीय बासिन्दालाई आवतजावतमा सास्ती भएको छ । गत साउन २९ गते नलगाड नगरपालिकाको झुमरा खोलामा आएको बाढीले ट्रस ब्रिज तथा काठेपुल बगाएपछि स्थानीय बासिन्दालाई आवतजावतमा सास्ती भएको हो ।


बाढीले नलगाड नगरपालिका २, ३, ४, ५ र ६ वडामा ३ ट्रस ब्रिज तथा २ दर्जन काठेपुल बगाएको हो । बाढीका कारण झुमराखोला, गराग्ली खोला, हम्काखोला, विराखोला, साङ्ट, पिउली, तल्लो गराग्ली, नहकुली, करुवा, कटे, औला, गुदाले, सिर्के, जुगेखोलालगायत खोलाका पुल बगेका छन् । पुल बगाएपछि दर्जन विद्यालयका एक हजार विद्यार्थीे पठनपाठनबाट बन्चित भएका छन् ।


बाढीले कालिमाटी र घुवारामा रहेको ट्रस ब्रिज बगाउँदा बारेकोट गाउँपालिका, जुम्ला र डोल्पा जाने–आउने बाटोसमेत अवरुद्ध भएको छ । त्यस्तै बाढी र पहिरोका कारण स्थानीय बासिन्दाका ४१ घर, दुई दर्जन खानेपानी योजना, आधा दर्जन लुघु जलविद्युत् आयोजना, एक सय पानी घट्ट, चारवटा मिल, आधा दर्जन सडक, हजारौं रापेनी खेतीयोग्य जमिनलगायत संरचना क्षति भएका छन् ।


पुल नहुँदा पिउली, राता, भारगाउ, थाप्ला, लहँ, गर्छिना, करुवा जानेआउने बाटो बन्द भई स्थानीय बासिन्दा आन्तरिक नाकाबन्दीमा परेको वडाअध्यक्ष पूर्णबहादुर खडकाले बताए । ‘गाउँलेहरूले दुई सातादेखि एक गाउँबाट अर्को गाउँसम्म आवतजावत गर्न पाएका छैनन्,’ उनले भने । बाढीले स्थानीय बासिन्दाका २६ घर बगाएको र १५ घरमा आंशिक क्षति पुर्‍याएको खडकाले बताए । बाढी तथा पहिरोले पुल, जलविद्युत, खानेपानी, खेतीयोग्य जमिन, सडकलगायत भौतिक संरचनामा करोडौंको क्षति पुर्‍याएको भन्दै नगरपालिकाले सम्बन्धित पक्षसँग सहयोगको अपिल गरेको नगरप्रमुख टेकबहादुर रावलले बताए ।


‘पुल बगाउँदा नाकाबन्दीजस्तै भएको छ, गाउँभरि खानेपानीको हाहाकार छ, विद्यार्थी विद्यालयमा गएर पढ्न पाएका छैनन्,’ नगरप्रमुख रावलले भने, ‘खोलामा अस्थायी लाप्का बनाएर भए पनि आवतजावत खुलाउने प्रयासमा छौं ।’ खोला पुल नहुँदा दैनिक उपभोग्य वस्तुको आपूर्ति हुन सकेको छैन । उनका अनुसार दुई दर्जन गाउँमा खाद्यान्नलगायतको अभाव देखिएको छ ।


Esewa Pasal

प्रकाशित : भाद्र १३, २०७५ १२:५४
ADVERTISEMENT
ADVERTISEMENT
प्रतिक्रिया
पठाउनुहोस्

नहर बगाएपछि विद्युत् अवरुद्ध

भीमबहादुर सिंह

जाजरकोट — गत साउन २९ गते झुमरा खोलामा आएको बाढीले नहर बगाएपछि नलगाड नगरपालिकाका ६ वटा लघुजलविद्युत् आयोजना बन्द भएका छन् । आयोजना बन्द भएपछि नलगाडका करिब चार हजार घरधुरी अँध्यारोमा बस्न बाध्य छन् ।

बाढीले क्षति पुर्‍याएको जाजरकोटको नलगाड–४ स्थित बागमारे लघु जलविद्युत् आयोजना । तस्बिर : भीमबहादुर

बाढीले कुलो, बाँधस्थल, पावरहाउसलगायत संरचनामा क्षति पुर्‍याएको छ । विद्युत् आपूर्ति बन्द हुँदा नलगाडको नगर उज्यालो कार्यक्रमसमेत प्रभावित भएको छ ।

बाढीपहिरोले ४५ किलोवाटको बागमारे लघु जलविद्युत्, १५ किलोवाटको झुमराखोला लघु जलविद्युत्, ८ किलोवाटको सिलिपलाउन लघु जलविद्युत्, १५ किलोवाट सिलिपलाउन स्याँला धर्मशाला लघु जलविद्युत्, १६ किलोवाट लहरेखोला लघु जलविद्युत् र १३ किलोवाट लहरे लघु जलविद्युत् आयोजनाको संरचनामा क्षति पुर्‍याएको छ ।

नगरप्रमुख टेकबहादुर रावलका अनुसार बाढीपहिरोले ६ वटा लघुजलविद्युत्को नहर, पावउरहाउस, बाँधस्थल लगायतमा क्षति पुर्‍याएको छ । बाढीले सबै जलविद्युत् आयोजनाको दुई सयदेखि तीन सय मिटर पक्की नहर बगाएको उनले बताए । विद्युत् आपूर्ति बन्द भएपछि नलगाड नगरपालिका २, ३, ४ र ५ वडाका चार हजार घरपरिवार विद्युत् सेवाबाट वञ्चित भएका हुन् । ‘बाढीले लाखौं खर्चेर निर्माण गरिएका पक्की नहर बगाएकाले तत्काल मर्मतसम्भार गर्न समस्या छ,’ रावलले भने, ‘विद्युत् आयोजनाको संरचना पुनर्निर्माणका लागि नगरको बजेटले भ्याउन सक्ने अवस्था छैन ।’

उनले विद्युत् आयोजना मर्मत गरेर छिटोभन्दा छिटो विद्युत् सुचारु गर्नका लागि प्रदेश तथा केन्द्र सरकारसँग बजेट माग गरिएको बताए । नलगाडअन्तर्गतका घुवारा, पीपलचौर, खन्टाकुरा, थाप्ला, कालिमाटी बजार, दल्लीलगायतका स्थानका बासिन्दा विद्युत् उपभोगबाट वञ्चित भएका हुन् ।

विद्युत् अभावमा स्थानीय बासिन्दाका साथै सरकारी कार्यालय, वित्तीय संस्था, विद्यालयलगायत संघसंस्थाको काम प्रभावित भएको छ । नलगाड–५, की देवी बटालाले विद्युत् आपूर्ति नहुँदा मोबाइलमा कुराकानी गर्न, टेलिभिजन हेर्न, कुटानी पिसानी गर्न, फर्निचरलगायतका घरेलु उद्योग सञ्चालन गर्न समस्या भएको बताइन् ।

उनले विद्युत् सेवा नहुँदा जनजीवन प्रभावित भएको जनाइन् । विद्युत नहुँदा सयौं विद्यार्थीको पठनपाठन पनि वाधा पुगेको उनको भनाइ छ । बाढीका कारण फेरि टुकीको भर पर्नुपरेको उनले गुनासो गरिन् ।

प्रकाशित : भाद्र ११, २०७५ ०९:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT