२५ शय्या अस्पताल चलाउँदै नगरपालिका

हरि गौतम

रुकुम पश्चिम — आठबीसकोट नगरपालिकाले २५ शय्याको अस्पताल सञ्चालन गर्न थालेको छ । अस्पतालका लागि कर्णाली स्वास्थ्य विज्ञान प्रतिष्ठान जुम्लाले एक जना डाक्टर आठबीसकोट नगरपालिकालाई दिने भएको छ ।

रुकुम पश्चिम आठबीसकोट नगरपालिकाले सञ्चालन गर्न लागेको २५ शय्याको अस्पतालका लागि बनाइएका बेड । तस्बिर : हरि

डाक्टर उपलब्ध गराउन कर्णाली स्वास्थ्य विज्ञान प्रतिष्ठान र नगरपालिकाबीच सम्झौता भएको छ । प्रतिष्ठानका रजिस्ट्रार विश्वराज को र नगर प्रमुख गोर्खबहादुर केसीले सम्झौतापत्रमा हस्ताक्षर गरेका छन् । प्रतिष्ठान र नगरपालिकाबीच १० बुँदे सम्झौता भएको छ ।

प्रतिष्ठानले खटाएको तलबभत्ता प्रतिष्ठान आफैंले र यातायात खर्च दैनिक भत्ता प्रतिष्ठानको नियमानुसार नगरपालिकाले बेहोर्नेछ । प्रतिष्ठानले खटाएको डाक्टर अस्पतालको प्रमुख हुने, प्रतिष्ठान र नगरपालिकाको संयुक्त आयोजनामा विशेषज्ञ शिविर आयोजना गरिने, प्रतिष्ठानले उक्त अस्पतालमा टेलिमेडिसिन सेन्टर समेत स्थापना गर्ने सम्झौता भएको छ ।

Yamaha

अस्पतालका लागि अन्य पूर्वाधार तथा व्यवस्थापनका सबै काम पूरा भइसकेका छन् । हाललाई साविकको स्वास्थ्य चौकी र विद्यालय भवनको प्रयोग गरी अस्पतालको शैय्या बनाइएको छ ।

अन्यत्र गाभिएको आधारभूत विद्यालयका कोठा भत्काएर अस्पतालको शय्या राखिएको हो । अहिले ९ नम्बर वडाको राडीमा अस्थायी रूपमा अस्पताल सञ्चालन गरिने र अस्पतालको पक्की संरचना ११ नम्बर वडामा बनाइने नगरपालिकाले जनाएको छ ।

त्यसका लागि आधारभूत काम भइसकेको नगर प्रमुख केसीले बताए । ‘प्रत्येक नगरमा २५ शय्याको अस्पताल हुने परिकल्पना संविधानले गरेको छ, त्यसको कार्यान्वनमा हामी लागेका हौं,’ केसीले भने ।

असोजको दोस्रो हप्तासम्म अस्पताल सञ्चालनमा आइसक्ने गरी काम भइरहेको छ । अस्पतालका सम्पूर्ण काम कम्प्युटर प्रणालीबाटै गरिनेछ । त्यसका लागि शेयर प्रणाली जडान भइसकेको छ ।

अस्पतालको लाग आवश्यक प्राविधिकदेखि अन्य जनशक्ति, आवश्यक उपकरण, औषधी, बेड लगायतको व्यवस्था पूरा भइसकेको नगरपालिकाका निमित्त प्रमुख प्रशासकीय अधिकृत रामबहादुर केसीले बताए । नगरपालिकाले विभिन्न पदमा २० जना कर्मचारी भर्ना गरिसकेको छ ।

रेडियाग्राफी एकजना, ल्याब टेक्निसियन एक, असिस्टेन्ट एक, अनमी ५, स्वास्थ्य सहायक २, अहेव २ जना, २ जना रिसेप्सनिस्ट, ४ जना स्वीपर भर्ना गरिएको छ । नगरको कार्यविधि अनुसार अन्तरंग बहिरंगको साथै डिजिटल एक्सरे, अल्ट्रा साउन्ड, इसिजी लगायतका सेवा अस्पतालले प्रवाह गर्नेछ ।

प्रकाशित : भाद्र २२, २०७५ १०:२३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

हुम्लाको परीक्षा केन्द्र सुर्खेत

कान्तिपुर संवाददाता

हुम्ला — शिक्षक सेवा आयोगले सबै तहका शिक्षकको पदपूर्तिका लागि परीक्षा केन्द्र सुर्खेतमा तोकेपछि यहाँका परीक्षार्थीलाई सास्ती हुने भएको छ ।

सडक यातायातको सुविधा नभएकाले जहाजमार्फत आउजाउमा समस्या हुने परीक्षार्थीको गुनासो छ । उनीहरूले परीक्षा केन्द्र जिल्लामै राख्न माग गरेका छन् ।

जिल्लाबाट ६ सय ७१ परीक्षार्थीले शिक्षक सेवा आयोगको परीक्षामा प्रतिस्पर्धा गर्दैछन् । शिक्षा विकास तथा समन्वय इकाईका अनुसार जिल्लाबाट मावितर्फ ४१, निमावि तहमा ८१ र प्राथामिक तहको शिक्षकका लागि पाँच सय ४९ जनाले फाराम भरेका छन् ।

साबिक कर्णाली अञ्चलका ५ र दैलेखबाट फाराम भरेका परीक्षार्थीको केन्द्र सुर्खेत तोकिएको छ । विगतमा निमावि र मावि तहको शिक्षकका लागि सुर्खेत र प्राथमिक तहका लागि जिल्लामै केन्द्र तोकिएको थियो । निजामती सेवातर्फको खरिदार पदका लागि जिल्लामै परीक्षा हुने गरेको छ ।

हवाईमार्गबाट परीक्षा दिन जाँदा एकजना परीक्षार्थीले कम्तीमा ५० हजार खर्च गर्नुपर्ने बाध्यता रहेको स्थानीय पूर्णबहादुर शाहीले बताए । उनले जिल्लाबाहिर गएर परीक्षा दिन आर्थिक र भौतिक रूपले समस्या भएको जनाए । ‘महँगोमा प्लेन चढेर जानै समस्या भयो,’ उनले भने, परिक्षार्थीको संख्या ठूलो रहेकाले टिकट पाउन समेत समस्या हुने देखिन्छ ।’

परिक्षार्थीले जिल्लामै परीक्षा केन्द्र राख्न माग गर्दै दुई दिनअघि शिक्षा मन्त्री, शिक्षक सेवा आयोग, जिल्लाबाट प्रतिनिधित्व गर्ने सांसद लगायतलाई ज्ञापनपत्र बुझाएका थिए ।
‘आयोगले जिल्लामै सेवा गर्न फाराम भरेका सयौं परिक्षार्थीको बाध्यता बुझेन,’ शाहीले भने, ‘परीक्षाकै लागि महँगो प्लेन चढेर जानुपर्ने बाध्यता भयो ।’

उनले खाना र बसाइमा समेत महँगो रकम खर्च हुने भएकाले परीक्षा बाहिर राखिनु अव्यावहारिक भएको बताए । स्थानीय श्यामजोर ऐडीले परिक्षा दिन सुर्खेत जाँदा र बस्दा ५० हजार रुपैयाँले समेत नपुग्ने बताए । परीक्षा दिन जाने अधिकांशले ठूलो रकम जुटाउन नसक्ने अवस्था रहेको उनले बताए ।

खर्च जुटाए पनि हवाई टिकट नपाउने समस्या हुने उनको भनाइ छ । परिक्षार्थीलाई परिक्षाको तयारीका साथै हवाई टिकट समस्याले तनाब हुन थालेको ऐडीले जनाए ।

हुम्लाबाट फाराम भरेका सबै तहका परिक्षार्थीका लागि जिल्लामै परिक्षा केन्द्र तोक्न सांसद रंगमति शाहीले प्रतिनिधि सभामा माग गरेकी थिइन् ।

उनले शिक्षामन्त्री लगायतका अधिकारीसँग भेटेर यसबारे ध्यानाकर्षण गराएको बताइन् । ‘निमावि र मावि तहको नभए पनि प्राथामिक तहको परीक्षा केन्द्र जिल्लामै राख्न सकिन्थ्यो,’ उनले भनिन्, ‘बाहिर केन्द्र राखिँदा प्रतियोगी परीक्षाबाट वञ्चित हुने अवस्था आयो ।’ दुर्गम क्षेत्रका परीक्षार्थीलाई असुविधा हुने भए पनि परीक्षाको मर्यादा कायम गर्न परीक्षा
केन्द्र बाहिर राखिएको आयोगका प्रशासकीय प्रमुख डा. तुलसी थपलियाले बताए ।

प्रकाशित : भाद्र २२, २०७५ १०:२२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT