विद्यालयमा अपांगमैत्री भवन

एलपी देवकोटा

जुम्ला — तिला गाउँपालिका–२, भुङ्गेडी स्थित कालिका आधारभूत विद्यालयमा अपांगमैत्री भवन निर्माण गरिएको छ । अपांगमैत्री भवन निर्माण भएपछि बिभिन्न शारीरिक समस्या भएका विद्यार्थीको पठनपाठन सहज बनेको छ ।

जुम्लास्थित कालिका आधारभूत विद्यालयमा निर्माण भइरहेको अपांगमैत्री भूकम्प प्रतिरोधी भवन । तस्बिर : एलपी

शारीरिक अशक्तता भएका तिला गाउँपालिका–२ का हरियो नेपालीले यसअघि विद्यालयको पुरानो भवनमा बसेर पढ्दा विभिन्न समस्या आएको बताए । ‘जीर्ण भवन त्यसमा पनि अपांगमैत्री कक्षा कोठा नहुँदा पठनपाठनमा समस्या थियो,’ उनले भने, ‘समान्य कक्षाकोठाभित्र बसेर पढ्दा सिकाइमा समस्या भोग्नुपरेको थियो, अपांगमैत्री भवन बनेपछि पठनपाठन पनि गुणस्तरीय हुने अपेक्षा छ ।’

उनी विद्यालयमा कक्षा ६ मा अध्ययनरत छन् । अपांगता भएका टेक बोहोराले भवनका कारण सिकाइको स्तर अब माथि उठ्ने जनाए । ‘नयाँ बनेको भवनमा सहजै आवतजावत गर्ने सकिने भएको छ,’ उनले भने, ‘कक्षा कोठा पनि अपांगमैत्री भएकाले पठनपाठनका लागि सास्ती भोग्नु नपर्ने भयो ।’ विद्यालयमा कक्षा ८ सम्म पठनपाठन भइरहेको छ ।

Yamaha

विद्यालयमा सात वटा मात्रै कोठा भएकाले अन्य विद्यार्थीको पठनपाठनमा समेत समस्या थियो । विद्यालयका प्रधानाध्यापक लालबहादुर बुढाले भूकम्प प्रतिरोधात्मक चार कोठे पक्की भवन बनेपछि विद्यार्थी खुसी भएको बताए । ‘अरू साथीहरूसँग बसेर पढ्दा विद्यार्थीलाई धेरै समस्या थियो,’ उनले भने, ‘अब पठनपाठन पनि व्यवस्थित हुनेछ ।’

विद्यालयमा तीन सय ५४ जना विद्यार्थी अध्ययनरत छन् । अपांगता भएका एक दर्जन विद्यार्थीले अध्ययन गर्दै आइरहेका छन् । ‘विद्यालयमा कक्षा कोठा अभावका कारण एक सय ४० जनासम्म विद्यार्थीलाई एउटै कोठामा राखेर पढाउनुपर्ने बाध्यता थियो,’ उनले भने, ‘अब त्यो झन्झटबाट पनि मुक्ति पाइयो ।’

प्लान नेपालको सहयोगमा सांग्रिला एसोसिएसनले ८० लाख रुपैयाँको लागतमा अपांगमैत्री भवन र छात्रछात्राका लागि चर्पीसमेत निर्माण गरेको सांग्रिला एसोसिएसनका प्रोग्राम म्यानेजर जय श्रेष्ठले बताए ।

विद्यार्थीको चाप धेरै भएको र कक्षा कोठाहरू साँघुरो र कम भएकाले भवन निर्माणमा सहयोग गरेको उनको भनाइ छ । संस्थाले खानेपानीको समस्यासमेत समाधान गरेको उनले जनाए । गाउँमा अपांगमैत्री विद्यालय भवन बनेपछि लिही गाउँका स्थानीय समेत खुसी भएको अभिभावक पूर्ण रावतले बताए ।

Esewa Pasal

प्रकाशित : भाद्र २६, २०७५ १०:०३
प्रतिक्रिया
पठाउनुहोस्

लगानी सम्मेलन स्थगित

एलपी देवकोटा

काठमाडौँ — चन्दननाथ नगरपालिकाले भदौ २९ गते आयोजना गरेको लगानी सम्मेलन स्थगित भएको छ । जिल्ला समन्वय समितिले लगानी सम्मेलन गर्दा समन्वय नगरेको भन्दै ध्यानाकर्षण पत्र जारी गरी सम्मेलन गर्न नपाइने आशय देखाएपछि स्थगित गरिएको हो ।

नगरपालिकाले भने स्थानीय तहमा देशमै पहिलोपटक हुन लागेको कार्यक्रममा राजनीतिक पूर्वाग्रहबाट प्रेरित भएर हस्तक्षेप भएको आरोप लगाएको छ ।

मुलुकमै पहिलोपटक स्थानीय तहले आयोजना गर्न लागेको लगानी सम्मेलनले जिल्लाको विकास सामथ्र्यको पहिचान हुने र आर्थिक समृद्धिको बाटोमा अग्रसर हुने अपेक्षा थिए । नगरप्रमुख कान्तिका सेजुवालले जिल्लाको समग्र विकासका लागि लगानी सम्मेलनको परिकल्पना गरे पनि जिससले ध्यानाकर्षण गरेपछि स्थगित गरिएको बताइन् । ‘जिल्लाका अन्य स्थानीय तहले असहयोग गरेपछि कार्यपालिकाको बैठकले सम्मेलन स्थगित गर्न बाध्य भयौं,’ उनले भनिन्, ‘लामो समयको संषर्घ र प्रयासपछि कार्यक्रमको तयारी थालिएको थियो ।’

लगानी सम्मेलनका लागि अर्थ मन्त्रालयले साउन १५ गते सहमति दिएको थियो । चन्दननाथ नगरपालिका, संघीय मामिला तथा सामान्य प्रशासन मन्त्रालय र उद्योग वाणिज्य तथा आपूर्ति मन्त्रालयसमेत लगानी सम्मेलनका आयोजक रहेका थिए ।

राजनीतिक पूर्वाग्रहका कारण लगानी सम्मेलन हुन नदिन षड्यन्त्र गरिएको नगरप्रमुख सेजुवालको भनाइ छ । ‘सम्मेलनको अन्तिम तयारी भइसकेको थियो, प्रचारप्रसारलगायत सरकारी निकायका प्रमुख, प्रदेशका मुख्यमन्त्री, मन्त्री, मन्त्रालयका सचिव, राजदूत, दातृ निकायलगायत तीन सय बढीलाई निमन्त्रणा दिइसकिएको थियो,’ उनले भनिन्, ‘सम्मेलनका लागि जुम्ला सजिइसकेको अवस्थामा महिलाले सञ्चालन गरिरहेको नगरपालिकालाई सफल हुन नदिने षड्यन्त्र भयो ।’ उनले स्थानीय तह स्वायत्त भएकाले सम्मेलन गर्न पाउने अधिकार भए पनि केही राजनीतिक दल र स्थानीय तहका कारण समस्या भएको बताइन् ।

भदौ १६ गते समन्वय समितिले जिल्लाका सबै स्थानीय तहलाई समन्वय गर्न ध्यानाकर्षणपत्र पठाएको थियो । भदौ १७ गते नगरपालिकाले समन्वयका लागि जिल्लाका सबै स्थानीय तहका प्रमुखलाई बैठकमा बोलाउँदा कोही नआएको प्रमुख प्रशासकीय अधिकृत शिवराज चौलागाईले बताए । ‘हामीले सक्दो प्रयास गरेका हांै,’ उनले भने, ‘तर, एउटा स्थानीय तहले गर्न लागेको कार्यक्रममा अर्को स्थानीय तहले सहयोग गर्नुपर्ने ठाउँमा विरोध गर्दा यस्तो समस्या आयो, लगानी सम्मेलन गर्दा जिल्लाकै विकास हुन्थ्यो ।’

जिल्लालाई विश्वका दातृ निकायले चिन्ने अवसर स्थानीय तहका जनप्रतिनिधिहरूको जुँगाको लडाइका कारण स्थगित हुनु उचित नभएको उद्योग वाणिज्य संघका अध्यक्ष रामदत्त रावलले बताए । ‘देश विदेशका ठूला व्यवसायीहरू जिल्लामा लगानी गर्न आउँदा हाम्रो जिल्लाको विकास हुन्थ्यो,’ उनले भने, ‘तर, यसमा राजनीति हुनु दु:खद कुरा हो ।’

प्रकाशित : भाद्र २४, २०७५ ०८:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT